Va ŭradzie vyznačyli, jak buduć zapuskać «brend biełaruskaj žančyny»
Saviet Ministraŭ zajaviŭ pra płany zapuścić u Biełarusi žanočaje internet-radyjo, a taksama arhanizavać šerah mižnarodnych žanočych forumaŭ, fiestyvalaŭ i konkursaŭ. Hetyja inicyjatyvy majuć na mecie sfarmiravać tak zvany «brend biełaruskaj žančyny» ŭ miežach Hoda biełaruskaj žančyny, jakim Łukašenka abviaściŭ 2026 hod.
U respublikanskim płanie mierapryjemstvaŭ, zaćvierdžanym 9 lutaha premjer-ministram Alaksandram Turčynym, praduhledžana 61 tematyčnaje mierapryjemstva. Kaardynavać ich budzie Ministerstva pracy i sacyjalnaj abarony. Usie jany skiravanyja na papularyzacyju roli žančyny i jaje ŭniosku ŭ raźvićcio hramadstva, a taksama na ŭzmacnieńnie padtrymki žančyn i siemjaŭ ź dziećmi.
Dla infarmacyjnaj padtrymki klučavoj temy hoda ŭłady płanujuć adkryć žanočaje internet-radyjo i zapuścić šerah miedyjaprajektaŭ z cheštehami #biełoruska21vieka, #VsieNačinajetsiaSsieḿji, #ŽienskojeLicoBiełarusi.
Akramia taho, zapłanavana praviadzieńnie mižnarodnych forumaŭ, pryśviečanych roli žančyny, u tym liku ŭ zachavańni siamji i miru, choć kankretnyja farmaty pakul nie ahučvajucca.
Siarod kulturnych i hramadskich inicyjatyŭ urad nazvaŭ konkursy «Žančyna hoda» i «Siamja hoda», siamiejny fiestyval «Razam», moładzievy prajekt «Dziavočy vianok miru», a taksama stvareńnie roznych dyjałohavych placovak dla žančyn, praviadzieńnie vystaŭ i aśvietnickich akcyj — takich jak «Ruka dapamohi», «Punkt apory», «Być mamaj — kruta!»
Paralelna z hetym ułady abiacajuć aktyŭna prapahandavać zdarovy ład žyćcia i realizavać kompleks mier pa ŭmacavańni žanočaha zdaroŭja. Na praciahu hoda płanujucca prafiłaktyčnyja miedycynskija akcyi, spartyŭna-azdaraŭlenčyja mierapryjemstvy i fiestyvali.
Nahadajem, što na minułym tydni Biełaruski sajuz žančyn zaćvierdziŭ aficyjny łahatyp Hoda biełaruskaj žančyny. Jak adznačyła staršynia arhanizacyi Volha Špileŭskaja, u vybranym z sotni konkursnych varyjantaŭ łahatypie ŭdałosia abjadnać usie nieabchodnyja simvały.
Kamientary