Zialenski padpisaŭ zakon ab pravavym statusie inšaziemcaŭ, jakija słužać va ŭkrainskim vojsku
Prezident Ukrainy Uładzimir Zialenski padpisaŭ zakon №4730-IX, jaki rehuluje pravavy status inšaziemcaŭ i asob biez hramadzianstva, što prachodziać vajskovuju słužbu va Ukrainie pa kantrakcie, paviedamlaje pres-słužba Viarchoŭnaj Rady
Zhodna z dakumientam, inšaziemcy i asoby biez hramadzianstva, što prachodziać vajskovuju słužbu va Ukrainie pa kantrakcie, buduć ličycca takimi asobami, jakija znachodzicca na terytoryi krainy na zakonnych padstavach, kali atrymajuć paśviedčańnie na časovaje pražyvańnie. Jano budzie vydavacca na ŭvieś termin dziejańnia kantrakta i jašče na šeść miesiacaŭ paśla jaho zakančeńnia abo skasavańnia.
Zamiežnyja vajskoŭcy i asoby biez hramadzianstva pavinny na praciahu šaści miesiacaŭ z momantu ŭstupleńnia zakona ŭ siłu źviarnucca pa afarmleńnie paśviedčańnia na časovaje pražyvańnie. Da zakančeńnia hetaha terminu ich zakonnaje znachodžańnie va Ukrainie budzie paćviardžacca vajskovym paśviedčańniem.
Akramia taho, zakon raspaŭsiudžvaje dziaržaŭnyja harantyi ŭ śfiery miedycynskaj dapamohi na inšaziemcaŭ i asob biez hramadzianstva, jakija słužać u vojsku. Na ich buduć raspaŭsiudžvacca normy zakona ab sacyjalnaj i pravavoj abaronie vajskoŭcaŭ i členaŭ ich siemjaŭ u častcy miedycynskaha zabieśpiačeńnia. Kabiniet Ministraŭ pavinien na praciahu troch miesiacaŭ vyznačyć paradak akazańnia miedycynskaj dapamohi takim vajskoŭcam va Uzbrojenych siłach Ukrainy, Nachvardyi i Dziaržaŭnaj śpiecyjalnaj słužbie transpartu.
U profilnym kamitecie Viarchoŭnaj Rady padkreślili, što afarmleńnie paśviedčańnia na časovaje pražyvańnie daść zamiežnym vajskoŭcam mahčymaść bieź pieraškod karystacca bankaŭskimi, nataryjalnymi, miedycynskimi i inšymi sacyjalnymi pasłuhami.
Zakon ustupić u siłu praz try miesiacy paśla jaho aficyjnaha apublikavańnia.
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary