U Padmaskoŭi zahinuŭ kiraŭnik kampanii-pastaŭščyka kampazitnych materyjałaŭ dla MS-21 i paranieny budaŭnik kaśmičnaha centra, adkrytaha Pucinym

Abodva mieniedžary byli źviazanyja z važnymi prajektami — Ciunin pracavaŭ u kampanii, jakaja pastaŭlała kampazitnyja materyjały dla łajniera MS-21, a Kratkoŭ zajmaŭsia prajektam Nacyjanalnaha kaśmičnaha centra, jaki tydzień tamu adkryŭ Uładzimir Pucin.

Kratkoŭ atrymaŭ ranieńnie hrudnoj kletki padčas sproby zastrelicca ŭ spartyŭnym kłubie «Maskva» pad horadam Adzincova. Dačka biznesmiena zajaviła vydańniu MSK1, što zdareńnie — niaščasny vypadak padčas prystrelvańnia zbroi. Pa jaje słovach, Kratkoŭ u reanimacyi, i jaho žyćciu ničoha nie pahražaje.

54‑hadovy Andrej Kratkoŭ, pavodle aficyjnaj bijahrafii, amal 20 hadoŭ prapracavaŭ u orhanach biaśpieki Rasii. Tam jon dasłužyŭsia da padpałkoŭnika FSB. Z 2006 hoda zajmajecca biznesam u śfiery kiravańnia nieruchomaściu, z 2013 hoda ŭznačalvaŭ roznyja struktury chołdynhu Zeppelin.

Siarod klijentaŭ Zeppelin na sajcie kampanii zhadvajucca «Transnafta», «Adzinaja karparacyja ruchavikabudavańnia» (uvachodzić u «Rastech»), «VEB.RF», hrupa kampanij «JEKS» (źviazana z HRU), NTV. Firma taksama zaklučała dziaržkantrakty na absłuhoŭvańnie biźnies-parka «K2» Ministerstva abarony i ofisna-dziełavoha centra «VR-Riesurs» (uvachodzić u «Viertaloty Rasii»).

U karparatyŭnym vydańni Zeppelin u lipieni 2025 hoda Kratkoŭ nazvaŭ pieršaje paŭhodździe «nadzvyčaj składanym» z-za «biesprecedentnaj» zapazyčanaści, jakuju pierad kampanijaj nazapasili zakazčyki. U tym ža tekście mieniedžar adznačyŭ, što ŭ kampanii źjavilisia novyja abjekty, u tym liku «ŭnikalny» MFK «Nacyjanalnaha kaśmičnaha centra» «Raskosmasa».

Nacyjanalny kaśmičny centr «Raskosmasa» — heta kompleks budynkaŭ z 47‑paviarchovaj viežaj. Čakałasia, što abjekt budzie zdadzieny ŭ 2022 hodzie, adnak u vyniku Pucin adkryŭ jaho tolki tydzień tamu. Siudy pavinny pierajechać 22 z 30 maskoŭskich kanstruktarskich biuro i pradpryjemstvaŭ kaśmičnaj haliny — usiaho kala 20 tysiač čałaviek.

Cieła hiendyrektara kampanii UMATEX Alaksandra Ciunina znajšli kala jaho aŭtamabila na prasiołkavaj darozie ŭ rajonie pasiołka Kakoškina (Novaja Maskva). Miarkujecca, što jon skončyŭ žyćcio samahubstvam.

Pobač ź ciełam znajšli palaŭničuju strelbu i pieradśmiarotnuju zapisku, dzie, pavodle źviestak ahienctva, paviedamlałasia, što jon stamiŭsia zmahacca z depresijaj.

50‑hadovy Alaksandr Ciunin staŭ hiendyrektaram kampazitnaha dyvizijona «Rasatama» i navukova-vytvorčaha kompleksu «Chimpraminžynirynh» (paźniej — UMATEX) u 2016 hodzie. Da hetaha kiravaŭ telekamunikacyjnymi kampanijami.

Kampazitny dyvizijon «Rasatama» — viadučaje pradpryjemstva Rasii pa vytvorčaści vuhlarodnaha vałakna, što vykarystoŭvajecca ŭ avijabudavańni, budaŭnictvie, karablebudavańni i enierhietycy. UMATEX zajmaŭsia impartazamiaščeńniem kampazitnych materyjałaŭ dla rasijskaha siaredniemahistralnaha avijałajniera MS-21.

Uletku 2021 hoda paviedamlałasia, što najnoŭšy rasijski samalot na 30% z kampazitaŭ, vyrablenych u tym liku UMATEX. Miarkujučy pa publikacyjach u ŚMI, rasijskija kampazity akazalisia horšymi za zamiežnyja, z-za čaho masa samalota vyrasła na 6 ton, a dalokaść palotu skaraciłasia ŭdvaja.

MS-21 maje važnaje značeńnie dla impartazamiaščeńnia ŭ hramadzianskaj avijacyi. Heta adziny rasijski samalot, jaki «Aerafłot» płanuje zakuplać u značnych kolkaściach. Ale jaho masavaja vytvorčaść pastajanna adkładajecca.

• 4
• 0
• 3
• 0
• 0
• 0
• 0
• 0