Jakija jeŭrapiejskija stalicy najbolš niebiaśpiečnyja?

Euronews padkreślivaje, što heta nie navukovaje daśledavańnie — u mnohich krainach palicyja nie viadzie padrabiaznuju statystyku, dy i nie ŭsie stalicy ES publikujuć poŭnyja danyja. Telekanał abapiraŭsia na nacyjanalnyja spravazdačy i paviedamleńni presy, suadnosiačy ich z pamieram haradoŭ.

Bolšaść haradoŭ u analizie — stalicy krain ES, ale taksama ŭ śpis uklučany francuzski horad Marsel, dzie situacyja była nastolki dramatyčnaj, što jaje ciažka ihnaravać. Z-za zasiarodžvańnia na stalicach taksama pakinutaja za miežami analizu situacyja ŭ niekatorych bałkanskich krainach, dzie złačynnaść z vykarystańniem zbroi zvyčajnaja sprava.

Brusel — jeŭrapiejskaja stalica złačynstvaŭ z prymianieńniem ahniastrelnaj zbroi

U hetym hodzie Brusel — najbolš niebiaśpiečnaja stalica Jeŭropy pa hvałcie z užyvańniem zbroi. U rajonach Anderlecht i Malenbik uzmacniłasia dziejnaść narkabandaŭ. Da siaredziny žniŭnia zarehistravana 57 stralanin, ź ich 20 letam. Prakuror Žuljen Majnil papiaredziŭ, što «ŭ kožnaha žychara moža trapić vypadkovaja kula», i zaklikaŭ da kaardynavanaj baraćby z bandami. Ministr unutranych spraŭ Bielhii Biernar Kvincin padtrymlivaje ŭviadzieńnie vajskovych patruloŭ i pašyreńnie sietki videanazirańnia ŭ klučavych punktach horada.

Stakholm — ad spakojnaj stalicy da epicentru hvałtu

Da žniŭnia 2025 hoda ŭ stalicy Šviecyi zarehistravana 55 stralanin, u jakich zahinuła dzieviać čałaviek. Złačynnaść z vykarystańniem zbroi raście pa ŭsioj krainie — u hetym hodzie ŭžo adbyłosia 113 stralanin i 33 achviary. Narkabandy vykarystoŭvajuć zabojcaŭ-padletkaŭ, užyvajuć zbroju i vybuchovyja rečyvy. Hety vobraz kantrastuje sa starym ujaŭleńniem Šviecyi jak biaśpiečnaj krainy.

Marsel — krepaść narkamafij

U minułym hodzie ŭ Marseli zahinuła 24 čałavieki ŭ stralaninach, źviazanych z handlem narkotykami (49 — za hod da taho). Ekśpierty adznačajuć, što spad źviazany nie ź dziejańniami palicyi, a z zakančeńniem vajny pamiž kłanami. U hetym hodzie miascovaja presa zarehistravała dva śmiarotnyja incydenty, choć aficyjnych danych pakul niama.

Amsterdam — mienš stralanin, ale bolš vybuchaŭ

Aficyjnaj statystyki niama, ale ŚMI paviedamlajuć pra rost kolkaści vybuchaŭ — u 2023 hodzie ich było 197, udvaja bolš, čym hodam raniej. Stralanin było mienš: identyfikavana siem surjoznych incydentaŭ, adzin śmiarotny.

Harady z umieranaj ryzykaj

Paryž, Kapienhahien, Afiny, Lisabon, Rym i Madryd adznačajucca stralaninami, źviazanymi z bandami, ale pahroza dla vypadkovych ludziej tut mienšaja.

• Paryž — mienš niebiaśpiečny, čym Marsel ci Brusel, ale ŭ 2024 hodzie pavialičyłasia kolkaść zabojstvaŭ; zarehistravana jak minimum čatyry śmiarotnyja ataki z vykarystańniem zbroi.
• Kapienhahien — paśla śmiarotnaj stralaniny palicyja ŭviała «pošukavyja zony», jakija dazvalajuć kantralavać i ahladać ludziej u klučavych rajonach, asabliva ŭ Niorebro.
• Afiny — aficyjnych danych niama, ale miascovaja presa paviedamlaje pra niekalki surjoznych incydentaŭ u hetym i minułym hodzie.
• Lisabon — patrojnaje zabojstva ŭ styli ekziekucyi ŭ 2024 hodzie, u hetym hodzie jašče niekalki ciažkich vypadkaŭ.
• Rym — vosiem stralanin za dva hady, piać śmiarotnych achviar; častka — mafijnyja ekziekucyi.
• Madryd — u minułym hodzie vosiem stralanin, dźvie śmiarotnyja achviary.

Stalicy ź nizkaj ryzykaj

Bucharest, Lublana, Nikasija, Praha, Ryha, Sofija, Viena i Zahrab majuć tolki paasobnyja incydenty z vykarystańniem zbroi.

Biaśpiečnyja harady

Bierlin, Dublin, Chielsinki, Vilnia, Budapiešt, Varšava, Bracisłava, Luksiemburh, Valeta, Talin — tut amal niama stralanin, a tyja, što adbyvajucca, źjaŭlajucca vypadkovymi.

• 6
• 1
• 1
• 1
• 3
• 0
• 0
• 0