«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie
Pa matyvach niaŭdałaj historyi kachańnia Darji Netflix moh by lohka źniać biełaruskuju viersiju «Afieryst ź Cindera». Ale z notkami miascovaj dramy: vykryty kachanak padaŭ zajavu ŭ RUUS za «palityčny» łajk.
Darji 28 hadoŭ, jana ŭ razvodzie i maje dvuch maleńkich dziaciej.
U Threads biełaruska raspaviała, što letaś u śniežni paznajomiłasia z chłopcam — toj pabačyŭ jaje dopis-znajomstva ŭ hetaj sacyjalnaj sietcy i napisaŭ u instahramie.
Na doŭhija pierapiski marnavać čas nie stali — u chutkim časie sustrelisia ŭ kafe. Pra siabie 25‑hadovy Mikita raspavioŭ, što tolki što viarnuŭsia z Maskvy, a sam zajmajecca pierahonam i prodažam aŭtamabilaŭ. Kazaŭ i pra siamju: tata žyvie ŭ Tarasavie, maci nikoli nie pracavała.
Akazałasia, što žyvie kavaler u centry ŭ šykoŭnaj dvuchpaviarchovaj kvatery, maje darahuju mašynu. Mikita zdavaŭsia nadziejnym: pryvioz žyvuju jalinku, baviŭ čas ź dziećmi Darji, vaziŭ dziaŭčynu pa jaje spravach.
Ale raptam Darja pačała zaŭvažać dziŭnaje. Chłopcu davoli časta telefanavała adna i taja ž dziaŭčyna — razmaŭlaŭ ź joj Mikita zvyčajna hruba. Tłumačyŭ chłopiec heta tak: nadakučlivaja panienka — siastra siabra, jakaja daŭno i bieznadziejna zakachanaja ŭ jaho. I kali ćviarozaja jana siabie kantraluje, dy jak vypje, adrazu pačynaje telefanavać.
Paśla Mikitu ŭžo pačali telefanavać niejkija mužčyny z razborkami — toj chłusiŭ im, byccam by znachodzicca nie ŭ Minsku. Chłopiec niervavaŭsia i kazaŭ, što maje prablemy na pracy. Mikita staŭ źnikać — tłumačyŭ, što sprabuje vyrašyć tyja samyja prablemy.
A spaliŭsia prosta: pierasyłaŭ śmiešnyja ryłsy ŭ instahramie i vypadkova stvaryŭ čat adrazu ź dźviuma dziaŭčatami. Chutka vydaliŭ, ale było pozna: Darja zrazumieła, kamu treba pisać.
Vyśvietliłasia, što ŭžo paŭhoda Mikita ŭ adnosinach ź inšaj. A pry vočnaj staŭcy ź dźviuma dziaŭčatami stała viadoma jašče šmat cikavaha: jon nikoli nie pracavaŭ, žyvie ŭ kvatery z mamaj, mašyna aryštavanaja, plus jamu zabaronieny vyjezd ź Biełarusi. Hrošy Mikita traciŭ z maminaj kartki, abo z kartki kachanki numar adzin.
A Darji za niedarečnuju cikaŭnaść chłopiec vyrašyŭ adpomścić. Jon znajšoŭ, što ŭ 2020 hodzie dziaŭčyna pastaviła łajk pad «bčb-fota». Mikita napisaŭ danos u milicyju, dadaŭšy skrynšot hetaha fakta.
Pry hetym sama Darja śćviardžaje, što ŭ 2020 hodzie nibyta ŭvohule nie była ŭ Biełarusi. Ale kaža, što sud adbyŭsia, i ŭ vyniku joj prysudzili štraf pamieram 80 bazavych adzinak — 3600 rubloŭ.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ14
Kamientary