Biełarus try hady raźvivaŭ kiebabnuju na rynku ŭ Varšavie. A ciapier jaje chočuć źnieści
Alaksiej razam z partniorami adkryŭ kiebabnuju ŭ Varšavie i try hady sprabavaŭ utrymać jaje. Niadaŭna jon vypadkova daviedaŭsia, što terytoryju, dzie pracuje jaho biznes i dziasiatki inšych, mohuć ačyścić užo praz paŭhoda. Pradprymalniki vałodajuć paviljonami, ale nie ziamloj, na jakoj jany stajać. Svajoj historyjaj biełarus padzialiŭsia z Most.
«Viedaŭ, što moj napoj budzie ludziam niejak dapamahać»
Midas Kebab — heta nievialikaja kiebabnaja na varšaŭskim rynku. Jaje saŭładalnik i kuchar — Alaksiej, biełarus, jaki pierajechaŭ u Polšču ŭ 2020 hodzie. Da hetaha jon pracavaŭ u siamiejnym biznesie, handlavaŭ knihami i kanctavarami, ale lubiŭ hatavać dla siabroŭ i siamji, tamu zaŭsiody chacieŭ źviazać svajo žyćcio z kuchniaj.
Kali Alaksiej tolki pierajechaŭ u Polšču, jon vyrašyŭ hatavać i biaspłatna razdavać imbirnyja napoi. Tak jon sprabavaŭ być karysnym u novym dla siabie miescy i niejak adździačyć ludziam vakoł. Jaho hałoŭnymi spažyŭcami stali biazdomnyja ludzi i ŭdzielniki vuličnych akcyj.
«Było choładna, i ja viedaŭ, što moj napoj budzie ludziam niejak dapamahać», — uspaminaje Alaksiej.
Hetym jon zajmaŭsia amal dva hady, žyvučy na ŭłasnyja aščadžeńni.
«Za ŭsio žyćcio dva-try kiebaby skruciŭ. I kožny byŭ horšy za papiaredni»
Praz znajomych Alaksiej traplaŭ na fiestyvali, dzie hatavaŭ napoi i viehietaryjanskuju ježu. Tam jon zrazumieŭ, što moža pracavać ź vialikaj kolkaściu ludziej.
Paźniej znajomy prapanavaŭ jamu vykupić šapik na rynku i adkryć kiebabnuju. Takoha dośviedu ŭ biełarusa nie było.
«Za ŭsio žyćcio ja da taho momantu, moža, dva-try kiebaby skruciŭ. I kožny ź ich byŭ horšy za papiaredni», — pryznajecca jon.
Alaksiej uziaŭ na siabie fizičnuju pracu. Pačynaŭ z myćcia posudu i nazyvaje heta adnoj z najlepšych prac u žyćci. Potym staŭ kucharam. U pieršy dzień pracy, nie majučy dośviedu, jon pryhatavaŭ kala 150 kiebabaŭ. Pabić hety rekord tak i nie ŭdałosia, ale z kožnym dniom kiebaby rabilisia ŭsio smačniejšymi.
Na rynku niama vypadkovych ludziej
Z samaha pačatku Midas Kebab pracuje na nievialikim rynku na vulicy Pułaŭskaj u Varšavie. Alaksiej kaža, što šmat kamu takaja łakacyja padajecca minusam: nie centr, stary bazarčyk biez turystyčnaha patoku. Ale dla jaho i susiedziaŭ usio vyhladaje inakš: miascovym žycharam nie treba jechać praz uvieś horad, kab pakaštavać lubimych straŭ. Jany mohuć vyjści z kvatery ŭ tapačkach i kupić što chočuć. Pavodle słoŭ Alaksieja, ludzi prychodziać siudy nie tolki pa ježu, ale i tamu, što viedajuć tych, chto tut pracuje.
Na rynku sabralisia pradprymalniki, dla jakich ich małyja hastranamičnyja biznesy — heta sprava žyćcia. Alaksiej pieraličvaje susiedziaŭ i padkreślivaje, što tut niama vypadkovych ludziej.
«Hruzinskaja kuchnia tut adna z najlepšych, jakuju ja jeŭ u žyćci. Ukrainskija vareniki — taksama. Sušy tut hatuje japoniec, jaki ŭžo 15 hadoŭ pracuje na hetym miescy i nikudy nie choča sychodzić».
Miesca, jakomu adličyli čas
Niadaŭna Alaksiej i jaho susiedzi vypadkova daviedalisia, što rynak, dzie jany pracujuć, mohuć zrujnavać. Čutki źjavilisia naprykancy 2025 hoda. A zakryćcio nibyta zapłanavana ŭžo na 2026 hod. Aficyjnych dakumientaŭ pradprymalnikam nie pakazali.
Alaksiej sam pajšoŭ u administracyju i spytaŭ, ci praŭda, što terytoryju buduć rasčyščać. Tam paćvierdzili, što znos mahčymy, ale dakładnych dat nie nazvali.
«Pra heta nichto nie papiaredžvaŭ. Ale pa papierach usio zroblena hramatna», — kaža jon.
Pradprymalniki pavinny buduć navat sami razabrać svaje paviljony za ŭłasnyja hrošy.
Va ŭłasnaści biznesmienaŭ tolki sami pamiaškańni, ale nie ziamla, na jakoj jany stajać. Heta aznačaje, što paśla znosu jany zastanucca bieź miesca dla pracy i biez kampiensacyi. A finansavaja situacyja ŭ mnohich i biez taho składanaja.
Alaksiej tłumačyć, što ŭ ich taksama niama resursaŭ, kab źjechać i pačać usio z nula ŭ inšym miescy. Hrošaj na arendu novaj kropki taksama niama. Biznes trymajecca, ale nie prynosić dastatkovaha prybytku, kab nazapasić niešta na pierajezd. Tamu znos dla ich — heta realnaja pahroza źniknieńnia biznesu.
Alaksiej padkreślivaje, što dla jaho važna havaryć nie tolki pra Midas Kebab. Jon kaža, što pad pahrozaj apynulisia i inšyja małyja biznesy, jakija pracujuć u takich miescach.
«Ja chaču paprasić padtrymać mały biznes. Kali ŭ vas jość mahčymaść schadzić da kahości maleńkaha, nie samaha pryhožaha, ale da čałavieka, jaki lubić svaju pracu, padtrymajcie jaho, kali łaska», — kaža jon.
Ciapier čytajuć
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary