Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ

Hleb Jemialjanienkaŭ naradziŭsia ŭ 1998 hodzie ŭ Ašmianach u šmatdzietnaj siamji. Baćki pierajechali ŭ Minsk, kali toj jašče byŭ mały. Vučyŭsia ŭ minskaj škole №76. Ale dalej pastupiŭ u Ašmianskuju ahrarnuju chabzu. 

Na miažy paŭnalećcia Hleb, pavodle dadzienych Belpol, trapiŭsia z narkotykami — u 2016 hodzie jaho zatrymali z 0,2 hrama amfietaminu, za što chłopiec atrymaŭ try hady chatniaj chimii.

Ale bolš prykry ŭčynak Jemialjanienkaŭ ździejśniŭ u 2020 hodzie — pazvaniŭ u 102, kab danieści, što «ŭ kramie «Ałmi» na pieršym paviersie ŭ punkcie pa prodažy kaljanaŭ raźviešanyja bieł-čyrvona-biełyja ściahi». Kolki čałaviek zatrymali i kinuli na sutki ŭ vyniku danosu Jemialjanienkava — nieviadoma.

Jašče ŭ 2019 hodzie chłopiec zarehistravaŭsia ŭ jakaści indyvidualnaha pradprymalnika — źbiraŭsia zajmacca pryborkaj budynkaŭ.

Pavialičyć

Adnak nieŭzabavie Hleb źjechaŭ z radzimy i padaŭsia šukać hrošy ŭ Rasii. Aficyjna ŭładkoŭvacca chłopiec nie staŭ, ale pavioŭsia na ŭbačanuju ŭ supołcy «Padpracoŭka Sankt-Pieciarburh» abviestku ab patrebie «padsobnaha rabočaha». Historyja była ŭ lutym 2024-ha.

Ananimny pracadaŭca prapanavaŭ Hlebu vazić pasyłki na dalokija adlehłaści za apłatu ŭ kryptavalucie. 

Hleb adrazu ŭsio zrazumieŭ biez dadatkovych tłumačeńniaŭ: adpraviŭ kurataru sełfi z pašpartam, pastaviŭ sabie VPN dla kanfidencyjnaści dalejšaj pierapiski, trekier, zavioŭ kryptakašalok. Staŭ vykopvać z-pad śniehu ŭ lesie «pasyłki» i advozić ich u inšyja rajony.

Pry hetym svajoj mašyny ŭ Hleba nie było — u pajezdkach jon karystaŭsia taksi i servisam pa padvozie BlaBlaCar. 

U adnoj z takich pajezdak — nie vyklučana, što pa sihnale pilnaha kiroŭcy — Hleba i aryštavali. DAI spyniła mašynu i paprasiła Hleba skazać, što ŭ dziŭnaj zapiačatanaj karobcy, jakuju jon viazie ŭ rukach. Chłopiec zaniervavaŭsia i lapnuŭ, što ŭnutry tabletki.

Što za tabletki? Dakładniej patłumačyć nie zmoh, palicejskija pravieryli sami — 700 hram tabletak ekstazi, bolš za tysiaču štuk. 

Za pieravozku narkotykaŭ u asabliva bujnym pamiery Hleba adpravili na vosiem hadoŭ u kałoniju strohaha režymu, da recydyvistaŭ. Tudy ŭ Rasii moža trapić navat toj, chto asudžany ŭpieršyniu — prosta za ciažkaść artykuła. 

Ale doŭha ŭ rasijskaj kałonii chłopiec nie vytrymaŭ i vyrašyŭ ryzyknuć, zavierbavaŭšysia ŭ rasijskaje vojska. Rasijskija ŭłady paśladoŭna paharšajuć umovy ŭtrymańnia i dajuć źniavolenym iluziju mahčymaści chutkaj svabody praz udzieł u vajnie suprać Ukrainy — heta masavaja źjava. Biełaruskija ŭłady nijak nie pieraškadžajuć Rasii vierbavać svaich hramadzian na harantavanuju śmierć.

Voś i Hlebu, jak i absalutnaj bolšaści, nie pašancavała — zamiest chutkaj svabody jon źnik bieź źviestak amal adrazu ž paśla adpraŭki na front.

Apošni raz Hleb Jemialjanienkaŭ vychodziŭ na suviaź z rodnymi 10 maja 2026 hoda z Charkaŭskaha kirunku. Va ŭkrainskim pałonie jon tak i nie abjaviŭsia, ale trup biełarusa pakul nie znajšli.

• 4
• 0
• 2
• 1
• 0
• 0
• 0
• 0