Baraŭlany zastalisia biez vady. Spačatku źnikła śviatło, a ciapier z kranaŭ ciače štości dziŭnaje
Jašče adzin kamunalny kałaps, hetym razam pad Minskam.
U noč na 26 vieraśnia ŭ Baraŭlanskim sielsaviecie źnikła śviatło. Paśla hetaha miascovyja žychary stali masava skardzicca na vadu. Z kranaŭ paciakło niešta niezrazumiełaje: vada pa kolery była padobnaja da čornaj harbaty, dy jašče i z prymieśsiu piasku.
Akazałasia, adklučeńnie elektryčnaści, jakoje doŭžyłasia ŭsiaho 23 chviliny i zakranuła ŭsie 5 śvidravin i 3 pompavyja stancyi Vodakanała Minskaha rajona, paciahnuła za saboj surjoznyja prablemy, jakija nie mohuć vyrašyć dahetul, piša «Minskaja praŭda».
Elektryčnaść adklučałasia ŭ Baraŭlanach, Laskoŭcy i Valarjanavie. Ranicaj žychary Baraŭlanaŭ nie zmahli pačyścić zuby i zakipiacić vady na harbatu. Tamu što vada akazałasia žachlivaj jakaści.
Ciapier śpiecyjalisty pralivajuć sistemu. Unačy byli adkryty pažarnyja hidranty dla pralivu sistemy, kab papiaredzić mahčymy zmyŭ adkładaŭ paśla pierazapusku pompavaj stancyi. Situacyja na pompavaj stancyi na Vasilkovaj była ŭ normie ŭžo da 3 hadzin nočy. Adnak ciapier viaducca raboty pa pramyvańni sietak vysokaha cisku ad stancyi da žyłych damoŭ, i situacyja vypraŭlajecca pastupova.
U domie №31 kropka pakul nie dała stopracentnaha vyniku. Heta halinka, jakaja idzie na vulicu Vasilkovuju.
«Dźvie bryhady pracujuć pa kropkach z 00.17. Usie kiraŭniki na pracy, niahledziačy na vychadnyja, — kaža dyrektar DP «Vodakanał Minskaha rajona» Dźmitryj Drozd. — Na hety momant dźvie avaryjnyja bryhady ažyćciaŭlajuć praliŭ vadavodaŭ da poŭnaha aśviatleńnia. U reziervuarach na NS-2 vada ŭ normie, zapas kala 500 kuboŭ, papaŭnieńnie pieravyšaje razbor. Tamu pahrozy pakinuć usich biez vady niama. Paśla aśviatleńnia vady ŭ centralnych sietkach budziem kropkava pracavać pa damach. Trymajem suviaź sa staršyniami TS i PŽSK».
Dla žycharoŭ Baraŭlanaŭ na vulicu vyvieli cysternu ź pitnoj vadoj. Z 9 ranicy aŭtacysterna kursiruje pa prablemnych učastkach. Ranicaj jana stajała na vulicy 40 hadoŭ Pieramohi, ciapier — na Vasilkovaj.
Žychary mohuć pakidać zajaŭki na vadu. Dadatkova kamunalniki padrychtavali 5 punktaŭ razdačy vady — kala damoŭ pastaviać kuby, kožny na tonu.
Biełaruskija repietytary ŭ panicy: praz prablemy «Jandeksa» jany mohuć stracić materyjały, jakija napracoŭvali hadami27
Kamientary