U ES zaćvierdzili novyja pravy avijapasažyraŭ. Šmat čaho vy daŭno čakali

Jeŭrapiejski parłamient zaćvierdziŭ novy rehłamient pravoŭ avijapasažyraŭ, jaki zamienić praviły 2004 hoda. Dalej novaŭviadzieńni aficyjna zaćvierdzić Rada ES.

Hałoŭnyja źmieny dla pasažyraŭ

Ručny bahaž. Uvodzicca prava biaspłatna brać na bort adnu adzinku ručnoj pakłažy (uklučajučy čamadan na kołach). Pry hetym adziny standart ich pamieraŭ uzhadnić nie ŭdałosia.

Avijakampanii abaviazany pakazvać košt kvitka z ulikam ručnoj kładzi adrazu pry braniravańni. Z-za hetaha mahčymaje padaražańnie biletaŭ, ale zastanucca tańniejšyja taryfy dla tych, chto lacić uvohule biez bahažu.

Pasažyry zachoŭvajuć prava ŭ vypadku zatrymki rejsa bolš jak na try hadziny abo jaho admieny ŭ apošni momant atrymać viartańnie hrošaj abo praciahnuć pajezdku pa alternatyŭnym maršrucie, a taksama atrymać kampiensacyju.

Kampiensacyi za zatrymki i admieny (ad 3 hadzin):

€250 — na rejsy da 1500 km;

€400 — ad 1500 da 3500 km;

€600 — zvyš 3500 km (moža być źmienšana na 50%, kali prapanavany alternatyŭny rejs ci zatrymka mienš za 4 hadziny).

Terminy razhladu: kampanii pavinny za 4 dni paviedamić, jak padać na kampiensacyju. U pasažyra jość 9 miesiacaŭ na padaču zajavy, u avijakampanii — 30 dzion na vypłatu abo admovu.

Kampiensacyi nie vypłočvajucca pry stychijnych biedstvach, drennym nadvorji, vojnach, strajkach supracoŭnikaŭ aeraportaŭ i ahresii pasažyraŭ. Techničnyja niaspraŭnaści samalota bolš nie źjaŭlajucca adhavorkaj dla avijakampanij.

Pry zatrymcy ad 2 hadzin pavinny vydać napoi, ad 3 hadzin — charčavańnie, pry praciahłaj zatrymcy — zabiaśpiečyć haścinicu (da 3 načej).

Biaspłatnyja pasłuhi. Razdrukoŭka pasadačnaha tałona ŭ aeraporcie (kali pasažyr užo zarehistravany).

Vykarystańnie samastojna razdrukavanaha kvitka.

Vypraŭleńnie pamyłak u napisańni imia ŭ bilecie.

Sumiesnaje raźmiaščeńnie ŭ sałonie dla siemjaŭ ź dziećmi da 14 hadoŭ, ciažarnych i ludziej ź invalidnaściu (miesca pobač z supravadžajučym dajecca biaspłatna).

Inšyja pravy. Zabaroniena anulavać zvarotny bilet abo nastupnyja siehmienty rejsa, kali pasažyr nie źjaviŭsia na pieršy etap pieralotu.

Bolš nie patrabujecca abaviazkova mieć mabilnuju prahramu ci akaŭnt avijakampanii.

Praviły raspaŭsiudžvajucca na ŭsie rejsy ŭnutry ES, rejsy jeŭrapiejskich kampanij u/z trecich krain, a taksama na rejsy zamiežnych avijakampanij, jakija vylatajuć z aeraportaŭ ES.

• 45
• 1
• 1
• 1
• 0
• 0
• 0
• 0