Załužny: Nie varta ličyć, što Rasija ŭžo prajhrała vajnu

Jak adznačaje Załužny ŭ svaim artykule na staronkach The Telegraph, «sučasnaja vajna bolš nie ŭznaharodžvaje za taktyčnyja pieramohi tak, jak heta było raniej». Raźvićcio bieśpiłotnikaŭ, vysokadakładnych srodkaŭ paražeńnia i sistem nazirańnia zrabiła maštabnyja praryvy nadzvyčaj składanymi dla abodvuch bakoŭ. Tamu vajna pieratvaryłasia ŭ źniasilvajučaje supraćstajańnie, dzie «pośpiech na poli boju vymiarajecca mietrami, a nie milami, i časta canoj, jakaja nie maje amal nijakaha dačynieńnia da jahonaj stratehičnaj kaštoŭnaści».

Na pohlad Załužnaha, heta datyčycca i ŭdaraŭ Ukrainy pa rasijskaj łahistycy i krytyčnaj infrastruktury. Takija ataki sapraŭdy stvarajuć prablemy dla Maskvy, adnak jany patrabujuć składanych technałohij i značnych zatrat. Pry hetym Rasija taksama zachoŭvaje mahčymaść nanosić udary ŭ adkaz, tamu nivodny z bakoŭ nie moža raźličvać, što mienavita takaja taktyka pryniasie vyrašalnuju pieramohu.

«Situacyja na poli boju dasiahnuła stanu, blizkaha da raŭnavahi. Rasii nie chapaje vajennaj mocy, kab całkam zavajavać Ukrainu. U svaju čarhu, Ukraina na hety momant nie vałodaje resursami dla vyzvaleńnia ŭsich akupavanych terytoryj vyklučna siłaj. Vajenny bałans pieratvaryŭsia ŭ stan «uzajemnaha admaŭleńnia», a nie rašučaj pieramohi», — kanstatuje Załužny.

Vynik vajny zaležyć nie tolki ad situacyi na froncie

Razvažajučy pra toje, ci možna ličyć Rasiju pieramožanaj, Załužny prapanuje adroźnivać nievykanańnie pieršapačatkovych palityčnych metaŭ ad sapraŭdnaj parazy. Pavodle jaho, Kreml sapraŭdy nie zdoleŭ realizavać svaje asnoŭnyja zadumy, adnak praciahvaje vieści vajnu, kantraluje značnuju častku ŭkrainskaj terytoryi i nie demanstruje hatoŭnaści spynić bajavyja dziejańni na ŭmovach, jakija aznačali b pryznańnie parazy.

Razam z tym Załužny pakazvaje na chistkaść pazicyi Ukrainy, jakaja zastajecca hłyboka zaležnaj ad finansavaj dapamohi, pastavak uzbrajeńniaŭ i sučasnych technałohij z boku zachodnich partnioraŭ, pry hetym sutykajučysia z unutranymi prablemami.

Jak davodzić Załužny, Maskva ŭsio bolš robić staŭku nie na chutkija nastupalnyja apieracyi, a na pastupovaje ekanamičnaje, vajennaje i psichałahičnaje źniasileńnie Ukrainy.

«Rasija ŭsio jašče vałodaje hłybiejšymi reziervami žyvoj siły i pramysłovymi mahutnaściami ŭ šerahu krytyčnych siektaraŭ, uklučajučy vytvorčaść balistyčnych rakiet. Sama pa sabie supraćpavietranaja abarona nie moža całkam nivielavać hetuju pieravahu», — piša były hałoŭnakamandujučy.

Załužny padkreślivaje, što zdolnaść Ukrainy praciahvać supraciŭleńnie ŭ značnaj stupieni zaležyć ad dapamohi sajuźnikaŭ.

«Palityčnyja źmieny ŭ Vašynhtonie i zachavańnie roznahałośsiaŭ u Jeŭropie sparadžajuć zakanamiernyja pytańni ab tym, ci ŭdasca zachavać ciapierašni ŭzrovień padtrymki na niavyznačany termin. Dypłamatyčnyja samity i staranna vyvieranyja demanstracyi salidarnaści majuć simvaličnaje značeńnie. Ale jany nie zaŭsiody transfarmujucca ŭ tryvałuju palityčnuju jednaść, nieabchodnuju dla praciahłaha supraćstajańnia z Rasijaj», — papiaredžvaje Załužny.

U suviazi z hetym jon prapanuje aceńvać chod vajny nie tolki pavodle situacyi na froncie. Jon ličyć, što siońnia nie mienš važnymi stali łahistyka, vytvorčyja mahčymaści, stan krytyčnaj infrastruktury, efiektyŭnaść supraćpavietranaj abarony i zdolnaść hramadstva vytrymlivać praciahły kanflikt.

U jakaści prykładu jon pryvodzić suchaputny kalidor pamiž Rasijaj i Krymam. Kali raniej hety maršrut ličyŭsia adnym z hałoŭnych stratehičnych dasiahnieńniaŭ Maskvy, to raźvićcio dalnabojnych srodkaŭ paražeńnia i bieśpiłotnikaŭ, pavodle jaho acenki, istotna źniziła jaho značeńnie.

«Deficyt paliva i pieraboi z hramadzianskim zabieśpiačeńniem ilustrujuć, što fizičnaja akupacyja bolš nie harantuje stratehičnaj biaśpieki», — davodzić były hałoŭnakamandujučy.

Pavodle Załužnaha, heta moža ŭmacavać pazicyi Ukrainy na budučych pieramovach, ale nie likviduje pahrozy dla samoj krainy, bo rasijskija ŭdary pa ŭkrainskich haradach i abjektach krytyčnaj infrastruktury buduć praciahvacca. Tamu raźvićcio supraćpavietranaj abarony i pavyšeńnie ŭstojlivaści hramadzianskaj infrastruktury zastajucca nie mienš važnymi, čym pośpiechi niepasredna na froncie.

«Vyrašalnaje pytańnie nie ŭ tym, chto zachopić nastupnuju viosku ci źniščyć nastupny skład bojeprypasaŭ. Pytańnie ŭ tym, jakoje hramadstva zdoleje i dalej nieści ekanamičny, vajenny i psichałahičny ciažar praciahłaha kanfliktu, zachoŭvajučy pry hetym mižnarodnuju padtrymku, nieabchodnuju dla vyžyvańnia», — ličyć Załužny.

NATA pavinna adaptavacca da vojnaŭ XXI stahodździa

Naprykancy Załužny źviartajecca da roli NATA. Na jaho dumku, «vajna va Ukrainie ahaliła niazručnyja pytańni ab tym, ci hatovy Aljans da kanfliktaŭ XXI stahodździa».

Były hałoŭnakamandujučy ličyć, što arhanizacyja, stvoranaja dla realij Chałodnaj vajny, zastajecca ŭ pałonie pryncypu «paźbiahańnia eskałacyi», što nie całkam adpaviadaje sučasnym vyklikam. Jon śćviardžaje, što architektura biaśpieki pavinna być aryjentavanaja nie tolki na kiravańnie kryzisami, ale i na farmiravańnie stratehičnych vynikaŭ.

Pavodle Załužnaha, raźvićcio bieśpiłotnikaŭ, vysokadakładnaj zbroi, kibiervajny i imklivy technałahičny prahres patrabujuć novaha padychodu da strymlivańnia i kalektyŭnaj abarony.

U zaviaršeńnie artykuła Załužny adznačaje, što budučynia biaśpieki Jeŭropy budzie zaležać nie tolki ad tych, chto hatovy abaraniać siabie, ale i ad tych, chto zdoleje prapanavać novaje stratehičnaje bačańnie dla kantynienta.

«Ukraina dakazała, što hatovaja da pieršaha. Pytańnie, jakoje zastajecca adkrytym: chto hatovy da druhoha?» — piša jon.

• 30
• 0
• 1
• 0
• 1
• 1
• 0
• 0