U Breście aburajucca, što centr horada ŭ hadziny pik byŭ paralizavany chresnym chodam
U Breście 18 vieraśnia prachodziŭ Chresny chod u honar pravasłaŭnaha śviatoha Afanasija Bresckaha. Anons pra mierapryjemstva źjaviŭsia za dva dni da padziei ŭ telehram-kanale «Lubimy Brest», dzie paviedamlałasia, što z 7:30 da 9:30 buduć pierakrytyja hałoŭnyja vulicy i praśpiekty horada, piša BG.Media.
Mnohija haradžanie nie paśpieli ŭbačyć heta paviedamleńnie, tamu ranicaj sotni ludziej sutyknulisia ź vialikimi zatorami: aŭtobusy stajali, mašyny buksavali ŭ korkach, mnohija spaźnilisia na pracu.
Maršrut chresnaha chodu prachodziŭ ad Simiaonaŭskaha kafiedralnaha sabora da Afanasijeŭskaha mužčynskaha manastyra, i pakul jaho ŭdzielniki išli z abrazami, centr horada litaralna zamior.
U sacyjalnych sietkach haradžanie aktyŭna dzialilisia svaim abureńniem. Ludzi adznačali, što mierapryjemstva pravodzicca ŭ hadziny pik, kali ŭsie jeduć na pracu, u škoły i sadki, i nazyvali arhanizacyju chaatyčnaj i niazručnaj.
Byli i tyja, chto abaraniaŭ chresny chod, nahadvajučy, što heta dzień pamiaci śviatoha Afanasija, a ŭdzielniki iduć na nabaženstva, a nie na zabaŭlalnuju prahułku. Niekatoryja zaklikali nie krytykavać viernikaŭ i ŭsprymać chod jak važny duchoŭny momant.
Ale vopyt minułych hadoŭ śviedčyć, što praviadzieńnie padobnych šeściaŭ u pracoŭny čas zaŭsiody pryvodzić da transpartnych kałapsaŭ. U 2024 hodzie situacyja była padobnaj: centralnyja vulicy pierakryvali, a tysiačy ludziej spaźnilisia na pracu i vučobu.
Kamientary