Tramp blizki da taho, kab abviaścić pra spynieńnie jašče adnoj vajny

Pieramovy pamiž Damaskam i Tel-Avivam iduć užo niekatory čas, i ŭ čaćvier delehacyi bakoŭ sustrakajucca ŭ Baku dla novaha raŭnda. Pa danych vydańnia Sky News Arabia, na hetym etapie budzie razhledžanaja prapanova Izraila ab pahadnieńni pra bufiernuju zonu na ŭzor mirnaj damovy ź Jehiptam 1979 hoda.

Pa sutnaści heta aznačaje, što Izrail prapanuje padzialić terytoryju na paŭdniovy zachad ad Damaska da izrailskaj miažy na try zony z roznymi abmiežavańniami na raźmiaščeńnie vojskaŭ i ŭzbrajeńniaŭ.

Pavodle źviestak krynic, blizkich da pieramoŭ, na jakija spasyłajecca Al Jazeera, płan taksama praduhledžvaje pašyreńnie najaŭnaj bufiernaj zony na dva kiłamietry ź siryjskaha boku. U pałasie, niepasredna prylehłaj da izrailskaj miažy, siryjskamu boku budzie zabaroniena raźmiaščać ciažkaje ŭzbrajeńnie i avijacyju, ale hetuju zonu zmohuć achoŭvać palicejskija i padraździaleńni ŭnutranaj biaśpieki. Uvieś paŭdniova-zachodni siektar Siryi pavinien stać biespalotnaj zonaj dla siryjskaj avijacyi, paviedamlajuć krynicy.

Uzamien Izrail prapanuje paetapny vyvad vojskaŭ z terytoryj, akupavanych im u apošnija miesiacy, ale nastojvaje na zachavańni svajoj prysutnaści na hary Chiermon.

Pa danych krynic vydańnia Axios, dla Izraila adnym z najvažniejšych pytańniaŭ na pieramovach źjaŭlajecca zachavańnie mahčymaści vykarystoŭvać pavietranuju prastoru Siryi ŭ jakaści kalidora dla patencyjnych udaraŭ pa Iranie.

Damask pakul nie daŭ aficyjnaha adkazu, ale, jak zajaviŭ u čaćvier ahienctvu AFP siryjski čynoŭnik na ŭmovach ananimnaści, «u pieramovach ź Izrailem nazirajecca prahres».

Taksama Siryja rychtuje sustrečnuju prapanovu. Čakajecca, što, jak tolki jana pastupić, jaje buduć abmiarkoŭvać ministr zamiežnych spraŭ Siryi Asad Al-Šybani i izrailski ministr stratehičnaha płanavańnia Ron Dermier razam sa śpiecpradstaŭnikom ZŠA Tomam Barakam padčas ich treciaj trochbakovaj sustrečy.

Śpiecprajekt Trampa

Jašče niadaŭna lubyja pieramovy pamiž Izrailem i Siryjaj zdavalisia niemahčymymi.

Tolki za pieršy tydzień paśla padzieńnia režymu Bašara Asada Izrail nanios amal 500 udaraŭ z pavietra, mora i z sušy pa vajskovych abjektach na ŭsioj terytoryi Siryi. Pa danych izrailskaha kamandavańnia, usiaho za dva dni było źniščana kala 80% siryjskaha vajskovaha patencyjału. Heta była izrailskaja apieracyja na apiaredžańnie: kiraŭnictva krainy chacieła praduchilić pierachod siryjskaha arsienała ŭ ruki paŭstancaŭ, jakich u toj momant uznačalvaŭ ciapierašni časovy prezident Achmied aš-Šaraa.

Tady ž CACHAŁ vysunuŭ svaje vojski ŭhłyb demilitaryzavanaj bufiernaj zony, stvoranaj u rajonie akupavanych Hałanskich vyšyń pad kantrolem AAN paśla Šaścidzionnaj vajny 1967 hoda.

Premjer-ministr Izraila Bińjamin Nietańjachu ŭ pieršyja ž dni prychodu paŭstancaŭ da ŭłady zajaviŭ, što pahadnieńnie ab raźmiežavańni, zaklučanaje pamiž Izrailem i Siryjaj u 1974 hodzie, bolš nie dziejničaje. Heta aznačała, što ŭ novaj realnaści Izrail raźviazvaje sabie ruki ŭ pytańniach abarony svaich miežaŭ.

Izrail ličyŭ novyja siryjskija ŭłady niepradkazalnymi, asabliva z ulikam taho, što šerah paŭstanckich hrupovak, jakija ŭdzielničali ŭ źviaržeńni Asada, i sam aš-Šaraa byli źviazany z džychadzistami. Usio heta adbyvałasia ŭ lutym 2024 hoda, a ŭ lipieni 2025‑ha Izrail nanosiŭ udary pa siryjskich uradavych vojskach u Suviejdzie dla abarony druzaŭ.

Pavodle źviestak krynic, biez umiašańnia Vašynhtona nivodzin z bakoŭ, chutčej za ŭsio, nie inicyjavaŭ by zbližeńnie ci chacia b supracoŭnictva ŭ halinie biaśpieki.

Izrail siłavymi sposabami damohsia prymalnaha dla siabie raskładu sił pablizu svaich miežaŭ i nie śpiašaŭsia naładžvać dypłamatyčnyja kanały, a Siryja nie chacieła psavać adnosiny z važnym dla siabie sajuźnikam Turcyjaj, jakaja kančatkova pasvaryłasia ź Izrailem.

Ale, jak paviedamlajuć krynicy, dla Donalda Trampa ź jaho ambicyjnym blizkaŭschodnim paradkam dnia heta było važnaje pytańnie. Jaho administracyja śpiašajecca damahčysia dastatkovaha prahresu ŭ siryjska-izrailskich pieramovach da pačatku Hienasamblei AAN, jakaja adkryjecca ŭ kancy vieraśnia.

Prezident ZŠA choča mieć padstavy paviedamić suśvietnym lidaram pra praryŭ, jaki adbyŭsia ź jaho dapamohaj, i navat ścipłaje pahadnieńnie bakoŭ było b dla jaho vialikim dasiahnieńniem, skazali ahienctvu Reuters adrazu niekalki krynic u Vašynhtonie.

18 vieraśnia ministr zamiežnych spraŭ Siryi Asad al-Šybani pavinien prybyć u Vašynhton ź pieršym aficyjnym vizitam paśla prychodu da ŭłady novych siryjskich uładaŭ. Jon stanie pieršym kiraŭnikom MZS Siryi, jaki naviedaŭ ZŠA za bolš čym 25 hadoŭ. Čakajecca, što al-Šybani sustreniecca z amierykanskimi zakanadaŭcami, kab abmierkavać źniaćcie rešty sankcyj ZŠA ŭ dačynieńni da jaho krainy.

• 4
• 0
• 0
• 1
• 0
• 0
• 0
• 0