«Tyranija znoŭ pahražaje Jeŭropie». U Łondanie adbyŭsia bankiet u honar Donalda Trampa
U sieradu, u pieršy dzień vizitu, Trampa z žonkaj prymali ŭ Vindzarskim zamku karol Karł III z žonkaj karalevaj Kamiłaj, piša Bi-bi-si.
Padčas uračystaj cyrymonii, pierad tym jak haspadary i hości prajšli ŭnutr pałaca, prezidenta ZŠA vitali 1300 vajskoŭcaŭ armii, Karaleŭskaha fłotu i Karaleŭskich VPS.
Paśla pryvatnaha abiedu prezident Tramp i Miełanija pajechali ŭ kaplicu Śviatoha Hieorhija, dzie pachavanaja karaleva Lizavieta II, addać joj daninu pavahi, dy ŭskłali vianok. Tam ich sustreŭ dekan Vindzara, śviatar Krystafier Kaksvort, i pravioŭ im nievialikuju ekskursiju pa kaplicy, dzie, akramia Lizaviety II, pachavanyja inšyja brytanskija manarchi.
U druhoj pałovie dnia adbyŭsia palot źniščalnikaŭ F-35 i piłatažnaj hrupy Karaleŭskich VPS «Čyrvonyja streły» nad Vindzaram. Razam z Trampam za hetym naziraŭ premjer-ministr Brytanii Kir Starmier.
Centralnaj padziejaj dziaržaŭnaha vizitu staŭ hrandyjozny bankiet u zale Śviatoha Hieorhija viečaram, padčas jakoha Karł III i Donald Tramp vystupili z karotkimi pramovami. U mieniu byli stravy brytanskaj i amierykanskaj kuchni.
Karol šmat havaryŭ pra daŭniuju ahulnuju historyju Vialikabrytanii i ZŠA (nie pramaŭčaŭ pra Vajnu za niezaležnaść paŭnočnaamierykanskich kałonij u XVIII stahodździ) i raspavioŭ pra novuju eru ich partniorstva.
«Siońnia, kali tyranija znoŭ pahražaje Jeŭropie, my i našy sajuźniki staim razam u padtrymku Ukrainy, kab strymać ahresiju i damahčysia miru», — skazaŭ manarch.
U kancy vystupleńnia jon prapanavaŭ tost za prezidenta Trampa. 160 haściej stojačy słuchali amierykanski himn.
Śledam za hetym Donald Tramp, apranuty ŭ frak, biełuju kamizelku i bieły halštuk-miatlik, pračytaŭ niekalki staronak tekstu, u jakim bahata pieraličvaŭ dasiahnieńni brytanskaj kultury i cyvilizacyi. Jon amal nie zakranaŭ padziejaŭ siońniašniaha dnia, tolki zhadaŭ, što «hod tamu» (pry papiaredniaj administracyi) Złučanyja Štaty byli «vielmi chvoraj» krainaj.
«Siońnia my pavinny abaraniać vyklučnuju spadčynu, jakaja robić nas tymi, chto my jość, i my pavinny praciahvać adstojvać kaštoŭnaści i narody anhłamoŭnaha śvietu, i sapraŭdy ich adstojvajem», — skazaŭ u zaviaršeńnie amierykanski prezident, prapanavaŭšy zatym tost za karala.
Dniom u centry Łondana sabrałasia vialikaja hrupa pratestoŭcaŭ suprać Donalda Trampa.
Hetaja akcyja pratestu arhanizavanaja kaalicyjaj Stop Trump UK, jakaja abjadnoŭvaje bolš za 50 arhanizacyj, u tym liku klimatyčnych, antyrasisckich i prapaleścinskich aktyvistaŭ. Zoi Hardnier, palityčny ahladalnik i adna z arhanizatarak akcyi, kaža, što Tramp «asablaje ŭsio, što my nienavidzim».
«My chočam, kab naš urad prajaviŭ ćviordaść charaktaru, trochi honaru i vykazaŭ hłybokaje pačućcio ahidy da palityki Donalda Trampa ŭ Vialikabrytanii», — skazała jana ŭ kamientary Bi-bi-si.
Ciapier čytajuć
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa65
Kamientary