Prezident ZŠA Donald Tramp nie handluje ŭkrainskimi terytoryjami, a pytańnie adnosna terytaryjalnych sastupak mohuć vyrašać tolki ŭkrainskija ŭłady. Ale Ukraina budzie vymušanaja pryznać de-fakta akupacyju terytoryj. Pra heta ŭ intervju The Telegraph zajaviŭ śpiecpradstaŭnik prezidenta ZŠA pa pytańniach Ukrainy Kit Kiełah, piša «Suśpilnie».
Na pytańnie, ci pryjdziecca Ukrainie admovicca ad častki svajoj terytoryi dziela miru, hienierał padkreśliŭ, što lubyja takija rašeńni prymaje vyklučna Ukraina.
«Tramp nie handluje ŭkrainskaj ziamloj. Heta mandat Zialenskaha. Ničyjo bolš rašeńnie. Ale davajcie budziem realistami: Danieck akupavany na 65 pracentaŭ. Łuhansk — na 98 pracentaŭ. Vy pavinny pryniać realnaść. De-fakta nie aznačaje de-jure», — skazaŭ hienierał.
Kit Kiełah uspomniŭ historyju krain Bałtyi, akupacyju jakich Savieckim Sajuzam ZŠA nie pryznavali.
«My nikoli nie pryznavali savieckaha kantrolu nad Bałtykaj, choć de-fakta jany byli častkaj SSSR. Heta było zroblena ŭ adpaviednaści z daktrynaj Uełsa. Toje ž samaje i tut», — skazaŭ jon.
Kiełah spasłaŭsia na dekłaracyju Uełsa 1940 hoda — dypłamatyčnuju zajavu tahačasnaha dziaržaŭnaha sakratara ZŠA Samniera Uełsa, u jakoj toj admaŭlaŭsia pryznavać hvałtoŭnuju anieksiju Savieckim Sajuzam Estonii, Litvy i Łatvii, padtrymlivajučy pryncyp niepryznańnia terytaryjalnych źmienaŭ siłaj. Hetaja palityka abaraniała ekanamičnyja aktyvy bałtyjskich dziaržaŭ i była nakiravanaja na sadziejničańnie ich viartańniu da niezaležnaści paśla zakančeńnia akupacyi.
Hienierał Kiełah zaklikaŭ Ukrainu hladzieć u budučyniu:
«Časam karotkaterminovaja realnaść nie adpaviadaje vašaj mecie. Mahčyma, vam daviadziecca pryznać akupavanuju terytoryju ciapier, ale ŭ doŭhaterminovaj pierśpiektyvie jaje možna viarnuć. Hulajcie ŭ doŭhaterminovuju hulniu».
Jon taksama zajaviŭ, što Pucin imkniecca akupavać Danbas, a taksama Chiersonskuju i Zaparožskuju vobłaści.
«Pucin dakładna budzie imknucca zachapić usiu Danieckuju i Łuhanskuju terytoryi. Nastupnymi mohuć być paŭdniovyja vobłaści — Chiersonskaja i Zaparožskaja. Ale z taho, što my bačyli da hetaha času, ich možna ŭziać tolki dziujm za dziujmam, i straty buduć vielizarnymi», — skazaŭ Kit Kiełah.
Kamientujučy zajavy Trampa, jaki davaŭ Pucinu prynamsi čatyry dvuchtydniovyja terminy dla dasiahnieńnia miru, inakš abiacaŭ nastupstvy, a potym mała što zrabiŭ ci ničoha nie zrabiŭ dla ich paćviardžeńnia, Kiełah patłumačyŭ situacyju namieram prezidenta ZŠA «dać dypłamatyi ŭsie šancy».
«Tramp sprabuje dać dypłamatyi ŭsie šancy. Jon skazaŭ, što moža spynić vajnu za 24 hadziny… Jon chutka zrazumieŭ, što heta składaniej, čym čakałasia — asoby majuć značeńnie. Ukraincy hatovyja da pahadnieńnia, ale Pucin — nie. Jaho [Pucina] uvodziać u zman. Jon, na žal, dumaje, što vyjhraje hetuju vajnu, ale heta nie tak. Tak što Tramp prosta daje jamu svabodu dziejańniaŭ i čas sieści za stoł pieramoŭ, ale my ŭsio jašče trymajem karty ŭ rukach», — skazaŭ jon.
Hienierał ličyć siabie aptymistam i vieryć, što mirnaje pahadnieńnie moža być dasiahnuta i budzie dasiahnuta. Adnak, u adroźnieńnie ad Donalda Trampa, jon paličyŭ by za lepšaje bačyć spynieńnie ahniu pierad hruntoŭnymi mirnymi pieramovami. Jon vyrazna patłumačyŭ paśladoŭnaść dziejańniaŭ:
«Biez spynieńnia ahniu vielmi ciažka dasiahnuć miru. Pucin ličyć, što pieramahaje, tamu pakul nie zhadžajecca na mir. Tramp pieršapačatkova addaje pieravahu mirnym pieramovam. Ja ž addaju pieravahu spačatku spynieńniu ahniu, tamu što jak tolki jon spyniajecca, jaho ciažka adnavić».
Ciapier čytajuć
Stali viadomyja novyja detali ŭ maštabnaj spravie arhanizataraŭ kancertaŭ4
Kamientary
1.Jany byli zachoplenyja całkam, ichnyja armii byli razzbrojeny, a ŭrady źniščany albo evakujavalisia.
2.Nichto nie płanavaŭ im surjozna dapamahać, asabliva z ulikam taho, jak Zachad tolki što "dapamoh" Polščy suprać Hitlera i Stalina.
3.Paśla stvareńnia antyhitleraŭskaj kaalicyi i pieramohi nad nacystami pytańnie adkrytaj kanfrantacyi z saŭkom dziela vyzvaleńnia bałtyjskich krain uvohule straciła aktualnaść dla zachadu.
De-fakta Tramp i ŭsia jahonaja chieŭra razam z Kiełaham nie bolš jak całkam biezdapamožnyja palityčnyja impatenty.
De-fakta Kiełah anansuje realizacyju chvorych pucinskich mrojaŭ - adnaŭleńnie SSSR.
Rozumu chapiła tolki kab pucinskuju ahresiju 2025 hoda ŭzakonić de-fakta stalinskaj ahresijaj 1940 hoda.
"Pahladzicie jak miła - naš sienatar zrabiŭ kłasnuju zajavu ŭ 1940 hodzie!"
Dziŭna, što nie abasnavaŭ vydumkami pra Ruryka i Lenina.
Amieryki zastałosia na try dni.
Ŭžo siońnia z ZŠA možna śmieła vić viaroŭki, jak robić Izrail, i adnačasova možna śmieła vycirać nohi, jak robiać i Si, i Pucin, i Łukašenka.