Navukoŭcy znajšli samyja staražytnyja prykłady mumifikacyi čałaviečych ciełaŭ. Jany sušylisia dymam
Navukoŭcy znajšli samyja staražytnyja śviedčańni čałaviečaj mumifikacyi, uzrost jakich składaje kala 14 tysiač hadoŭ. Heta amal udvaja starej za ŭsie raniej viadomyja prykłady. Daśledavańnie, apublikavanaje ŭ aŭtarytetnym časopisie PNAS, zaśviedčyła, što ludzi ŭ Paŭdniova-Uschodniaj Azii ŭžo ŭ palealicie mieli składanuju praktyku padrychtoŭki ciełaŭ pamierłych da pachavańnia, piša CNN.
Dla daśledavańnia byli praanalizavanyja 54 pachavańni, znojdzienyja na 11 archieałahičnych pomnikach u paŭdniovym Kitai, paŭnočnym Vjetnamie i na indaniezijskim vostravie Sumatra. Asablivaściu hetych pachavańniaŭ stali niezvyčajnyja pozy ciełaŭ — ludzi byli pachavanyja stojačy na kukiškach, što vyhladała anatamična niemahčymym. Heta dało padstavy mierkavać, što da pachavańnia cieły niejak śpiecyjalna apracoŭvalisia.
Dalejšy analiz kostak pakazaŭ prykmiety ŭździejańnia na ich ciapła. U mnohich vypadkach byli zaŭvažanyja abvuhlenyja ŭčastki na łokciach, čerapie i nižnich kaniečnaściach. Pry hetym uvieś škilet nie byŭ paškodžany ahniom, tamu viersiju pra kremacyju daśledčyki vyklučyli. Pry mikraskapičnym vyvučeńni vyśvietliłasia, što kala 84% kostak źmianili svaju mikrastrukturu pad uździejańniem nizkatempieraturnaha nahrevu.
Na padstavie hetych danych navukoŭcy pryjšli da vysnovy, što staražytnyja ludzi vykarystoŭvali techniku padsušvańnia ciełaŭ dymam. Cieła źmiaščali ŭ sahnutaj pozie nad ahniom, jaki hareŭ pry nizkaj tempieratury, i dym pastupova vydalaŭ vilhać z tkanak. Paśla hetaha vysušanyja pareštki pieranosili da miesca pachavańnia. Tak cieły faktyčna mumifikavalisia.
Najstaražytniejšy prykład byŭ vyjaŭleny ŭ Paŭnočnym Vjetnamie — heta kostka ruki, uzrost jakoj aceńvajecca prykładna ŭ 14 tysiač hadoŭ. Inšyja pachavańni, datavanyja ad 12 da 4 tysiač hadoŭ tamu, śviedčać, što hetaja praktyka praciahvałasia tysiačahodździami ŭ roznych rehijonach Paŭdniova-Uschodniaj Azii.
Da hetaha času samym staražytnym prykładam mumifikacyi ličylisia mumii kultury Čynčora ŭ Čyli, jakim kala 7 tysiač hadoŭ, i prykłady ź Jehipta ŭzrostam kala 4,5 tysiač hadoŭ. Novaja znachodka amal udvaja starejšaja i pakazvaje, što techniki apracoŭki ciełaŭ mahli ŭźniknuć značna raniej, čym ličyłasia dahetul.
Daśledčyki padkreślivajuć, što hetaja praktyka adlustroŭvaje ŭnikalnaje spałučeńnie techniki, tradycyj i vieravańniaŭ staražytnych supolnaściaŭ Paŭdniova-Uschodniaj Azii. Cikava, što anałahičny mietad — padsušvańnie ciełaŭ dymam — i siońnia zastajecca častkaj tradycyjnych abradaŭ u Papua — Novaj Hviniei.
U Jehipcie ŭpieršyniu za stahodździe znoŭ znajšli hrabnicu faraona
U Mieksicy ŭfołah pakazaŭ cieły «pryšelcaŭ», jakim moža być 1000 hadoŭ
Navukoŭcy: eŭtanazija, mahčyma, isnavała ŭ impieryi inkaŭ
Navukoŭcy zdoleli ŭznavić abličča faraona Amienchatepa I
Navukoŭcy raskryli tajamnicu śmierci «mumii, jakaja kryčyć»
Kamientary
'Mumii sušylisia dymam' - jany sami sušylisia, ci ich sušyli?
'Aktyvist nieadnarazova aryštoŭvaŭsia ... zatrymlivaŭsia ... utrymlivaŭsia ŭ ŠYZA ... pryciahvaŭsia' - Dyk jon sam siabie aryštoŭvaŭ, zatrymlivaŭ i t.d.? Ci ŭsio ž niekija asoby jaho zatrymlivali? Nie pazbaŭlajcie viny za hetyja złačynstvy tych, chto jaho zatrymlivaŭ. Nie nadzialajcie ahientnaściu niaščasnuju mumiju, jakuju vendzili suplamieńniki.
[Zredahavana]