Biełarus, jakoha zatrymlivali ŭ Hruzii, atrymaŭ dakumient dla žyćcia tam na hod
Hramadzianin Biełarusi, jakoha raniej zatrymali ŭ Hruzii paśla sproby padać zajavu na atrymańnie prytułku, 7 žniŭnia atrymaŭ dakumient, što dazvalaje jamu lehalna znachodzicca ŭ krainie na praciahu adnaho hoda. Pra heta jon raskazaŭ vydańniu «Pozirk».
Mužčyna, jakoha ŭ materyjale nazyvajuć Michaiłam (imia źmieniena ź mierkavańniaŭ biaśpieki), pierajechaŭ u Hruziju jašče ŭ 2016 hodzie. Jon vučyŭsia ŭ Minskim duchoŭnym vučyliščy i pracavaŭ u carkvie, a ŭ Hruzii staŭ šef-kucharam. Paśla padziej 2020 hoda aktyŭna padtrymlivaŭ pratesty, udzielničaŭ u akcyjach salidarnaści, vioŭ sacsietki.
Paśla taho jak u 2020 hodzie skončyŭsia termin dziejańnia jaho pašparta, Michaił nie zmoh viarnucca ŭ Biełaruś, bo heta było niebiaśpiečna. Jon nie zmoh aformić novy dakumient i doŭhi čas žyŭ u Hruzii bieź lehalnaha statusu. U vyniku, kali jon źviarnuŭsia ŭ mihracyjny departamient, jaho zajavu na prytułak pryniali, ale aformić nie paśpieli — i adrazu paśla vychadu z budynka mužčynu zatrymali.
Michaiła nakiravali ŭ centr dla mihrantaŭ, dzie jon pravioŭ niekalki tydniaŭ u ciažkich umovach. Umiašańnie pravaabaroncy Ramana Kiślaka i advakataŭ dapamahło — jany dakazali, što mužčyna nie parušaŭ zakon i padaŭ zajavu naležnym čynam. Sud vyrašyŭ vyzvalić jaho pad abaviazak rehularna adznačacca ŭ mihracyjnym departamiencie.
Ciapier Michaił maje ID-kartku, jakaja dazvalaje jamu aficyjna pracavać, atrymlivać miedycynskuju dapamohu i navat ustupić u Hruzii ŭ šlub. Adnak miera strymańnia (abaviazak adznačacca) pakul nie źniataja.
Michaił ličyć, što zrabiŭ pamyłku, kali adkłaŭ padaču na prytułak, spadziejučysia, što situacyja ŭ Biełarusi chutka źmienicca. Na žal, hetaha nie adbyłosia. Jon padkreślivaje, što choć ciapier i maje dakumient, situacyja ŭ Hruzii stanovicca ŭsio bolš składanaj dla biełarusaŭ, asabliva z ulikam palityčnaha kursu ŭładaŭ, što padtrymlivajuć Łukašenku i kanfliktujuć z Zachadam.
U Hruzii siońnia žyvie kala 12 tysiač biełarusaŭ, jakija vyjechali ź Biełarusi z-za palityčnaha pieraśledu. Ale hetaja kolkaść pastupova skaračajecca.
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary