Sirata z asablivaściami raźvićcia z Chojnikaŭ akazaŭsia na vajnie suprać Ukrainy. Apiakun kaža, što padmanam
U Biełarusi chłopca pryznali nieprydatnym da vajskovaj słužby, ale heta nie źbiantežyła rasijan, piša «Fłahštok».
Vychavanca dapamožnaj škoły-internata dla dziaciej z asablivaściami raźvićcia Piatra Atroščanku adpravili na vajnu suprać Ukrainy padmannym šlacham, niahledziačy na surjoznyja prablemy sa zdaroŭjem. Prynamsi takuju viersiju padziej raskazaŭ apiakun chłopca.
Atroščanku 27 hadoŭ, jon naradziŭsia ŭ Chojnikach. Jak chłopiec akazaŭsia ŭ Rasii, nieviadoma. Karotka jaho historyju raskazaŭ pryjomny baćka, jaki vykładaŭ videazvarot da Uładzimira Pucina i ministra abarony Rasii Andreja Biełavusava. Heta adbyłosia jašče ŭ listapadzie 2024 hoda.
Pa słovach mužčyny, jon bolš za vosiem hadoŭ haduje chłopca, jaki źjaŭlajecca vychavancam škoły-internata ŭ Homieli, i ŭ jaho adsutnaść «padmannym šlacham» małady čałaviek «papaŭ na SVA»:
«U Biełarusi jon pryznany niahodnym da vajskovaj słužby. Chto, jak i jakim čynam pravioŭ miedycynskuju kamisiju? Mietr vosiemdziesiat siem rostu, vaha piaćdziasiat dva kiłahramy. Chłopiec nieadnarazova lažaŭ u psichijatryčnaj balnicy», — zajaviŭ pryjomny baćka.
Jon adznačyŭ, što źviartaŭsia ŭ rasijskuju Hienprakuraturu i atrymaŭ adtul adpiski. Infarmacyi ab jakoj-niebudź reakcyi na videazvarot u adkrytym dostupie niama. Nieviadoma, ci znachodzicca Atroščanka da hetaha času na vajnie i ŭvohule ci žyvy jon.
Fłahštok znajšoŭ paćvierdžańnie taho, što Piatro Atroščanka sapraŭdy źjaŭlajecca žycharom Chojnikaŭ i tam zarehistravany. Dadzienyja chłopca — z poŭnym supadzieńniem imia i proźvišča i daty naradžeńnia — jość u śpisie ŭliku hramadzian, jakija majuć patrebu ŭ palapšeńni žyllovych umoŭ, Chojnickaha rajvykankama. U tym liku — u apošnim śpisie, pa stanie na 1 maja 2025 hoda. Data pastanoŭki na ŭlik paznačana 2003 hod.
Atroščanka ŭ śpisie abaznačany jak sirata, što stała padstavaj pryniaćcia jaho na ŭlik hramadzian, jakija majuć patrebu ŭ palapšeńni žyllovych umoŭ. Toje, što jaho dadzienyja jość u śviežym śpisie, nie słužyć paćvierdžańniem taho, što chłopiec žyvy — čynoŭniki mahli nie abnavić infarmacyju.
Kamientary