Сірата з асаблівасцямі развіцця з Хойнікаў аказаўся на вайне супраць Украіны. Апякун кажа, што падманам
У Беларусі хлопца прызналі непрыдатным да вайсковай службы, але гэта не збянтэжыла расіян, пiша «Флагшток».
Выхаванца дапаможнай школы-інтэрната для дзяцей з асаблівасцямі развіцця Пятра Атрошчанку адправілі на вайну супраць Украіны падманным шляхам, нягледзячы на сур'ёзныя праблемы са здароўем. Прынамсі такую версію падзей расказаў апякун хлопца.
Атрошчанку 27 гадоў, ён нарадзіўся ў Хойніках. Як хлопец аказаўся ў Расіі, невядома. Каротка яго гісторыю расказаў прыёмны бацька, які выкладаў відэазварот да Уладзіміра Пуціна і міністра абароны Расіі Андрэя Белавусава. Гэта адбылося яшчэ ў лістападзе 2024 года.
Па словах мужчыны, ён больш за восем гадоў гадуе хлопца, які з'яўляецца выхаванцам школы-інтэрната ў Гомелі, і ў яго адсутнасць «падманным шляхам» малады чалавек «папаў на СВА»:
«У Беларусі ён прызнаны нягодным да вайсковай службы. Хто, як і якім чынам правёў медыцынскую камісію? Метр восемдзесят сем росту, вага пяцьдзясят два кілаграмы. Хлопец неаднаразова ляжаў у псіхіятрычнай бальніцы», — заявіў прыёмны бацька.
Ён адзначыў, што звяртаўся ў расійскую Генпракуратуру і атрымаў адтуль адпіскі. Інфармацыі аб якой-небудзь рэакцыі на відэазварот у адкрытым доступе няма. Невядома, ці знаходзіцца Атрошчанка да гэтага часу на вайне і ўвогуле ці жывы ён.
Флагшток знайшоў пацверджанне таго, што Пятро Атрошчанка сапраўды з'яўляецца жыхаром Хойнікаў і там зарэгістраваны. Дадзеныя хлопца — з поўным супадзеннем імя і прозвішча і даты нараджэння — ёсць у спісе ўліку грамадзян, якія маюць патрэбу ў паляпшэнні жыллёвых умоў, Хойніцкага райвыканкама. У тым ліку — у апошнім спісе, па стане на 1 мая 2025 года. Дата пастаноўкі на ўлік пазначана 2003 год.
Атрошчанка ў спісе абазначаны як сірата, што стала падставай прыняцця яго на ўлік грамадзян, якія маюць патрэбу ў паляпшэнні жыллёвых умоў. Тое, што яго дадзеныя ёсць у свежым спісе, не служыць пацверджаннем таго, што хлопец жывы — чыноўнікі маглі не абнавіць інфармацыю.
Канцэрт Макса Каржа пачаўся з затрымкай на дзве гадзіны. «Беларусь топ!» — крычаць і ён, і фанаты9
Каментары