U Sudanie źbili samalot Arabskich Emirataŭ ź dziasiatkami kałumbijskich najmitaŭ na borcie

Jak paviedamlaje Sudan Tribune sa spasyłkaj na dziaržaŭnaje telebačańnie Sudana, 6 žniŭnia padčas padlotu da aeraporta horada Ńjały (stalica Paŭdniovaha Darfura) Uzbrojenyja siły Sudana źniščyli transpartny samalot (vierahodna, Ił-76T), zafrachtavany AAE. Paviedamlajecca, što samalot vylecieŭ z vajskovaj bazy ŭ rehijonie Piersidskaha zaliva.

Zhodna z apublikavanaj infarmacyjaj, vajennaja raźviedka sudanskaj armii sačyła za pieramiaščeńniami samalota i kantralavała jaho kaardynacyju z bajevikami Sił chutkaj padtrymki (Rapid Support Forces — RSF), jakija trymajuć pad kantrolem aeraport. Heta dazvoliła nanieści ŭdar adrazu paśla jaho pasadki, jašče da taho, jak RSF paśpieli razharnucca.

U repartažy śćviardžałasia, što ŭ vyniku ŭdaru zahinuli jak minimum 40 kałumbijskich najmitaŭ i źniščany partyi zbroi i ryštunku, pryznačanych dla RSF, jakija ŭdzielničajuć u hramadzianskaj vajnie, što praciahvajecca z krasavika 2023 hoda.

U svaim repartažy dziaržaŭny telekanał nazvaŭ hety ŭdar «adkrytym pasłańniem» pra toje, što «suvierenitet Sudana — heta čyrvonaja rysa» dla zamiežnaha ŭmiašańnia. U zajavie taksama adznačałasia, što apieracyja ŭstanaŭlivaje «novuju formułu strymlivańnia».

Paviedamlajecca, što transpartny samalot byŭ całkam źniščany ŭ vyniku ŭdaru. A prezident Kałumbii Hustava Pietra daručyŭ pasolstvu krainy ŭ Jehipcie vyśvietlić padrabiaznaści hibieli hramadzian svajoj krainy i viarnuć ich cieły na radzimu.

RSF zaniali Ńjału ŭ kancy minułaha hoda i, jak zajaŭlaje sudanskaja armija, vykarystoŭvaje miascovy aeraport jak važny łahistyčny centr dla atrymańnia zbroi, padrychtoŭki bajevikoŭ i kantrabandy sudanskaha zołata.

Paviedamlajecca, što adnačasova z udaram pa samalocie Uzbrojenyja siły Sudana nanieśli ŭdary pa składach zbroi RSF i trenirovačnych łahierach, dzie znachodzilisia kałumbijcy.

Što robiać kałumbijskija najmity ŭ Sudanie?

4 žniŭnia hetaha hoda kałumbijskaja hazieta La Silla Vacía apublikavała padrabiaznaści ŭdziełu bolš za 300 kałumbijskich najmitaŭ u padrychtoŭcy bajcoŭ sudanskaj palicyi ŭ Darfury. Jany nazyvajuć siabie «Desert Wolves» («Pustynnyja vaŭki»).

Jašče ŭ minułym hodzie žurnalisty vyśvietlili, što kałumbijcaŭ najmaje kampanija Global Security Service Group (GSSG) z Abu-Dabi, jakaja naležyć hramadzianinu AAE Machamiedu Chamdanu Alzaabi. Na zdymkach, jakija atrymała kałumbijskaje vydańnie, vidać, što siarod tych, kaho navučajuć u Sudanie kałumbijcy, jość i niepaŭnaletnija.

Pavialičyć

«Mianie adpravili instruktaram u trenirovačnyja łahiery. U łahiery, kudy nabirali na navučańnie 1000, 2000, navat 3000 sudancaŭ. Tam byli dzieci 10, 11 i 12 hadoŭ. Byli taksama ludzi 20 i 30 hadoŭ, ale šmat, šmat dziaciej», — raskazaŭ vydańniu kałumbijski najmit.

3 žniŭnia hetaha hoda pradstaŭnik Sudana pry AAN Amar Machmud u svaim tvitar-akaŭncie asudziŭ apieracyi kałumbijskich najmitaŭ u Paŭnočnym Darfury.

«Afryka vystupaje suprać zamiežnych najmitaŭ z momantu pryniaćcia Kanviencyi 1977 hoda. Siońnia hetaja spadčyna padviarhajecca atacy. Kałumbijskija najmity, naniatyja Abjadnanymi Arabskimi Emiratami, zabivajuć mirnych žycharoŭ u Paŭnočnym Darfury», — napisaŭ dypłamat u tvitary.

Africa has stood against foreign mercenaries since the 1977 Convention. Today, that legacy is under attack. UAE-hired Colombian mercenaries are killing civilians in North Darfur.

Africa must rise.. imperialism must not return through the back door. pic.twitter.com/TR40IEi9nO

— Ammar Mahmoud (@ammarmahmoud) August 3, 2025

Čamu najmity z Kałumbii?

Jak piša The Wall Street Journal, dziakujučy vialikaj kolkaści vieteranaŭ narkavajny, navučanych pracavać z amierykanskaj zbrojaj, Kałumbija ŭžo daŭno źjaŭlajecca mišeńniu dla viarboŭščykaŭ z zamiežnych ahienctvaŭ biaśpieki i vajskovych struktur.

Dziesiać hadoŭ tamu AAE praz vajennych padradčykaŭ adpraŭlali kałumbijcaŭ vajavać u hramadzianskaj vajnie ŭ Jemienie. U vieraśni 2024 hoda zarehistravanaja ŭ stalicy Kałumbii kampanija International Services Agency (A4SI) pačała raźmiaščać na svaim sajcie abjavy z pošukam apierataraŭ dronaŭ, śpiecyjalistaŭ pa kibierbiaśpiecy i ciełaachoŭnikaŭ dla pracy ŭ Afrycy.

Prykładna ŭ toj ža čas u čatach kałumbijskich vieteranaŭ źjaviłasia abjava ab vakansii z prapanovaj zarpłaty ad $2600 da $6000 na miesiac dla kandydataŭ z vajennym dośviedam, hatovych pracavać na Blizkim Uschodzie i ŭ Afrycy.

Kałumbijskija vajskovyja padradčyki, znajomyja z pracesam naboru, kažuć, što A4SI šukała snajpieraŭ i pierakładčykaŭ ź ispanskaj na anhlijskuju. Dziasiatki byłych sałdat, pa słovach padradčykaŭ, padpisali kantrakty z GSSG, jakaja supracoŭničała z A4SI niekalki hadoŭ.

Ale, jak kažuć kałumbijskija padradčyki i adstaŭniki, u kantraktach z GSSG nie było zhadki ni pra Sudan, ni pra słužbu ŭ aktyŭnaj bajavoj zonie. «Ich praktyčna padmanuli», — raskazaŭ žurnalistam vosieńniu minułaha hoda adzin z padradčykaŭ.

Jak paviedamlaje TRT Global, paviedamleńni pra kałumbijskich bajevikoŭ u Darfury źjaŭlajucca jašče z kanca 2024 hoda. Ekśpierty AAN u dakładzie, apublikavanym u krasaviku, paćvierdzili, što jany byli naniaty pryvatnaj achoŭnaj firmaj dla padtrymki RSF.

Niahledziačy na šmatlikija dokazy, AAE praciahvajuć admaŭlać svaju datyčnaść da raspalvańnia hramadzianskaj vajny ŭ Sudanie.

U mai Rada biaśpieki i abarony Sudana paviedamiła ab razryvie dypłamatyčnych adnosin z AAE, aficyjna abviaściŭšy jaje «dziaržavaj ahresii».

Paśla źniščeńnia samalota z najmitami ŭ Ńjale AAE spynili avijaznosiny z Sudanam i zabaranili ŭsim sudanskim samalotam pasadku ŭ svaich aeraportach.

Vajna ŭ Sudanie — pole boju zamiežnych dziaržaŭ

Vajna ŭ Sudanie pamiž rehularnaj armijaj i paŭstanckimi Siłami chutkaj padtrymki pieratvaryłasia ŭ pole boju dla ŭsio bolšaj kolkaści zamiežnych dziaržaŭ, jakija pastaŭlajuć bajcoŭ i zbroju navat z Łacinskaj Amieryki i Jeŭropy.

Šerah rehijanalnych uradaŭ sprabujuć uzmacnić svoj upłyŭ pa miery eskałacyi bajavych dziejańniaŭ — z adnaho boku Abjadnanyja Arabskija Emiraty, z druhoha — Jehipiet.

Pad pytańniem kantrol nad sudnachodnymi šlachami Čyrvonaha mora, adnymi z najbujniejšych u Afrycy zapasaŭ zołata i sprečnymi vodami Niła.

Varta adznačyć, što hramadzianskaja vajna ŭ Sudanie maje razburalnyja nastupstvy dla 48 miljonaŭ žycharoŭ krainy. Jana vyklikała najhoršy humanitarny kryzis našaha času, bolš za 13 miljonaŭ čałaviek stali ŭnutranymi pieramieščanymi asobami. U krainie katastrafičny deficyt praduktaŭ.

• 2
• 0
• 0
• 2
• 2
• 0
• 1
• 0