Pašpart prykryćcia, suviaź z KDB i navat zamuž za hebista: novyja fakty pra rasijskuju bijatłanistku, jakaja vystupała za Biełaruś

Aŭtary rasśledavańnia praanalizavali źviestki spartsmienaŭ, jakija raniej mieli rasijskaje hramadzianstva, i zaŭvažyli dziŭnuju zakanamiernaść: mnohija ź ich mieli pa dva roznyja biełaruskija pašparty adnačasova.

Jak vyśvietlili rasśledavalniki, pracedura atrymańnia pieršaha dakumienta adbyvałasia z hrubymi parušeńniami zakanadaŭstva. Zamiest praduhledžanych zakonam niekalkich miesiacaŭ razhladu pašparty vydavalisia pavodle vusnaha rasparadžeńnia z Administracyi Łukašenki litaralna za sutki ci dvoje.

Heta rabiłasia dla taho, kab terminova zajavić spartoŭcaŭ na spabornictvy. Faktyčna, jak adznačajecca ŭ materyjale, za Biełaruś vystupali hramadzianie Rasii ź niezakonna vydadzienymi dakumientami, jakija paźniej anulavalisia dla prachodžańnia ŭžo lehalnaj pracedury atrymańnia hramadzianstva.

Asablivuju ŭvahu ŭ rasśledavańni nadali bijatłonu — stratehična važnamu dla režymu vidu sportu, jaki pad ščylnym kantrolem KDB. Mienavita z hetaha vidu sportu śpiecsłužby časta padbirajuć snajpieraŭ i instruktaraŭ dla śpiecpadraździaleńnia «Alfa». Fiederacyju bijatłona tradycyjna ŭznačalvali kiraŭniki dziaržbiaśpieki. Jak śćviardžajuć rasśledavalniki, mienavita jany kuryravali padbor rasijskich bijatłanistaŭ, jakija nie prachodzili ŭ svaju zbornuju.

U jakaści jaskravaha prykładu ŭ videa pryvodzicca historyja ŭradženki Tatarstana Volhi Kudrašovaj, 1978 hoda naradžeńnia.

Jak vyśvietlili rasśledavalniki, jana atrymała svoj pieršy biełaruski pašpart 12 vieraśnia 2006 hoda. Pry hetym dakumient utrymlivaŭ iłžyvyja źviestki: asabisty numar śviedčyŭ pra toje, što jana źjaŭlajecca ŭradženkaj Biełarusi (litary RV), choć miescam naradžeńnia značyłasia Rasija.

Pavialičyć

Mienavita z hetym pašpartam Kudrašova zavajavała zołata i bronzu na čempijanacie Jeŭropy ŭ Bałharyi ŭ 2007 hodzie.

Jak vyśvietlili rasśledavalniki, praz čatyry miesiacy paśla atrymańnia pieršaha pašparta spartoŭka pačała afarmlać dakumienty na pražyvańnie. 31 studzienia 2007 hoda jana atrymała dazvoł na žycharstva ŭ Biełarusi, i tolki praź siem miesiacaŭ, 7 žniŭnia, vykanaŭšy ŭsie zakonnyja patrabavańni, atrymała druhi biełaruski pašpart.

Hety novy dakumient mieŭ zusim inšy asabisty numar, u jakim prysutničali litary «VF», što prysvojvajucca mienavita ŭradžencam inšych dziaržaŭ. Pakolki pieršy pašpart byŭ pryznany niesapraŭdnym tolki ŭ 2012 hodzie, atrymlivajecca, što na praciahu čatyroch z pałovaj hadoŭ spartoŭka vałodała dvuma dziejnymi pašpartami adnačasova.

Akramia spartyŭnych machinacyj, aŭtary rasśledavańnia raskryli i suviazi spartoŭki sa śpiecsłužbami. Jak śćviardžajuć rasśledavalniki, Kudrašova vyjšła zamuž za supracoŭnika centralnaha aparata KDB Paŭła Stralcova. Bolš za toje, u 2011 hodzie jana atrymała pašpart prykryćcia na inšaje proźvišča — Papova, jaki zamianiła na novy ŭ 2021 hodzie, što śviedčyć pra praciah jaje supracoŭnictva ź siłavymi strukturami.

Usiu sabranuju infarmacyju pra niezakonny ŭdzieł spartoŭcaŭ u spabornictvach rasśledavalniki płanujuć pieradać u Mižnarodny sajuz bijatłanistaŭ dla praviadzieńnia pravierki zakonnaści ŭdziełu hieraini rasśledavańnia ŭ mižnarodnych spabornictvach.

• 18
• 0
• 0
• 4
• 0
• 0
• 17
• 0