31‑hadovaha siłavika ź Bieraściejščyny abvinavačvajuć u padpolnaj pracy ŭ Krymie pa zadańni «Bajpoła»
Hienrycha Ahiejeva FSB zatrymała ŭ lutym 2024 hoda. U vieraśni 2024 hoda jaho pieradali łukašenkaŭskim śpiecsłužbam. Pravaabaroncam stała viadoma pra Ahiejeva tolki ciapier. «Viasna» sa słoŭ byłoha sukamiernika Hienrycha raskazvaje, što viadoma.
Hienrychu Ahiejevu ŭ siaredzinie vieraśnia spoŭniŭsia 31 hod. Svoj dzień naradžeńnia, vierahodna, jon sustreŭ u SIZA KDB. Pavodle danych na staroncy Hienrycha na Linkedin, u 2016 hodzie jon skončyŭ Vajskovuju akademiju Biełarusi. Paśla hetaha čatyry hady pracavaŭ va ŭnutranych vojskach Biełarusi, a ŭ žniŭni 2020 hoda zvolniŭsia.
Były viazień, imia jakoha nie nazyvajecca ŭ metach biaśpieki, byŭ u adnoj kamiery z Hienrycham vosieńniu 2024 hoda. Pavodle jaho słoŭ, zatrymańnie adbyłosia ŭ lutym 2024 hoda na Krymskim moście, kali mužčyna ŭžo viartaŭsia ŭ Biełaruś.
Jak raskazvaŭ sam Ahiejeŭ, jon źjaŭlajecca fihurantam «spravy Bypol». Jaho abvinavačvajuć u tym, što jon jeździŭ u Krym pa zadańni pradstaŭnika inicyjatyvy Alaksandra Azarava. Dakładnyja mety pajezdak nieviadomyja.
Ź lutaha pa vierasień 2024 hoda Ahiejeva ŭtrymlivali ŭ SIZA Simfieropala.
«Na zvarotnym šlachu na krymskim moście jaho zatrymali, vielmi mocna źbili. Siadzieŭ u Simfieropali na śpiecyjalnym paviersie ad FSB u SIZA, dzie niama nijakich pravił. Tam siadzieli taksama zamiežniki dy pałonnyja ŭkraincy.
U Krymie na hetym paviersie ŭsie siadziać bieź śledčych dziejańniaŭ, u svaim adzieńni, bieź pieradač i listoŭ hadami. Dzieviać miesiacaŭ, što jon tam pravioŭ, nikudy nie zaličylisia, jaho nibyta tam nie było. Rodnyja dumali, što pamior. Pašancavała, što ekstradavali ŭ Biełaruś, bo pahražali zabić.
Dva razy prachodziŭ palihraf. U krymskim SIZA, raskazvaŭ, usich vodziać na «elektrafarez», «tapik» — 110 volt pastajannaha toku i vybivajuć pakazańni. Jaho hetym tolki pałochali.
Paśla taho, jak pieršy raz nie prajšoŭ palihrafa, jaho vyvieźli ŭ niejkuju katavalniu ź miaškom na hałavie i pryviazanaha da kresła, źbivali. Pahražali, što parežuć na kavałki. Tam jon čuŭ, što było šmat mietaličnych instrumientaŭ», — raskazvaje były sukamiernik Hienrycha.
U vieraśni Hienrycha Ahiejeva ekstradavali ŭ Biełaruś, pry hetym nie addali nijakich dakumientaŭ, tamu čas u SIZA FSB nie budzie zaličany ŭ termin prysudu. Na radzimu biełarusa vieźli sutki ź miaškom na hałavie, raskazvaje były sukamiernik. Za ŭvieś šlach jamu ni razu nie dali schadzić u prybiralniu.
Mužčynu abvinavačvajuć adrazu pavodle niekalkich artykułaŭ, u tym liku «zdrada dziaržavie» (art. 356 KK) i «ŭdzieł u terarystyčnaj arhanizacyi» (art. 290‑5 KK) za suviaź z arhanizacyjaj Bypol, što ŭ Biełarusi pryznanaja «terarystyčnaj».
Vosieńniu 2024 hoda Ahiejeŭ pavinien byŭ aznajomicca z materyjałami kryminalnaj spravy, tamu, imavierna, nad im užo pačaŭsia abo prajšoŭ sud.
«Psichałahična jon vielmi mocny, vielmi idejny, fienamienalnaja pamiać, fizična taksama adjeŭsia ŭžo, adčuvaje siabie dobra», — raskazvaje pra Hienrycha były sukamiernik pa stanie na vosień 2024 hoda.
Milicyja schavała hałoŭnaje — mahiloŭski mańjak-lifcior užo siadzieŭ za zhvałtavańnie. Ale jaho nie pravieryli na datyčnaść da zabojstvaŭ3
Kamientary