U Koŭnie šukajuć mańjaka, jaki zabiŭ dźviuch maładych dziaŭčat, a da kvatery treciaj nie dajšoŭ
«Hety čałaviek damoviŭsia sa mnoju, što zojdzie, ale tak i nie źjaviŭsia ŭčora. Siońnia ad ranicy dryžać ruki i nohi paśla taho, jak ja daviedałasia, što heta mańjak. Ja jamu skazała i kody dźviarej, i pavierch, ale jon nie pryjšoŭ. Ja jašče sama jamu pisała i telefanavała, kali jon nie pryjšoŭ, kab daviedacca, dzie jon. Nie mahu pavieryć, što cudam zastałasia žyvaja».
Čaćvier, 4 śniežnia, staŭ trahičnym dniom dla litoŭskaha Koŭna. U horadzie byli žorstka zabityja dźvie maładyja žančyny. Palicyja ličyć, što hetyja zabojstvy źviazanyja pamiž saboj, i aktyŭna šukaje adzinaha padazravanaha.
Pieršaje paviedamleńnie pastupiła ŭ palicyju kala 13:00. U kvatery było znojdziena cieła 22‑hadovaj dziaŭčyny ź pierarezanym horłam. Uviečary svajaki inšaj dziaŭčyny, 24-hadovaj, paviedamili, što nie mohuć źviazacca ź joj. Supracoŭniki palicyi trapili ŭ jaje kvateru i znajšli cieła druhoj achviary, taksama sa śladami hvałtu.
Abodva złačynstvy adbylisia ŭ adnym mikrarajonie, dzie miescy zdareńniaŭ padzialajuć usiaho niekalki sotniaŭ mietraŭ. Dakładny čas śmierci vyznačajecca, adnak miarkujecca, što pieršaje zabojstva adbyłosia ranicaj pamiž 10 i 11 hadzinami, a druhoje — dniom, pamiž 12 i 13 hadzinami.
Hałoŭny prakuror akruhovaj prakuratury paćvierdziŭ, što ŭ zabojstvie abiedźviuch dziaŭčat padazrajecca adzin i toj ža čałaviek — 29‑hadovy Benas Mikutavičus.
Kryminalnyja spravy abjadnanyja, viadziecca rasśledavańnie pa fakcie zabojstva, ździejśnienaha z asablivaj žorstkaściu. Pa słovach prakurora, na hety momant niama źviestak pra seksualny hvałt abo inšyja złačynstvy. Sam padazravany raniej nie byŭ sudzimy i nie traplaŭ u pole zroku palicyi pa kryminalnych spravach, majučy za plačyma tolki administracyjnyja spahnańni.
Miarkujecca, što padazravany ŭsio jašče moža znachodzicca ŭ Koŭnie ci vakolicach, chacia nie vyklučana, što jon pierabraŭsia ŭ inšy horad. Palicyja papiaredžvaje, što Mikutavičus viadzie davoli zamkniony ład žyćcia, maje nievysoki dachod, tamu moža pierasoŭvacca pieššu abo na hramadskim transparcie.
Śledstva vyśvietliła matyvy suviazi zabojcy z achviarami. Pieršaja zahinułaja dziaŭčyna — stryječnaja siastra Mikutavičusa. Jany žyli ŭ adnoj kvatery. Druhaja achviara była źviazanaja ź im praz arendu žylla: vierahodna, jon damoviŭsia pahladzieć kvateru, jakuju dziaŭčyna zdavała abo zdymała.
Hetuju viersiju paćviardžajuć i paviedamleńni ŭ sacyjalnych sietkach. U fejsbuku jašče adna žančyna padzialiłasia pierapiskaj ź Mikutavičusam. Jon telefanavaŭ pa abjavie i chacieŭ zajści pahladzieć jaje kvateru ŭ čaćvier, 4 śniežnia, paśla abiedu, kala 14‑j hadziny.
«Boža! Mianie ŭčora mahli zarezać. Hety čałaviek damoviŭsia sa mnoju, što zojdzie, ale tak i nie źjaviŭsia ŭčora. Siońnia ad ranicy dryžać ruki i nohi paśla taho, jak ja daviedałasia, što heta mańjak. Ja jamu skazała i kody dźviarej, i pavierch, ale jon nie pryjšoŭ. Ja jašče sama jamu pisała i telefanavała, kali jon nie pryjšoŭ, kab daviedacca, dzie jon. Nie mahu pavieryć, što cudam zastałasia žyvaja», — cytuje słovy žančyny Delfi.lt.
Žurnalisty pabyvali ŭ Taŭrahskim rajonie, u vioscy Žyhajčaj, adkul pachodzić padazravany, i pahutaryli z adnaviaskoŭcami, jakija viedajuć baćkoŭ jak achviary, tak i zabojcy. Ludzi nazyvajuć abiedźvie siamji narmalnymi i śćviardžajuć, što mohuć skazać pra ich tolki dobraje. Viadoma, što baćki Benasa raźviedzienyja, baćka znachodzicca za miažoj, u siamji jość jašče brat i siastra.
Miascovyja adznačajuć niekatoryja asablivaści pavodzin Mikutavičusa. Pa ich słovach, chłopiec byŭ ź dzivactvami, pry sustrečy nikoli nie padymaŭ vačej i hladzieŭ uniz.
Pa słovach miascovych žycharoŭ, kvateru ŭ Koŭnie stryječnym bratu i siastry zdymali supolna baćki z abodvuch bakoŭ. Adnak, pa čutkach, siastra faktyčna ŭtrymlivała brata, jaki ni za što nie płaciŭ i siadzieŭ nachlebnikam. Ahresii za im raniej nie zaŭvažali.
Žychary taksama padzialilisia važnaj detallu, jakaja moža rastłumačyć matyŭ pieršaha zabojstva. Pa ich słovach, mienavita 4 śniežnia dziadźka (svajak abaich maładych ludziej) pavinien byŭ pryjechać u kvateru ŭ Koŭnie, kab zabrać rečy Benasa i vysielić jaho.
Ziemlaki ŭpeŭnienyja, što baćka nie budzie pakryvać syna, ale nie viedajuć, dzie toj moža chavacca biez hrošaj.
Palicyja paviedamiła, što Mikutavičus abvieščany ŭ ahulnanacyjanalny vyšuk, a ŭ najbližejšy čas płanujecca inicyjavać i mižnarodny.
Hramadzian papiaredžvajuć, što mužčyna moža pavodzić siabie nieadekvatna i ŭjaŭlać pahrozu, tamu kateharyčna rekamiendujecca sprabavać nie zatrymlivać jaho samastojna, a telefanavać u palicyju.
Kamientary