Jeŭropa padtrymała admovu Ukrainy zdavać svaje terytoryi Pucinu bieź jahonych sastupak

Pavodle infarmacyi The Wall Street Journal, dva jeŭrapiejskija čynoŭniki, znajomyja z chodam pieramoŭ, raskazali, što hety dakumient pryznačany stać asnovaj dla budučaj sustrečy prezidenta ZŠA Donalda Trampa z Pucinym.

Inicyjatyva, uzhodnienaja padčas sustrečy z vysokapastaŭlenymi pradstaŭnikami ZŠA ŭ Vialikabrytanii, admaŭlaje prapanovu Rasii pieradać častku padkantrolnych Ukrainie terytoryj Danieckaj vobłaści ŭ abmien na spynieńnie bajavych dziejańniaŭ.

Pavodle jeŭrapiejskaha płana, spynieńnie ahniu pavinna adbycca da pačatku lubych dalejšych krokaŭ pa ŭrehulavańni kanfliktu. Terytaryjalnyja kampramisy mahčymyja tolki na ŭzajemnaj asnovie — kali Ukraina advodzić vojski z adnoj terytoryi, Rasija pavinna zrabić heta samaje ź inšaj. Hałoŭnaj umovaj źjaŭlajecca zabieśpiačeńnie ćviordych harantyj biaśpieki dla Ukrainy, uklučajučy mahčymaje ŭstupleńnie ŭ NATA.

Płan byŭ pradstaŭleny vice-prezidentu ZŠA Džeju Dzi Vensu, dziaržsakrataru ZŠA Marka Rubia, a taksama śpiecyjalnym pradstaŭnikam Trampa Kitu Kiełahu i Styvu Uitkafu. Vens pry hetym prysutničaŭ asabista, astatnija — praź videasuviaź.

Daradcy jeŭrapiejskich lidaraŭ pieradavali hety dakumient amierykanskamu boku, kab vyznačyć vyraznyja «čyrvonyja linii» dla budučych pieramoŭ z Rasijaj.

Prezident Francyi Emanuel Makron u svaim paviedamleńni ŭ sacsietcy X zajaviŭ, što budučynia Ukrainy nie moža vyrašacca biez samich ukraincaŭ, jakija ŭžo bolš za try hady zmahajucca za svaju svabodu i biaśpieku. Jon taksama padkreśliŭ, što Jeŭropa pavinna być častkaj hetaha rašeńnia, bo heta tyčycca i jaje ŭłasnaj biaśpieki.

Pavodle źviestak ahienctva Bloomberg, 6 žniŭnia na sustrečy Pucina z Uitkafam u Kramli rasijski lidar prapanavaŭ spynić bai, kali Ukraina admovicca ad Danieckaj i Łuhanskaj abłaściej. Što tyčycca Chiersonskaj i Zaparožskaj abłaściej, to Pucin, jak paviedamlaje ahienctva, paabiacaŭ «zamarozić» tam liniju frontu.

ZŠA paviedamlali, što Pucin nibyta hatovy na pieramirje pry ŭmovie vyvodu ŭkrainskich vojskaŭ z Danbasa. Adnak krynicy niamieckaha vydańnia Bild śćviardžajuć, što Maskva pa-raniejšamu patrabuje poŭnaha kantrolu jak nad Zaparožskaj, tak i nad Chiersonskaj abłaściami.

Paśla sustrečy Pucina z Uitkafam Donald Tramp adkłaŭ uviadzieńnie novych sankcyj suprać Rasii i abviaściŭ pra samit z Pucinym, jaki adbudziecca 15 žniŭnia na Alascy. Tramp taksama zajaviŭ, što ŭkrainskamu prezidentu Uładzimiru Zialenskamu daviadziecca «niešta padpisać», adznačyŭšy pry hetym, što pieramovy składanyja i mahčymy abmien terytoryjami, nie ŭdakładniŭšy, jakich mienavita.

Ukraina kateharyčna adchiliła ŭsie ŭmovy, źviazanyja z admovaj ad svaich ziemlaŭ. Uładzimir Zialenski nahadaŭ, što pazicyja Ukrainy zamacavanaja ŭ Kanstytucyi: «Adstupać ad hetaha nichto nie budzie i nie zmoža. Ukraincy nie buduć addavać svaju ziamlu akupantu».

• 5
• 0
• 2
• 0
• 0
• 0
• 0
• 0