Cichanoŭskaja źviarnułasia da biełarusaŭ z nahody piataj hadaviny pratestaŭ

Napiaredadni piataj hadaviny pratestaŭ 2020 hoda Śviatłana Cichanoŭskaja źviarnułasia da biełarusaŭ.

«Piać hadoŭ tamu biełarusy vyjšli na vulicy, kab abaranić svaje hałasy na vybarach i pakazać adzinstva. I heta nazaŭždy nas źmianiła, — kaža jana. —

My ŭbačyli, kolki nas. Sotni tysiač ludziej pa ŭsioj krainie zapoŭnili płoščy i vulicy haradoŭ. Heta było pryhoža, hodna i strašna dla ŭłady.

Ale tuju chvalu salidarnaści ŭžo niemahčyma było spynić. Źjavilisia dvaravyja čaty, i susiedzi narešcie paznajomilisia adno z adnym. Na maršach razdavali vadu i prybirali za saboj śmiećcie. La ścien Akreścina dziažuryli vałanciory, kab dapamahać rodnym zatrymanych i sustrakać tych, kaho vypuskali paśla sutak. Akazvali miedycynskuju dapamohu, karmili, advozili dadomu.

I, niahledziačy na žachi represij, biełarusy nie zdavalisia. Biełarus biełarusu — biełarus. Nievypadkova źjaviŭsia hety vyraz. I hetaje pačućcio plača adčuvajecca i ciapier.

Nam časta padajecca, što baraćba z režymam patrabuje ad nas vialikich spravaŭ, ale ž možna rabić i prostyja rečy. Dapamahać siemjam palitźniavolenych. Zaraz u Biełarusi bolš za 1100 čałaviek znachodziacca za kratami. I navat dobraje słova dla ich rodnych — heta ŭžo vielmi mnoha. Heta doryć tysiačam ludziej padtrymku.

Stvarać svajo, niachaj heta budzie litaratura, muzyka, kinafilm, YouTube-kanał ci mastackaja vystava. Tvorčaść — heta hołas svabody, i jaho nielha zadušyć».

«Chtości skaža, što prajšło piać hadoŭ, my prajhrali. Ale heta nie tak, — kaža Cichanoŭskaja. — Chiba možna prajhrać, kali vašy kaštoŭnaści zastajucca niaźmiennymi? Niaŭžo našyja mety i mary pra svabodnuju Biełaruś źnikli? Viadoma, nie. Ja ŭpeŭnienaja ŭ hetym. Bo mienavita vy ŭ asabistych razmovach raspaviadajecie mnie, kolki ŭ vas nadziei, i dzieliciesia tym, jak kožny dzień dapamahajecie adzin adnamu.

Ja čuju i krytyku, i šmat parad, jak pieramahčy dyktaturu. I heta značyć, što vam baluča. Bo kali b było ŭsio roŭna, to nie było b sprečak i dyskusij, bo abyjakavaść naradžaje tolki maŭčańnie.

I ja, jak i vy, chaču, kab doŭhačakanyja źmieny nastupili jak maha chutčej. Ale, jak i ŭ 2020 hodzie, biez vašaj padtrymki, vašaj salidarnaści heta ciažka zrabić. Dyk davajcie čuć adno adnaho, dbać adzin pra adnaho i praciahvać pačataje. Bo, pakul my vierym i možam, my abaviazkova pieramožam».

• 20
• 2
• 4
• 2
• 0
• 1
• 0
• 2