Dzie i kali budzie prezientavany hienpłan stalicy i kudy nakiroŭvać prapanovy?
Hramadskaje abmierkavańnie hienieralnaha płana Minska pačniecca 13 žniŭnia ŭ administracyi Maskoŭskaha rajona. Abjava pra heta apublikavanaja ŭ haziecie «Minski kurjer», pišuć «Minsk-Naviny».
Aznajomicca z prajektam hienieralnaha płana možna z 13 pa 27 žniŭnia ŭklučna na sajcie administracyi Maskoŭskaha rajona, a taksama na sajtach usich astatnich rajonnych administracyj horada ŭ raździele «Hramadskija abmierkavańni» i na sajcie Minskaha harvykankama. Taksama ekspazicyja prajekta z płanšetami, tekstavymi materyjałami budzie raźmieščanaja ŭ hetyja ž daty ŭ chole 2-ha paviercha administracyi Maskoŭskaha rajona (pr. Dziaržynskaha, 10). Čas pracy ekspazicyi: paniadziełak — čaćvier: z 8:45 da 18:00 (abied — z 13:00 da 14:00); piatnica: z 8:45 da 16:45 (abied — z 13:00 da 14:00).
Elektronnaja prezientacyja novaha hienpłana stalicy budzie dastupnaja z 15 pa 27 žniŭnia ŭklučna na sajcie administracyi Maskoŭskaha rajona ŭ raździele «Hramadskija abmierkavańni». Rolik z prezientacyjaj možna budzie ŭbačyć i na ekspazicyi.
Ciapier stalica raźvivajecca pavodle hienpłana, zaćvierdžanaha ŭ 2016 hodzie.
Jak prakamientavała načalnica ŭpraŭleńnia pa architektury i budaŭnictvie administracyi Maskoŭskaha rajona Volha Vieramiej, u paraŭnańni z 2016 hodam adbylisia źmieny ŭ pracedurach praviadzieńnia hramadskaha abmierkavańnia. Ciapier pavodle zakanadaŭstva, kali miežy prajektavańnia abjekta achoplivajuć terytoryi niekalkich administracyjna-terytaryjalnych adzinak (rajonaŭ u horadzie), to arhanizataram hramadskaha abmierkavańnia źjaŭlajecca vykankam, na terytoryi jakoha znachodzicca bolšaja pa płoščy častka terytoryi abjekta. Mienavita tamu pracedura prachodzić u Maskoŭskim rajonie — jak samym vialikim u stalicy. Da taho ž mienavita ŭ hetym rajonie raźmieščany Minharvykankam, jaki źjaŭlajecca zakazčykam raspracavanaha prajekta hienpłana stalicy. Načalnica ŭpraŭleńnia adznačyła, što prajektnyja materyjały novaha hienpłana buduć pradstaŭlenyja ŭ elektronnym vyhladzie va ŭsich administracyjach horada, tak što ŭ žycharoŭ jość mahčymaść aznajomicca ź imi.
Piśmovyja zaŭvahi i prapanovy pa prajekcie haradžanam varta nakiroŭvać z 13 pa 27 žniŭnia poštaj abo ŭ elektronnaj formie arhanizataru hramadskaha abmierkavańnia — administracyi Maskoŭskaha rajona (220036, h. Minsk, pr. Dziaržynskaha, 10, teł. 360-81-20, elektronny adras [email protected]) z paznakaj «hramadskaje abmierkavańnie».
Zaŭvahi i prapanovy, jakija pastupiać, budzie razhladać architekturna-horadabudaŭničy saviet pry hałoŭnym architektary Minska i kamisija pa hramadskim abmierkavańni administracyi Maskoŭskaha rajona. Pa vynikach razhladu afarmlajecca i zaćviardžajecca pratakoł padviadzieńnia vynikaŭ hramadskaha abmierkavańnia.
Kamientary
2. Navat zaraz bajacca zaŭvah i hramadzianskaj aktyŭnaści: abmierkavańnie pravodziać letam, usiaho 2 tydni i materyjały pakul nie vykłali.
3. Siurpryzy tam pavinny być, ale pakul nieviadoma jakija. Vierahodna, jašče bolš źniščeńnia pryvatnaj zabudovy, bolš žylla dla karnikaŭ ("sacyjalnaha"). Ekałahičnyja pytańni: ŭžo naŭrad ci, ale pahladzim.
4. U apošni čas rola hienpłanaŭ u horadabudaŭnictvie značna źmienšyłasia: vykankamy majuć paŭnamoctvy adstupać ad ich, a prezident dazvalaŭ adstupleńni ukazami i raniej. Šmat čaho zaraz budujecca z parušeńniem hienpłana 2016 h.
Akcentavacca na zabudovu małych haradoŭ, jak naprykład Uzda, Marjina horka, Dokšycy, Tałačyn, Lelčycy, i t.d. I nia prosta na zabudovu, a ŭpryhožvańnie, kab spryjała jakaści žyćcia, kultury, kab raschaciełasia plavać na chodniki, kidać apałki pad nohi dy maciukacca.