Apielacyjny sud u Tbilisi ahučyŭ rašeńnie adchilić skarhu pravaabaroncy Ramana Kiślaka, takim čynam padtrymaŭšy pazicyju Departamienta mihracyi MUS Hruzii — admović biełarusu ŭ nadańni palityčnaha prytułku.
Apielacyjny sud u Tbilisi 11 lipienia vynies rašeńnie adchilić skarhu pravaabaroncy Ramana Kiślaka, takim čynam padtrymaŭšy pazicyju Departamienta mihracyi MUS Hruzii — admović biełarusu ŭ nadańni palityčnaha prytułku.
«Tbiliski apielacyjny sud skasavaŭ rašeńnie haradskoha suda i pakinuŭ u sile rašeńnie Departamienta mihracyi pra admovu mnie ŭ prytułku. Heta poŭnaja admova», — paviedamiŭ «Pozirku» Kiślak.
Pravaabaronca padkreśliŭ, što rašeńnie kančatkovaje i nie moža być abskardžanaje ŭ hruzinskich instytucyjach.
Sudovaje pasiadžeńnie pa skarzie prajšło tydzień tamu. Padčas pracesu vystupiŭ sam Kiślak, jaho advakat, pradstaŭnik adździeła mihracyi MUS. Sudździa, pavodle słoŭ pravaabaroncy, zadavaŭ šmat pytańniaŭ.
«Ja spasyłaŭsia na rašeńnie Kamiteta suprać katavańniaŭ, što ŭ Biełarusi katavańni nabyli sistemny charaktar. My pakazali partrety [muža biełaruskaha demakratyčnaha lidara Śviatłany Cichanoŭskaj videabłohiera Siarhieja] Cichanoŭskaha da aryštu ŭ 2020 hodzie i paśla. Sudździa skazaŭ, što jon u kursie, navat hladzieŭ strym Siarhieja Cichanoŭskaha paśla vyzvaleńnia», — paviedamiŭ surazmoŭca.
Pavodle słoŭ Kiślaka, jaho spravu razhladaŭ, a paśla vynies rašeńnie sudździa Atar Sičynava, jaki pracavaŭ u Kanstytucyjnym sudzie, bałatavaŭsia na pasadu sudździ Jeŭrapiejskaha suda pa pravach čałavieka.
Pravaabaronca adznačyŭ, što ŭnutranyja miechanizmy abskardžvańnia vyčarpanyja. Zastałasia tolki mahčymaść kasacyjnaj skarhi ŭ Viarchoŭny sud.
«Mnie treba atrymać rezultatyŭnaje i matyvirovačnaje rašeńni. Apošniaje, mnie skazali, budzie nie raniej za vierasień», — adznačyŭ Kiślak.
Paśla siońniašniaha rašeńnia, dadaŭ surazmoŭca, jon maje 30 dzion na toje, kab pakinuć Hruziju. «Ale jak by kudy vyjazdžać, kali pašpart zakončyŭsia. U hetaj situacyi ŭ mianie adna daroha — u Biełaruś. Tut šmat pytańniaŭ», — kaža pravaabaronca.
Kiślak maje namier abskardzić rašeńnie hruzinskich uładaŭ u strukturach AAN.
Rašeńnie pra častkovaje zadavalnieńnie skarhi na admovu ŭ prytułku Ramanu Kiślaku Tbiliski haradski sud pryniaŭ 26 sakavika. U traŭni skarhu na hetaje rašeńnie padaŭ spačatku Departamient mihracyi, a paśla i sam pravaabaronca.
U 2019—2024 hadach Hruzija nie zadavoliła nivodnaha chadajnictva biełaruskich hramadzian ab nadańni prytułku.
Kamientary