Piać hadoŭ tamu «dydžei pieramien» uklučyli Coja na dziaržaŭnym mierapryjemstvie. Što ź imi ciapier?
6 žniŭnia 2020 hoda hukarežysiory Uładzisłaŭ Sakałoŭski i Kirył Hałanaŭ u Kijeŭskim skviery Minska ŭklučyli pieśniu Viktara Coja «Pieramien». U toj dzień tam zamiest apošniaha mitynhu abjadnanaha štabu ŭłady pravodzili dzień adkrytych dźviarej ustanoŭ dadatkovaj adukacyi. Videa taho momantu raźlaciełasia pa sacsietkach, a fotazdymak dydžejaŭ staŭ adnym ź simvałaŭ pratestu. Daviedalisia, jak žyvuć mužčyny ciapier.
Paśla zdareńnia ŭ Kijeŭskim skviery mužčyny atrymali pa 10 sutak aryštu i nieŭzabavie paśla vyzvaleńnia źjechali ŭ Vilniu — vizavuju dapamohu im akazała litoŭskaje pasolstva.
Pra ciapierašniaje žyćcio dydžejaŭ viadoma niašmat — u apošnija hady ad intervju mužčyny admaŭlajucca.
Z adkrytych krynic viadoma, što Uładzisłaŭ žyvie ŭ Litvie i praciahvaje zajmacca muzykaj. Uviesnu 2024 hoda jon razam z salistkaj Uljanaj Uładzimiravaj vystupaŭ na litoŭskim šou «Hołas».
U 2025 hodzie Uładzisłaŭ zdymaŭ videa vuličnych kancertaŭ vilenskaha hurta «Cimochi». I dapamahaŭ z apracoŭkaj huku litoŭskaj śpiavačcy Monicy Banite.
Kirył Hałanaŭ taksama praciahvaje žyć u Litvie. U Linkedin mužčyny paznačana, što z maja 2023 hoda jon pracuje hukarežysioram na mierapryjemstvach. Da taho čatyry miesiacy mužčyna sprabavaŭ siabie ŭ teściravańni prahram.
U 2021 hodzie Hałanaŭ kamientavaŭ toje, što adbyłosia ŭ Kijeŭskim skviery ŭ Minsku. Pa jaho słovach, tady jon zrabiŭ «usio mahčymaje dla taho, kab spynić toje varjactva ci prynamsi nie być jaho častkaj».
«Jość vielmi šmat pryčyn, čamu ŭ Biełarusi ŭsio pryjšło da hłabalnaj trahiedyi, jakaja zaraz tolki ŭzmacniajecca. Ale hałoŭnaja, bazavaja pryčyna — heta pačućcio biezadkaznaści. Absalutna kožny čałaviek upłyvaje na toje, što adbyvajecca, znachodziačysia na svaim miescy», — kazaŭ jon tady Deutsche Welle.
Ciapier čytajuć
«Łukašenka prosta nie viedaje». Jabaćku, jaki vykładaŭ u tyktok videa pra bulinh dački, pasadzili na paŭtara miesiaca8
Kamientary