Ofis Cichanoŭskaj prapanavaŭ ZŠA ideju kruhłaha stała z režymam Łukašenki. Ale jość umovy

«Pierałomny momant dla ŭsioj Jeŭropy»

Pavodle Dzianisa Kučynskaha, ideju kruhłaha stała jon ahučyŭ 16 lipienia hetaha hoda padčas pieramovaŭ u Vašynhtonie z namieśnikam daradcy prezidenta ZŠA Endzi Bejkieram. Jon padkreślivaje vysoki ŭzrovień sustrečy: Bejkier — adna z klučavych asob u amierykanskaj administracyi i faktyčna kiraŭnik Rady nacyjanalnaj biaśpieki. Taksama Kučynski adznačaje, što ŭ situacyi, kali «ŭsie bjucca ŭ dźviery Biełaha doma i hetyja dźviery ciapier redka byvajuć adčynienymi», naładzić taki kantakt było «stratehičnym pośpiecham».

— Dasiahnieńnie nacyjanalnaha dyjałohu, jaki pryvioŭ by da demakratyzacyi Biełarusi, moža stać nie tolki adnym z histaryčnych dasiahnieńniaŭ prezidenta Donalda Trampa, ale taksama — u šyrokim hieapalityčnym kantekście — sapraŭdnym pierałomnym momantam dla ŭsioj Jeŭropy. Biezumoŭna, amierykanski bok razhladaje roznyja mahčymaści, u tym liku i prapanavanuju ideju kruhłaha stała, — tłumačyć daradca Cichanoŭskaj.

Jon akcentuje ŭvahu na tym, što hatoŭnaść da dyjałohu z pradstaŭnikami režymu dla spynieńnia represij, vyzvaleńnia palitviaźniaŭ i praviadzieńnia svabodnych vybaraŭ paśladoŭna dekłaravałasia demsiłami z 2020 hoda.

— Taksama našaja meta — zabiaśpiečańnie taho, kab Biełaruś nie była suahresaram u vajnie suprać Ukrainy i zachavała svoj suvierenitet, — zajaviŭ Dzianis Kučynski.

Jakija ŭmovy prapanujuć demsiły?

Kučynski kaža, što Ofis Cichanoŭskaj nastojvaje na vykanańni minimalnych umovaŭ dla startu kruhłaha stała.

— Sapraŭdnyja pieramovy mohuć być pačatyja tolki paśla spynieńnia represij: spynieńnia palityčna matyvavanych zatrymańniaŭ i sudoŭ, svabody dla palityčnych źniavolenych, — adznačyŭ surazmoŭca. — Vyzvaleńnie Siarhieja Cichanoŭskaha moža być pačatkam, adnak sistemnych źmienaŭ z boku režymu my pakul nie nazirajem, represii praciahvajucca.

Udzielnikaŭ pieramovaŭ z boku demakratyčnych sił musić vyznačać Śviatłana Cichanoŭskaja, ličyć jaje daradca.

— Tolki ŭ jaje jość mandat na hetyja pieramovy jak u lidarki, jakaja maje davier bolšaści biełarusaŭ i mižnarodnaje pryznańnie, — śćviardžaje jon.

Dzianis Kučynski taksama padkreśliŭ, što biez udziełu Cichanoŭskaj, jaje Ofisa, Pierachodnaha kabinieta, Kaardynacyjnaj rady i hramadzianskaj supolnaści luby pieramoŭny farmat nie budzie lehitymnym. Na jahonuju dumku, heta razumiejuć jak mižnarodnyja partniory, tak i režym u Minsku, jaki nie zmoža «razmaŭlać z Zachadam za śpinami biełarusaŭ».

U Ofisie Cichanoŭskaj taksama pierakananyja, što efiektyŭny dyjałoh niemahčymy bieź mižnarodnaha pasiarednictva. Sa słovaŭ daradcy lidarki demsił, sihnały hatoŭnaści da dyjałohu pieradavalisia pradstaŭnikam Łukašenki — i asabista, i publična.

Ci pahodzicca na pieramovy Łukašenka i kali jany mohuć prajści?

Dzianis Kučynski ličyć, što «ŭ siarednieterminovaj pierśpiektyvie» taki kruhły stoł pravieści całkam realna. Jon upeŭnieny, što Łukašenka moža być zacikaŭleny ŭ pieramovach, navat nie adčuvajučy vidavočnaj pahrozy z boku demsiłaŭ. Siarod mahčymych pryčyn daradca Cichanoŭskaj bačyć hieapalityčnuju niestabilnaść praz vajnu va Ukrainie i faktar času.

— Łukašenka nie maładzieje, i jon, i jahonaje atačeńnie razumiejuć, što pytańnie tranzitu ŭłady — heta tolki sprava času, — kaža jon. — Pavodle našaj infarmacyi, unutry samoha režymu ŭžo abmiarkoŭvajucca roznyja scenary — ad «dynastyjnaha pierajemnika» da staŭki na łajalistaŭ abo siłavy błok. Ale jany nie zmohuć być ustojlivymi biez realnaha dyjałohu z hramadstvam i pryznańnia z boku demakratyčnaha śvietu. Ja dumaju, što ŭsio bolš čynoŭnikaŭ unutry sistemy heta taksama razumieje: biez razmovy z hramadstvam i prymireńnia doŭhaterminovaj stabilnaści nie budzie.

Na dumku Kučynskaha, u hetym kantekście pieramovy mohuć stać dla Minska «instrumientam palityčnaha raźliku». U ramkach dyjałohu mohuć abmiarkoŭvacca pytańni asabistaj biaśpieki Łukašenki, sankcyj i vychadu ź izalacyi. Abjadnalnaja tema dla ŭsich bakoŭ, kaža daradca, — zachavańnie suvierenitetu Biełarusi.

— Rana ci pozna pieramovy stanuć niepaźbiežnymi. I lepš, kali heta budzie dyjałoh biełarusaŭ ź biełarusami pry padtrymcy našych zachodnich partnioraŭ. Tamu što alternatyvaj mohuć być «pieramovy» z Kramlom, i jany dakładna nie pojduć na karyść ni našaj niezaležnaści, ni nacyjanalnym intaresam, — skazaŭ na zakančeńnie Dzianis Kučynski.

• 13
• 0
• 11
• 4
• 1
• 0
• 1
• 0