Jeŭrapiejskija čynoŭniki i palityki adreahavali na namier Trampa ŭvieści myty 30% na tavary ź ES. ES dapuściŭ uviadzieńnie mier u adkaz na pošliny Trampa. Niamieckija pramysłoŭcy zaklikali dasiahnuć pahadnieńnia ź Biełym domam, piša DW.
«Uviadzieńnie 30-pracentnych pošlin na ekspart ź ES parušyć najvažniejšyja transatłantyčnyja łancuhi pastavak, što paškodzić pradpryjemstvam, spažyŭcam i pacyjentam abapał Atłantyki», — pryvodzić ahienctva Reuters u subotu, 12 lipienia, słovy staršyni Jeŭrakamisii Ursuły fon der Lajen pra rašeńnie Donalda Trampa ŭvieści pošliny ŭ 30% na pastaŭki tavaraŭ ź Jeŭrasajuza z 1 žniŭnia.
Palityk dadała, što Brusiel hatovy praciahvać pracu nad dasiahnieńniem pahadnieńnia z ZŠA da 1 žniŭnia.
«U toj ža čas my prymiem usie nieabchodnyja miery dla abarony intaresaŭ ES, uklučajučy pryniaćcie suraźmiernych adkaznych mier, kali heta budzie nieabchodna», — zaklučyła jana.
Sam Tramp abiacaŭ, što ŭ vypadku pavyšeńnia taryfaŭ na amierykanskija tavary Vašynhton adkaža simietryčna.
Staršynia Jeŭrapiejskaj rady Antoniu Košta na fonie rašeńnia Trampa zajaviŭ, što Jeŭrasajuz zastajecca «adzinym» i «hatovym abaraniać» svaje intaresy.
«Taryfy — heta padatki. Jany padsiłkoŭvajuć inflacyju, stvarajuć niavyznačanaść i pieraškadžajuć ekanamičnamu rostu. My budziem praciahvać budavać tryvałaje handlovaje partniorstva va ŭsim śviecie», — pieradaje słovy Košty Reuters.
Novyja pošliny Trampa prakamientavali premjer-ministry Italii i Niderłandaŭ.
«My vierym u dobruju volu ŭsich udzielnikaŭ pracesu, kab dasiahnuć spraviadlivaha pahadnieńnia, jakoje ŭmacuje Zachad u cełym, uličvajučy, što, asabliva ŭ ciapierašniaj situacyi, niama sensu pravakavać handlovuju vajnu pamiž dvuma bakami Atłantyki. Zaraz vielmi važna zasiarodzicca na pieramovach, paźbiahajučy palaryzacyi, jakaja ŭskładnić dasiahnieńnie pahadnieńnia», — prakamientavała abiacańnie Donalda Trampa ŭvieści novyja pošliny na tavary ź ES premjer-ministr Italii Džordža Miełoni.
Niderłandski premjer Dyk Schof zajaviŭ, što anansavanyja amierykanskim prezidentam miery «vyklikajuć niepakoj i heta nie krok napierad».
«Jeŭrapiejskaja kamisija moža raźličvać na našu poŭnuju padtrymku. Jak ES, my pavinny zastavacca adzinymi i rašučymi ŭ imknieńni da dasiahnieńnia ŭzajemavyhadnaha vyniku z Złučanymi Štatami», — dadaŭ jon.
Da adzinstva ŭnutry Jeŭrasajuza i zasiarodžanaści na pieramovach z ZŠA zaklikaŭ i ministr zamiežnych spraŭ i handlu Irłandyi Sajman Charys. «Niama nieabchodnaści abvastrać situacyju abo jašče bolš pavyšać dadatkovyja myty, uviedzienyja adnosna ES», — taksama skazaŭ palityk.
Niamieckija pramysłoŭcy zaklikali dasiahnuć pahadnieńnia z Trampam
Fiederalnaje abjadnańnie niamieckaj pramysłovaści (BDI) zaklikała ŭrad Hiermanii, Jeŭrakamisiju i administracyju ZŠA «vielmi chutka znajści rašeńni ŭ miežach abjektyŭnaha dyjałohu i paźbiehnuć eskałacyi».
Asacyjacyja niamieckaj aŭtamabilnaj pramysłovaści (VDA) papiaredziła, što novyja rašeńni Trampa pryviaduć da rostu vydatkaŭ dla aŭtavytvorcaŭ abo pastaŭščykoŭ. «Sumna, što isnuje pahroza dalejšaj eskałacyi handlovaha kanfliktu. <…> Vydatki našych kampanij užo vymiarajucca miljardami, i hetaja suma raście z kožnym dniom», — pryvodzić Reuters słovy prezidentki VDA Childehard Miuler.
Ciapier čytajuć
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał33
Kamientary