Minpryrody ŭviało limity na adnačasovaje znachodžańnie ŭ nacparkach
Ministerstva pryrodnych resursaŭ i achovy navakolnaha asiarodździa ŭviało abmiežavańni na kolkaść ludziej, jakija mohuć adnačasova znachodzicca ŭ asablivych zonach nacyjanalnych parkaŭ «Brasłaŭskija aziory» i «Prypiacki». Heta zroblena dla taho, kab źmienšyć nahruzku na pryrodnyja ekasistemy.
U nacyjanalnym parku «Brasłaŭskija aziory» ŭstanoŭlenyja kankretnyja limity dla roznych učastkaŭ. Na terytoryi «Miadźviedna» płoščaj bolš za 111 hiektaraŭ adnačasova mohuć znachodzicca nie bolš za 124 čałavieki. Na ŭčastku «Zasnudździe» dazvolena nie bolš za 43 naviedvalniki, a na nievialikaj terytoryi «Ababje» — maksimum čatyry čałavieki.
U nacyjanalnym parku «Prypiacki» ŭviali taksama abmiežavańni na źmianieńnie łandšaftu. U rekreacyjnaj zonie ahulnaj płoščaj bolš za tysiaču hiektaraŭ poŭnaje pieraŭtvareńnie terytoryj dapuskajecca tolki na nievialikaj častcy, a značnyja źmieny — na jašče bolš abmiežavanaj płoščy.
Akramia taho, vyznačanaja maksimalnaja kolkaść ludziej, jakaja nie škodzić pryrodzie padčas zboru hryboŭ i jahad. U roznych laśnictvach hetaja norma adroźnivajecca — ad niekalkich dziasiatkaŭ da kala tysiačy čałaviek.
Ustalavanyja i limity dla naviedvańnia ekałahičnych ściežak: naprykład, na ściežcy «Car-sasna» adnačasova mohuć znachodzicca nie bolš za 50 čałaviek, a na maršrucie «Chłupinskaja Buda» — nie bolš za 27.
Razam z tym u nacyjanalnym parku «Prypiacki» adkrytaja rehistracyja na asablivy vodny tur — spłaŭ pa viesnavych raźlivach raki Prypiać. Maršrut atrymaŭ nazvu «Mora Hieradota», jak časam nazyvajuć Prypiać. Padarožža pačynajecca kala vioski Pieraroŭ.
Padčas spłavu ŭdzielniki zmohuć ubačyć pryrodu Paleśsia: pojmiennyja łuhi, staryčnyja aziory, zatoplenyja duby i staražytnyja vierby. Taksama možna budzie nazirać za pieralotnymi ptuškami — lebiedziami, kačkami, husiami, čaplami i kulikami, a jašče daviedacca pra žyćcio babroŭ i ŭbačyć ich chatki. Zapisacca na ŭdzieł možna praz kantakty, raźmieščanyja na sajcie nacyjanalnaha parku.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary