Rasija ŭvodzić śpis mašyn, dazvolenych jak taksi. Zbolšaha łamačča łamaččam

Da apošniaha času rasijski rynak taksi byŭ adnym z samych adkrytych siehmientaŭ aŭtamabilnaha rynku. Dziaržava amal nie rehulavała, na jakich mašynach možna pracavać. Hałoŭnaje, kab aŭtamabil adpaviadaŭ techničnym patrabavańniam i byŭ uklučany ŭ rehijanalny rejestr taksi. Tamu taksaparki i kiroŭcy vybirali madeli, jakija byli najbolš vyhadnymi dla intensiŭnaj ekspłuatacyi.

Pavodle adnaho z halinovych daśledavańniaŭ, u 2025 hodzie samym papularnym aŭtamabilem u rasijskim taksi była Hyundai Solaris. Druhoje miesca zajmała Kia Rio. Razam hetyja dźvie madeli — adnosna tannyja, bo rasijskaj adkrutkavaj zborki — składali kala 40% taksaparka krainy. I tolki na trecim miescy była Lada Granta. Za joj išli Volkswagen Polo i Renault Logan — taksama adkrutkavaj zborki.

Taksi — adzin z najbujniejšych rynkaŭ kupli aŭtamabilaŭ u Rasii. Pavodle acenak, u krainie pracuje kala 1,2 miljona takich mašyn. Aŭtamabili ŭ taksi ŭ siarednim abnaŭlajucca raz na piać—šeść hadoŭ, heta aznačaje popyt prykładna na 200 tysiač novych aŭtamabilaŭ štohod. Heta kala 15% ad usiaho rasijskaha rynku novych mašyn.

Tamu nie dziŭna, što rasijskija ŭłady vyrašyli vykarystać hety siehmient jak instrumient padtrymki ŭłasnaj aŭtamabilnaj pramysłovaści.

Adpaviedna zakona ab łakalizacyi taksi, jaki ŭstupiŭ u siłu z 1 sakavika 2026 hoda, kab aŭtamabil moh być uklučany ŭ rehijanalny rejestr taksi, pavinna vykonvacca adna ź dźviuch umoŭ: jon abo pavinien nabrać nie mienš za 3200 bałaŭ pa ŭzroŭni łakalizacyi (pa toj ža sistemie, što vykarystoŭvajecca ŭ dziaržaŭnych zakupkach), abo być vyrableny ŭ ramkach śpiecyjalnaha inviestycyjnaha kantrakta (ŚPIK), zaklučanaha ŭ pieryjad z 1 sakavika 2022 hoda da 1 sakavika 2025 hoda.

Jak vyhladaje śpis?

Tolki paśla ŭstupleńnia zakona ŭ siłu Ministerstva pramysłovaści i handlu Rasii apublikavała finalny pieralik aŭtamabilaŭ, dazvolenych dla vykarystańnia ŭ taksi. U im 22 madeli.

Najbolš u śpisie pradstaŭleny aŭtamabili «AvtoVAZa» — siem madelaŭ Lada: Granta, Iskra, Vesta, Niva Travel, Niva Legend, Largus i Aura.

Jašče šeść madelaŭ brenda «Maskvič»: «Maskvič 3», «Maskvič 3ie», «Maskvič 6», «Maskvič 8», a taksama madeli M70 i M90.

Astatnija pazicyi zaniali mienš viadomyja marki, jakija źjavilisia ŭ rasijskaj aŭtaindustryi ŭžo paśla 2022 hoda.

Dźvie madeli ŭ śpisie — Sollers SP7 i Sollers SF1. SP7 — heta vialiki pasažyrski miniven, faktyčna viersija kitajskaha JAC Refine RF8, a SF1 — kampaktny kamiercyjny furhon.

Jašče try madeli naležać marcy Evolute — I-Joy, I-Sky i I-Space. Jany faktyčna źjaŭlajucca adaptavanymi viersijami kitajskich madelaŭ kancerna Dongfeng, ale źbirajucca ŭ Rasii.

U pieralik uvajšli taksama try madeli marki Voyah — Free, Dream i Passion. Heta premijalny brend taho ž kitajskaha kancerna Dongfeng. Hetyja aŭtamabili aryjentavanyja na daražejšy siehmient rynku i ŭ taksi, chutčej za ŭsio, buduć vykarystoŭvacca ŭ biznes-kłasie.

Jašče adna pazicyja ŭ śpisie — UMO 5. Heta elektryčny krosovier, jaki tolki pačali vyrablać u Rasii ŭ ramkach novaha prajekta łakalizacyi. Jon stvorany na bazie kitajskaj madeli GAC Aion Y Plus.

Zhodna z novymi praviłami, novyja aŭtamabili dla taksi pavinny być tolki z hetaha pieraliku. Inšamarki, jakija ŭžo pracujuć u taksi, nie buduć zabaronieny adrazu: im dazvolać jeździć da poŭnaha znosu. Ale nabyć novuju takuju mašynu dla pracy ŭžo budzie niemahčyma.

Praŭda, praduhledžanyja vyklučeńni dla asobnych rehijonaŭ. U Kalininhradskaj vobłaści i rehijonach Sibirskaj fiederalnaj akruhi zakon pačnie dziejničać z 1 sakavika 2028 hoda, a na Dalokim Uschodzie — z 1 sakavika 2030-ha.

U toj ža čas i sam pieralik moža źmianiacca. Minpramhandal Rasii zajaŭlaje, što ŭ budučyni ŭ jaho mohuć być uklučanyja, naprykład, krosoviery Haval Jolion, Haval F7 i Haval F7x, jakija vypuskajucca na zavodzie pad Tułaj, a taksama madel Tenet T7, vytvorčaść jakoj naładžvajecca na byłym zavodzie Volkswagen u Kałuzie.

A voś pra Geely, aŭtamabili jakoj vypuskajucca ŭ Biełarusi i papularnyja ŭ Rasii, havorka pakul nie idzie. Jak vynikaje z rašeńnia ŭładaŭ, sajuznaja dziaržava sajuznaj dziaržavaj, a pryjarytet addajecca najpierš ułasnaj rasijskaj vytvorčaści.

• 0
• 0
• 22
• 4
• 0
• 0
• 0
• 0