Biełaruskija turysty, jakija nabyli tury ź Minska ź pieralotam FlyDubai, sutyknulisia ź ciažkaściami
Biełaruskija turysty, jakija nabyvali tury z vyletam ź Minsku avijakampanijaj FlyDubai, nie mohuć viarnucca dadomu i vymušanyja čakać u Abjadnanych Arabskich Emiratach, paviedamlaje Respublikanski sajuz turystyčnych arhanizacyj.
Prablema ŭźnikła paśla rakietnych udaraŭ Irana pa abjektach u rehijonie, u tym liku pa dubajskim aeraporcie.
Sotni hramadzian Biełarusi ciapier čakajuć mahčymaści vylecieć. Turystyčnyja kampanii paviedamlajuć, što rejsy FlyDubai pamiž Dubajem i Mienskam masava skasoŭvajucca. Naprykład, byŭ admienieny rejs na 5 sakavika, jaki pavinien byŭ zabrać pasažyraŭ, što płanavali viarnucca ŭ hety dzień. Skasavany taksama rejs na 6 sakavika. Pry hetym niezrazumieła, kali zmohuć viarnucca ludzi, čyje vylety byli zapłanavanyja jašče na kaniec lutaha.
Biełaruskaja avijakampanija «Biełavija» ŭžo arhanizavała niekalki evakuacyjnych rejsaŭ z Dubaja ŭ Miensk. Adnak trapić na ich składana, bo miescaŭ mała. Akramia taho, pasažyram treba kuplać novyja kvitki, što aznačaje dadatkovyja vydatki. Pakul biełaruskija turapieratary apłačvajuć padaŭžeńnie pražyvańnia turystaŭ, jakija zastalisia ŭ Emiratach.
Adznačajecca, što rejsy FlyDubai z Dubaja ŭ Maskvu praciahvajuć vykonvacca. Tamu niekatoryja biełaruskija turysty, jakija prylacieli praz rasijskuju stalicu, užo viartajucca dadomu hetym maršrutam. Turystyčnyja kampanii razhladajuć mahčymaść adpraŭlać ludziej praz Maskvu, bo z vyletami ŭ Minsk situacyja pakul niavyznačanaja.
Asabliva ciažkaja situacyja ŭ tych biełarusaŭ, jakija znachodziacca na addalenych kurortach — naprykład, na Maldyvach abo Zanzibary. Bolšaść ź ich taksama lacieła rejsami FlyDubai, i ciapier niezrazumieła, jak jany zmohuć viarnucca.
Pavodle acenak kiraŭnika «Biełavija» Ihara Čarhinca, u AAE mahli zatrymacca kala tysiačy hramadzian Biełarusi. 4 sakavika kampanija vykanała dva evakuacyjnyja rejsy z Dubaja ŭ Minsk, na jakich znachodzilisia bolš za 470 pasažyraŭ, u tym liku niemaŭlaty. 5 sakavika ŭ Biełaruś taksama prylacieŭ evakuacyjny rejs z Amana.
«Biełavija» płanuje praciahvać vyvaznyja rejsy na hetym i nastupnym tydni. Akramia taho, kampanija čakaje źmianieńniaŭ u abmiežavańniach pavietranaj prastory, kab arhanizavać evakuacyjny rejs z katarskaj Dochi. Taksama pasažyram prapanujuć viarnuć hrošy za kvitki ŭ Dubaj, nabytyja z dataj vyletu da 31 sakavika.
Turysty, jakija zachraśli ŭ AAE, viartajucca dadomu: pieršy vyvazny rejs «Biełavija» pryziamliŭsia ŭ Minsku
U Minsk z Dubaja viarnuli jašče 283 biełarusaŭ
«Basiejny zakrytyja, na plažy rekamiendujuć nie chadzić». Što kažuć turysty ŭ AAE i Katary
Dva biełaruskija tenisisty nie mohuć vylecieć z AAE. Evakuacyju prapanujuć za 5 tysiač jeŭra
«Pad kaniec adpačynku daviedalisia, što tut niama schoviščaŭ». Biełarusy, što znachodziacca ŭ AAE, raskazali, jak im tam ciapier
«Biełarusy i ŭ Dubai biełarusy». Jak suajčyńniki arhanizavali dapamohu tym, chto nie moža viarnucca damoŭ praz zakrytaje nieba
Kamientary