«Pad kaniec adpačynku daviedalisia, što tut niama schoviščaŭ». Biełarusy, što znachodziacca ŭ AAE, raskazali, jak im tam ciapier
Kala 3 tysiač biełarusaŭ, jakija nabyli tury praz turahienctvy, zaraz znachodziacca ŭ rehijonie Blizkaha Uschodu. Bolš za ŭsio našych suajčyńnikaŭ pravodziać adpačynak u AAE: zvyš 2,5 tysiač čałaviek. Vydańnie «Salidarnaść» pahladzieła, čym dzielacca našy ziemlaki ŭ sacsietkach, a taksama na ŭmovach ananimnaści raspytała surazmoŭcaŭ pra atmaśfieru ŭ AAE hetymi dniami.
«Štości ŭžo nikudy nie chočacca»
«U pieršyja dni byli čutnyja vielmi hučnyja huki ad pracy SPA. Zaraz bolš šumu ŭ navinach, a ŭ Dubai spakojna, ludzi viečarami hulajuć», — śćviardžaje adzin ź biełarusaŭ, pakazvajučy mini-rolik u tyktoku.
Inšyja, adnak, pościać fota i videa amal pustych plažaŭ i basiejnaŭ pry hatelach, kudy «nie puskajuć ź mierkavańniaŭ biaśpieki».
«Na plažy 1 sakavika było pusta jak nikoli — jak zmročna pažartavaŭ miascovy achoŭnik, usie ŭ aeraporcie, čakajuć mahčymaści vyletu, — koratka apisała situacyju jašče adna biełaruska, pucioŭka jakoj zakančvajecca praź piać dzion. — Ciapier viarnulisia, urad rekamienduje nie jechać u aeraport, kab nie stvarać natoŭpu, a čakać paćviardžeńnia vyletu ad avijakampanii. Ja raźličvaju, što nam užo ŭdasca viarnucca dadomu narmalna».
U Threads biełarusy raskazvajuć, što znachodziacca na suviazi z konsulstvam i turapierataram.
«Siamju maich znajomych u Fudžejry vysialajuć z hatela i zasialajuć nazad kožny dzień, u nadziei na evakuacyjny rejs, ale jaho pakul nie paćvierdzili», — padzialiłasia adna z karystalnic sietki.
«Naš turapieratar daŭ praściejšy hatel zamiest taho, dzie žyli da kanca tura. Pakul praciahnuli da 4 sakavika. Siadzim roŭna, čakajem, kali zmožam palacieć», — apisała svaju situacyju inšaja biełaruska.
«Ad flyDubai pryjšła infarmacyja być napahatovie, užo siońnia moža adbycca vyvazny rejs».
«A ŭ nas vylet u Dubaj zapłanavany na 10 sakavika, ale štości ŭžo nikudy nie chočacca. Płanujem pamianiać kirunak, kali heta možna budzie zrabić bieź pierapłat».
«Darečy, u nas byŭ tur u AAE ź Minska na 2 krasavika, pamianiali na Jehipiet. Niejak z-za apošnich padziej achvota adpała tudy lacieć, navat kali ŭsio dobra budzie, asadak [zastaŭsia]».
«My zaraz tut. Prosta nad nami ničoha nie lotaje, ale pracu SPA čujem. I nijakaha adčuvańnia adpačynku i biaśpieki niama. Molimsia, kab chutčej atrymałasia palacieć».
«Biełarusy tut samaarhanizavalisia ŭ čatach i prapanujuć dapamohu i padtrymku, chto čym moža. Čytała, što adny chłopcy, miascovyja biełarusy, biaspłatna dastaŭlajuć ježu tym, u kaho, miakka kažučy, składanaja situacyja. Mnie nie treba, ale ŭsio roŭna zachaplajusia i hanarusia — našy ludzi!»
«Zaraz cicha. Ale niervova»
U Dubai zaraz znachodzicca siamja hrodzienca Vani Ściacenki. Chłopčyk z myšačnaj mijadystrafijaj Dziušena, jakomu biełarusy źbirali hrošy na darahi preparat usim śvietam, prachodzić tut lačeńnie.
Vanina mama Alaksandra padzialiłasia ŭ sacsietkach, što paśla ŭdaraŭ 1 sakavika ŭ klinicy na dzień admianili pryjom dla biaśpieki maleńkich pacyjentaŭ. Zaraz, pa jaje słovach, usio cicha, ale siońnia ŭnačy ŭsio ž prychodzili tryvožnyja (i vielmi hučnyja) apaviaščeńni na telefony.
Pra toje, što 3 sakavika «cicha», kaža i surazmoŭca «Salidarnaści». Jana znachodzicca ŭ Abu-Dabi.
«Prosta zaraz cicha. Ale niervova, — raskazała biełaruska, jakaja pravodzić adpačynak ź siamjoj. — Čytała ŭ navinach, što siońnia ŭ pramysłovym rajonie Fudžejry byŭ naftavy pažar praz abłomki drona, ale byccam by paciarpiełych niama. Nie viedaju, ci patušyli ŭžo. U nas tut, viadoma, ničoha nie było čuvać, heta bolš za 200 kiłamietraŭ adlehłaść.
Zatoje my pad kaniec adpačynku daviedalisia, što ŭ Emiratach niama schoviščaŭ, naohuł. Lepš by i dalej žyli biez hetych viedaŭ. U jakaści schovišča — padziemnyja parkoŭki abo mietro, ci prosta kali abviaščajuć tryvohu, kažuć zastavacca ŭ hateli. Nu, my i siadzim. Kramy i restarany pracujuć jak zvyčajna.
Starajusia navin mienš čytać, asabliva ruskamoŭnych — bolš paniki, čym infarmacyi. A ź inšaha boku, zaŭvažyła za hetyja dni ŭ instahramie vialikuju kolkaść adnatypnych rolikaŭ, dzie ruskamoŭnyja błohierki raskazvajuć, što «im nie strašna», bo «ich abaraniajuć» — i fota šejcha vystaŭlajuć. Jak pad kapirku na zamovu zroblena, kab pakupniki nieruchomaści i inviestary nie raźbiehlisia, vidać.
Spadziajomsia na toje, što konsulstva i turapieratar znojduć varyjanty, kab chutčej vyvieźci svaich. Chacia treba addać naležnaje miascovaj administracyi, usie vielmi dobrazyčlivyja i ciarplivyja, niahledziačy na abstaviny i vialikuju kolkaść turystaŭ (tamu što tych, chto zachras, turfirmy raśsialajuć u hateli nižej kłasam, dzie jość volnyja miescy)».
Što pościać biełaruskija sielebrycis, jakija apynulisia pad bombami i dronami ŭ krainach Bližniaha Uschodu
«Basiejny zakrytyja, na plažy rekamiendujuć nie chadzić». Što kažuć turysty ŭ AAE i Katary
U AAE, Katary i Amanie zastajucca bolš za try tysiačy biełaruskich turystaŭ
«Poŭnaja niavyznačanaść». Što budzie z turystami, jakija płanavali adpačynak u AAE ŭ sakaviku?
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi6
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary