«Poŭnaja niavyznačanaść». Što budzie z turystami, jakija płanavali adpačynak u AAE ŭ sakaviku?
Z-za abastreńnia kanfliktu pamiž Iranam i Izrailem z ZŠA mnohija turysty nie mohuć pakinuć krainy Blizkaha Uschodu (pavodle apošnich źviestak, tam zastajucca da 3 tysiač biełarusaŭ). Płanujecca, što siońnia rejsam Dubaj — Minsk viernucca pieršyja pasažyry z avijabiletami na 28 lutaha. Ale jość jašče adna katehoryja ludziej, jakaja znachodzicca ŭ padviešanym stanie, — tyja, chto płanavaŭ lacieć tudy ŭ bližejšy čas i ŭžo apłaciŭ tur, piša «Anłajnier».
U situacyju poŭnaj niavyznačanaści trapiła čytačka «Anłajniera» Aksana. Dziaŭčyna źbirałasia lacieć u Dubaj ź siamjoj 10 sakavika. Na praciahu niekalkich dzion joj nie ŭdavałasia atrymać adkaz, ci možna całkam viarnuć hrošy za tur, kali jana vyrašyć admianić pajezdku.
«Rejsy na najbližejšyja 7—10 dzion, viadoma, nichto nie admianiaje. Turapieratary, spasyłajučysia na heta, pakidajuć našy tury aktyŭnymi, — pisała ŭ redakcyju dziaŭčyna ŭčora, 2 sakavika. — U vyniku my staim pierad vybaram: albo lacieć z ryzykaj dla adpačynku (bo plažy i basiejny zakrytyja, a vychad u horad — pad adkaznaść turystaŭ), albo dobraachvotna admaŭlacca ad tura sa strataj srodkaŭ».
Paźniej na sajcie turapieratara «Kompas» (praź jaki Aksana braniravała svoj tur) źjaviłasia infarmacyja pra toje, što zajaŭki z vyletami da 16 sakavika mohuć być anulavanyja z poŭnym viartańniem hrošaj turystam. Aksana ŭžo źviazałasia z turahientam i damoviłasia pra anulavańnie. Hrošy abiacajuć viarnuć na praciahu 14 pracoŭnych dzion.
«U nas byŭ tur u hatel na «ŭsio ŭklučana» za $5500 pa rańnim braniravańni. Nam prapanavali Jehipiet, padobny pa canie, na 21 sakavika, ale jon taksama milhaje ŭ navinavych zvodkach. Jak varyjant, za svaje hrošy možna było kupić novy tur na inšy kirunak, naprykład u Vjetnam ci na Maldyvy, dzie ceńnik na čaćviarych užo ad $7000. Dla nas heta zanadta doraha. Unutry siamji my tak i nie zmahli damovicca, tamu vyrašyli pieranieści adpačynak da asieńnich kanikuł».
Admiena turaŭ: u jakich vypadkach viernuć hrošy całkam?
Pra toje, jakija varyjanty zaraz prapanujuć biełarusam, «Anłajnier» pahavaryŭ ź niekalkimi turapieratarami.
Voś što raskazali ŭ «Kompasie»:
«Usie hetyja dni my śpim pa try hadziny — vyrašajem arhanizacyjnyja pytańni. Našych turystaŭ my nie kidajem — šukajem im hateli, tranśfier, arhanizujem charčavańnie. Siońnia płanujecca pieršy rejs ad Belavia, kab dastavić dadomu tych, chto nie palacieŭ 28 lutaha. Što tyčycca turaŭ na pačatak — siaredzinu sakavika, to tak, my hatovyja prapanavać alternatyvu abo viartańnie srodkaŭ», — kamientuje dyrektar KOMPAS Touroperator Ivan Danilkievič.
Turystam, čyj rejs aficyjna admienieny Belavia, viernuć hrošy ŭ 100%-m abjomie, paćviardžaje kiraŭnik kampanii «Tajm Vajaž» Rusłan Siehianiuk. Ź nieadmienienymi rejsami ŭsio składaniej:
«Kali rejs aficyjna jašče nie admienieny, admovicca ad palotu možna, ale ŭ takim vypadku razhladajucca faktyčna paniesienyja vydatki. Hateli nie admianiajuć braniravańnie biez apłaty. My taksama prapanujem pieranos vyletu ŭ tyja ž Emiraty na paźniejšy termin, pačynajučy z krasavika, abo inšyja kirunki: Turcyju, Hruziju, Vjetnam, Šry-Łanku, Kitaj, Tajłand».
U Softtour situacyja inšaja. Tam adznačajuć, što turysty ŭ asnoŭnym admaŭlajucca ad pajezdak:
«Usie rejsy z vyletam da 6 sakavika admienienyja. U asnoŭnym našy turysty afarmlajuć viartańnie srodkaŭ. Padabrać inšyja varyjanty prablematyčna: naprykład, u Jehipiet zastalisia apošnija kvitki na 7 sakavika, u Aziju varyjanty jość tolki na kaniec miesiaca».
Učarašni čartarny rejs Minsk — Sałała viartajecca ŭ Minsk
U AAE, Katary i Amanie zastajucca bolš za try tysiačy biełaruskich turystaŭ
Dla biełaruskich turystaŭ, jakija znachodziacca na Blizkim Uschodzie, vydali instrukcyju
Najbujniejšaja admiena rejsaŭ z časoŭ pandemii — vajenny kanflikt na Blizkim Uschodzie spravakavaŭ chaos u niebie
Kamientary