U Kitai paśla čystak vajskoŭcaŭ uzialisia i za cyvilnych čynoŭnikaŭ

4 i 5 sakavika ŭ Piekinie prachodzić čaćviortaja siesija 14‑ha sklikańnia Usiekitajskaha schodu narodnych pradstaŭnikoŭ. U hety orhan uvachodziać hubiernatary pravincyj, vajskovaje kiraŭnictva i kiraŭniki bujnych pradpryjemstvaŭ. Adnak sioleta kolkaść delehataŭ akazałasia najmienšaj z 2000 hoda, što moža śviedčyć ab pašyreńni kampanii suprać niełajalnaści i karupcyi.

Pa słovach staršyni Pastajannaha kamiteta schodu Čžaa Łeczi, na adkryćci siesii ŭ Vialikaj zale narodnych schodaŭ prysutničali 2765 deputataŭ. Heta najmienšy pakazčyk z pačatku stahodździa. 113 delehataŭ — amal 4% ad ahulnaj kolkaści — na siesiju nie pryjšli, i pryčyny ich adsutnaści nie byli nazvanyja. Heta samaja vialikaja kolkaść adsutnych za čas kiravańnia Si Czińpina, kali nie ličyć 2022 hod, kali mnohija prapuścili siesiju z-za karanavirusnych abmiežavańniaŭ.

U siarednim uzrovień niajaŭki ŭ hetym hodzie amal udvaja pieravyšaje siaredni pakazčyk za apošnija 13 hadoŭ, jaki składaŭ kala 2%.

Akramia taho, u hetyja ličby nie ŭvachodziać tyja deputaty, jakija ŭžo byli aficyjna adchilenyja ad udziełu ŭ pracy schodu. Z 2023 hoda kolkaść delehataŭ skaraciłasia na 99 čałaviek — heta samaje značnaje źnižeńnie za try terminy kiravańnia Si Czińpina. Častku čynoŭnikaŭ adchilili ŭ miežach antykarupcyjnaj kampanii, niekatoryja pajšli ŭ adstaŭku, a niekalki čałaviek pamierli.

Vialikaja kolkaść adsutnych vyklikała pytańni pra toje, ci nie źviazana heta z rasśledavańniami ŭ dačynieńni da niekatorych deputataŭ. Pavodle analitykaŭ, maštab palityčnych represij u krainie moža być značna bolšy, čym mierkavałasia raniej, piša ahienctva Bloomberg.

Raniej Si Czińpin pravioŭ najbujniejšyja za apošnija piaćdziasiat hadoŭ kadravyja pierastanoŭki ŭ Narodna-vyzvalenčaj armii Kitaja, pakinuŭšy ŭ vyšejšym kiraŭnictvie tolki adnaho hienierała. U kancy studzienia jon adchiliŭ ad pasadaŭ dvuch vysokapastaŭlenych vajskoŭcaŭ, abvinavačanych u karupcyi, u tym liku adnaho z hałoŭnych kiraŭnikoŭ uzbrojenych sił — hienierał-pałkoŭnika Čžana Jusia.

Na dumku niekatorych krynic, pryčyny takich dziejańniaŭ nie zusim zrazumiełyja. Adnyja ličać, što heta moža być źviazana ź niedavieram i stracham pierad palityčnymi praciŭnikami, inšyja — z žadańniem zmahacca z karupcyjaj u armii. Taksama isnuje mierkavańnie, što praz čystki Si Czińpin imkniecca maksimalna skancentravać uładu ŭ svaich rukach, kab paśla ničoha nie pieraškadžała mahčymym płanam adnosna Tajvania.

• 1
• 0
• 2
• 2
• 0
• 0
• 1
• 1