Radzina: Cichanoŭskaja chłusić pra abstaviny vyjezdu ź Biełarusi ŭ žniŭni 2020

Śviatłana Cichanoŭskaja patłumačyła ŭ intervju, što pahadziłasia vyjechać ź Biełarusi ŭ žniŭni 2020 hoda, bo bajałasia za los svaich dziaciej. Kadebisty zastrašyli jaje, što aryštujuć jaje samu, a dzieci ŭrešcie apynucca ŭ dziciačym domie.

«Kali pryjšła ŭ CVK, mianie sustreli dvoje supracoŭnikaŭ KDB. Jany adviali mianie ŭ asobny pakoj i pačali razmovu. Jany pačali zapužvać, šantažavać maimi dziećmi. Kazali, što viedajuć, dzie jany znachodziacca. Što ja budu zatrymanaja. Što ź imi zrobiać u dziciačym domie. Što ja nie ŭbaču, jak jany rastuć. Ja — maci. Mnie detalova apisali, što čakaje maich dziaciej u dziciačym domie. A starejšamu synu patrebnyja śpiecyjalnyja kachlearnyja impłantaty, batarejki, čystka. Heta było dadatkovym ciskam».

Natalla Radzina rezka adreahavała na hetaje vykazvańnie i raskazała svaju viersiju padziej:

«Słovy Cichanoŭskaj pra dziaciej i pryčyny jaje vyjezdu — heta cyničnaja chłuśnia.

Da dnia vybaraŭ, 9 žniŭnia, dzieci Śviatłany Cichanoŭskaj byli ŭ biaśpiecy. Jašče ŭ siaredzinie lipienia razam z maci Śviatłany dzieci vyjechali ŭ Vilniu.

Nahadaju, što na pačatku červienia, paśla aryštu Siarhieja Cichanoŭskaha, jahonaja žonka źviarnułasia da mianie z prośbaj vyvieźci jaje razam ź dziećmi za miažu, bo «palityka — heta nie jaje», i joj pačali pastupać pahrozy z-za ŭdziełu ŭ vybarach. Ja źviarnułasia tady ŭ MZS Litvy z prośbaj zrabić litoŭskija vizy dla Śviatłany, jaje maci i dziaciej. Zrabić heta było niaprosta, bo tady išła epidemija karanavirusu, i biełarusaŭ nie ŭpuskali ŭ krainy ES z-za adsutnaści karancinu ŭ krainie. Bolš za toje, u litoŭskich dypłamataŭ tady byli pytańni nakont samoj Cichanoŭskaj, bo ŭ Litvie jaje nichto nie viedaŭ.

Tym nie mienš, pad maje harantyi vizy byli vydadzieny, i maci Śviatłany ź dziećmi pryjechała ŭ Vilniu, dzie ja zahadzia za svaje srodki źniała dla ich trochpakajovuju kvateru.

Adznaču, što sama Cichanoŭskaja zadoŭha da dnia vybaraŭ nieadnarazova prasiła mianie dapamahčy joj vyjechać ź Biełarusi. Kožny raz mnie davodziłasia ŭhavorvać jaje zastacca ŭ krainie na čas vybarčaj kampanii. Ludzi z palityčnym dośviedam razumieli, što Łukašenka budzie falsifikavać vybary, i bolšaść biełarusaŭ byli nastrojeny supraćstajać hetamu. Ale kab arhanizavać pratesty, byŭ patrebny chacia b adzin naminalny apazicyjny kandydat.

Zajava Cichanoŭskaj pra toje, što jana źjechała ŭ Vilniu z-za pahrozy, što jaje dziaciej mohuć adpravić u dziciačy dom, — heta chłuśnia».

Radzina padsumoŭvaje tym, što nazyvaje sapraŭdnymi lidarami biełaruskaj revalucyi 2020 hoda Mikołu Statkieviča, Paŭła Sieviarynca, Jaŭhiena Afnahiela, Ihara Alinieviča, Siarhieja Cichanoŭskaha i inšyja advažnych biełarusaŭ, jakija pačali pratesty, a paśla apynulisia ŭ turmach.

«Sapraŭdnym hierojem źjaŭlajecca biełaruski narod, a nie samazvancy, jakija źlili revalucyju», — kaža Radzina, vidavočna namiakajučy na Śviatłanu Cichanoŭskuju i jaje atačeńnie.

• 32
• 21
• 5
• 36
• 3
• 1
• 1
• 0