Piaskoŭ nazvaŭ umovu, pry vykanańni jakoj vajna imhnienna zaviaršyłasia b
Pres-sakratar prezidenta Rasii Dźmitryj Piaskoŭ u intervju francuzskamu vydańniu Le Point zajaviŭ, što vajna va Ukrainie moža być nieadkładna spynienaja, kali Kijeŭ pahodzicca vyvieści vojski z terytoryi čatyroch ukrainskich abłaściej — Danieckaj, Łuhanskaj, Zaparožskaj i Chiersonskaj. Hetyja rehijony, častkova akupavanyja rasijskaj armijaj, Maskva nazyvaje svaimi.
«Kali b Ukraina vyvieła svaje vojski z hetych čatyroch rehijonaŭ, to tak. Usie čatyry rehijony zamacavanyja ŭ našaj kanstytucyi jak nieadjemnyja častki Rasii», — padkreśliŭ Piaskoŭ, adkazvajučy na pytańnie pra mahčymaść chutkaha ŭrehulavańnia kanfliktu.
Pry hetym adstaŭka Uładzimira Zialenskaha, pavodle słoŭ Piaskova, nie ŭvachodzić u lik patrabavańniaŭ Rasii pa Ukrainie, ale lubyja padpisanyja im dakumienty, maŭlaŭ, mohuć być asprečanyja z-za jaho «nielihitymnaści».
Raniej vydańnie Financial Times, spasyłajučysia na infarmavanyja krynicy, paviedamlała, što Uładzimir Pucin padčas sustrečy sa śpiecyjalnym pradstaŭnikom prezidenta ZŠA Donalda Trampa Styvam Uitkafam nibyta vykazaŭ hatoŭnaść zamarozić bajavyja dziejańni na biahučaj linii frontu ŭ ramkach mahčymaha mirnaha pahadnieńnia.
Maskva, pavodle infarmacyi vydańnia, nibyta zhodnaja admovicca ad pretenzij na čatyry ŭkrainskija rehijony ŭ abmien na pryznańnie ZŠA anieksii Kryma i de-fakta — kantrolu Rasii nad astatniaj akupavanaj terytoryjaj. Adnak nieŭzabavie paśla vychadu materyjału Piaskoŭ nazvaŭ publikacyju «fejkam».
Prezident ZŠA Donald Tramp 18 krasavika papiaredziŭ, što ZŠA mohuć vyjści ź pieramoŭnaha pracesu, kali jaki-niebudź z bakoŭ — rasijski ci ŭkrainski — budzie abciažarvać dasiahnieńnie pahadnieńnia. Dziaržsakratar Marka Rubia nieŭzabavie admianiŭ pajezdku na sustreču z pradstaŭnikami Ukrainy i krain ES u Łondanie 23 krasavika. Pryčynaj, pavodle źviestak krynic New York Times, stała admova prezidenta Uładzimira Zialenskaha pahadzicca z punktam amierykanskaha mirnaha płana, jaki praduhledžvaje pryznańnie Kryma častkaj Rasii.
23 krasavika vice-prezident ZŠA Džej Dzi Vens vystupiŭ z zajavaj, u jakoj padkreśliŭ: spynieńnie vajny mahčymaje tolki ŭ vypadku ŭzajemnych terytaryjalnych sastupak. Pavodle jaho słoŭ, urehulavańnie kanfliktu praduhledžvaje, što Ukraina admovicca ad častki svajoj terytoryi, a Rasija, u svaju čarhu, viernie peŭnyja zaniatyja rajony.
«Nieabchodna pajści na terytaryjalnyja abmieny. […] Skłaści zbroju, zamarozić kanflikt i prystupić da realnaha budaŭnictva lepšaj budučyni — i dla Rasii, i dla Ukrainy», — zajaviŭ Vens.
Pavodle krynic vydańnia Axios, amierykanski płan praduhledžvaje, što Rasija vyviedzie vojski z Charkaŭskaj vobłaści, niaznačnuju častku jakoj jana ciapier kantraluje. Uzamien Kijeŭ pavinien jurydyčna pryznać Krym rasijskim i de-fakta pahadzicca sa strataj amal usioj Łuhanskaj vobłaści, a taksama častak Danieckaj, Zaparožskaj i Chiersonskaj abłaściej.
Tramp raskrytykavaŭ Zialenskaha za zajavu, što Ukraina nikoli nie pryznaje Krym rasijskim
ZŠA prapanujuć Ukrainie mirny płan, jaki dazvolić Pucinu zachavać zachoplenyja terytoryi. Stali viadomyja amierykanskija prapanovy
Pucin prapanavaŭ spynić kanflikt pa ciapierašniaj linii frontu — Financial Times
Zialenski: Ukraina jurydyčna nie pryznaje akupacyju Kryma, jość Kanstytucyja
Pakazali partret Trampa, jaki jamu ŭ sakaviku padaryŭ Pucin
Kamientary