Zialenski: Ukraina jurydyčna nie pryznaje akupacyju Kryma, jość Kanstytucyja
Ukraina nikoli nie pryznaje jurydyčna akupacyju Kryma Rasijaj, bo heta supiarečyć Kanstytucyi i suvierenitetu dziaržavy. Pra heta padčas razmovy z žurnalistami 22 krasavika zajaviŭ prezident Ukrainy Uładzimir Zialenski, paviedamlaje «Suśpilnie».
«Ukraina nie pryznaje jurydyčna akupacyju Kryma. Heta naša terytoryja, terytoryja naroda Ukrainy. Nam niama pra što havaryć na hetuju temu — heta pa-za našaj Kanstytucyjaj», — zajaviŭ Zialenski.
Pavodle słoŭ prezidenta Ukrainy, abmierkavańnie pytańnia Kryma i inšych časova akupavanych Rasijaj viadzie tolki da zaciahvańnia vajny.
«Jak tolki my pačynajem kazać pra Krym, pra našyja suvierennyja terytoryi, my zachodzim u farmat zaciahvańnia vajny — mienavita hetaha choča Rasija. My ŭžo 12-y hod vajujem. Heta i jość adkaz na pytańnie, ci možna z Rasijaj damovicca pa terytoryjach», — adznačyŭ Zialenski.
Jon padkreśliŭ, što chutka damovicca z Rasijaj niemahčyma, i bieź cisku z boku mižnarodnaj supolnaści, pierš za ŭsio ZŠA, dasiahnuć vyniku nie atrymajecca.
«Cisk patrebny ŭsiamu śvietu, pierš za ŭsio Amierycy. My padtrymali inicyjatyvu prezidenta Trampa pa biezumoŭnym spynieńni ahniu. Ale sproba «damovicca pra ŭsio adrazu ŭ adzin dzień» nie spracuje», — padkreśliŭ Zialenski.
Jon taksama zajaviŭ, što Ukraina nie maje namieru admaŭlacca ad ustupleńnia ŭ NATA biez nadańnia dakładnych harantyj biaśpieki. Zialenski nahadaŭ, što Złučanyja Štaty pakul faktyčna nie padtrymlivajuć ustupleńnie Ukrainy ŭ NATA, choć jurydyčna takoha rašeńnia nie prymali. Jon adznačyŭ, što Rasija, jak ahresar i ŭdzielnik vajny, nie maje nijakaha prava ŭpłyvać na hetyja pracesy.
«Kali my chočam być kanstruktyŭnymi vielmi, A što naŭzamien? Heta značyć, jakija harantyi biaśpieki [dla Ukrainy]? I tady Amieryka kaža: «Voś vam takija harantyi biaśpieki». Heta dyjałoh? Heta dyjałoh. A što Rasija nam daje za heta? Kali my admaŭlajemsia ad NATA, ad čaho admaŭlajecca Rasija?» — skazaŭ Zialenski.
Prezident Ukrainy taksama paćvierdziŭ, što ZŠA i Rasija, vierahodna, viaduć dyjałoh adnosna budučyni Ukrainy ŭ NATA, ale rašeńnie pavinna prymacca nie biez udziełu samoj Ukrainy. Hetak ža, padkreśliŭ Zialenski, z udziełam ukrainskaha boku pavinny adbyvacca lubyja damoŭlenaści adnosna Zaparožskaj atamnaj elektrastancyi.
Adnosna mahčymaści stvareńnia niejtralnaj zony vakoł Zaparožskaj AES Zialenski adznačyŭ, što stancyja nie pracuje biez ukrainskaha piersanału, i luboje mižnarodnaje kiravańnie abjektam mahčyma tolki pry ŭdziele ŭkrainskich śpiecyjalistaŭ:
«Adrazu źjaŭlajecca pytańnie: dostup da vady, infrastruktura žyćcia hetych ludziej, jany hramadzianie Ukrainy, biaśpieka hetych ludziej, što z Enierhodaram? Dzie jany buduć žyć, što ź ich dziećmi, viarnuć ich dziaciej dadomu ci nie? Šmat pytańniaŭ. Što možna padpisać ci nie padpisać? Na što možna pahadzicca ci nie pahadzicca?»
Zialenski taksama padkreśliŭ, što aficyjnych prapanoŭ adnosna niejtralnaha statusu ZAES nie pastupała. U toj ža čas Ukraina adkrytaja da partniorstva z ZŠA ŭ adnaŭleńni abjektaŭ krytyčnaj infrastruktury, u pryvatnaści, na ŭmovach raŭnapraŭnaha supracoŭnictva.
«U nas ciapier jość «Mator Sič», siońnia prylacieła rakieta. Kali ZŠA dajuć Patriot, jaki abaraniaje «Mator Sič», chaj zachodziać i budziem pracavać razam. Patriot kaštuje 1,5 miljarda dalaraŭ. Pastaŭ Patriot, 1,5 młrd — ty ŭkłaŭ, ty — partnior «Mator Sičy». Toje samaje sa stancyjaj. Amieryka i ja nie baimsia ŭstupać u partniorstva, ale partniorstva — heta partniorstva».
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary