Tramp ciopła pryniaŭ premjera Italii Miełoni. Skazaŭ, što nie vinavacić Zialenskaha ŭ vajnie va Ukrainie

Džordža Miełoni pradstaŭlaje idejna blizkuju Trampu nacyjanał-kansiervatyŭnuju partyju «Braty Italii», i choć Tramp kiepska stavicca da Jeŭrasajuza ŭ cełym, dla Miełoni jon robić vyklučeńnie. Jana była adzinaj jeŭrapiejskaj lidarkaj na jaho inaŭhuracyi.

«Ja liču, što jana — cudoŭnaja premjer-ministr. Jana fantastyčna dobra pracuje. Jana — adna z sapraŭdnych suśvietnych lideraŭ», — skazaŭ Tramp pierad pieramovami za začynienymi dźviaryma.

Pry hetym Džordža Miełoni — davoli prajeŭrapiejski palityk, jana padtrymlivaje adzinstva i intehracyju krain Jeŭrasajuza, a taksama aktyŭna vykazvajecca za padtrymku Ukrainy i supraćdziejańnie Rasii. Tamu lidary inšych jeŭrapiejskich krain spadziajucca, što jana zmoža padšturchnuć Trampa da zaklučeńnia handlovaj damovy ź ES i dapamoža paźbiehnuć vialikaj handlovaj vajny.

Pierad pačatkam pieramovaŭ Džordža Miełoni skazała, što meta jaje vizitu — pačać pieramovy i zaprasić Trampa ŭ Italiju, dzie jana spadziajecca arhanizavać jaho sustreču i ź inšymi jeŭrapiejskimi lidarami.

Paśla pieramovaŭ jana paviedamiła, što Tramp pryniaŭ zaprašeńnie ŭ Rym.

Pry hetym pra handlovuju damovu pamiž ZŠA i Jeŭrasajuzam Tramp i Miełoni pry žurnalistach amal nie kazali — Tramp pierad sustrečaj adzin na adzin zajaviŭ tolki, što jana «na 100 pracentaŭ budzie, ale jana budzie sumlennaj».

Tramp i Miełoni addavali pieravahu temam, u jakich u ich niama razychodžańniaŭ — takim, naprykład, jak imihracyja. 

Pres-kanfierencyju paśla pieramovaŭ Miełoni pačała z zajavy, što jany z Trampam — sajuźniki ŭ baraćbie ź levaj ideałohijaj i palitykaj DEI («raznastajnaść, roŭnaść i inkluziŭnaść»). Nośbity hetaj ideałohii, pavodle jaje słoŭ, chočuć źniščyć historyju zachodnich krain. Tramp zhodna kivaŭ.

Zatym Miełoni, pierafrazavaŭšy łozunh Trampa «zrobim Amieryku znoŭ vialikaj», skazała, što ZŠA i Jeŭropa razam pavinny «zrabić Zachad znoŭ vialikim».

Miełoni ŭ razmovie z Trampam pastarałasia «nacisnuć na ŭsie pravilnyja knopki».

Zialenski ŭžo nie raźviazvaŭ vajnu

U chodzie pres-kanfierencyi žurnalisty zadali Trampu i Miełoni niekalki pytańniaŭ pra Ukrainu.

Miełoni jašče ŭ ustupnym słovie znoŭ padkreśliła, što ZŠA i Jeŭropa pavinny być adzinymi: «My razam abaraniali svabodu Ukrainy, i my razam možam damahčysia tryvałaha miru».

Tramp, u pryvatnaści, vykazaŭ słovy, ź jakich vynikaje, što jon užo znoŭ nie vinavacić prezidenta Ukrainy Uładzimira Zialenskaha ŭ tym, što toj raźviazaŭ vajnu. «Ja nie ŭskładaju adkaznaść na Zialenskaha, ale ja nie toje kab u zachapleńni ad taho, što hetaja vajna pačałasia. Ja nie vinavaču jaho, ja prosta kažu, što ja b nie skazaŭ, što jon vydatna spraviŭsia. Dobra? Ja nie vialiki prychilnik», — skazaŭ Tramp.

Žurnalisty spytali Trampa, kolki času jon daje Pucinu, kab adkazać na prapanovy pra spynieńnie ahniu, pierš čym uvodzić novyja sankcyi.

Tramp adkazaŭ tolki, što jon atrymaje niejki adkaz ad Rasii na hetym tydni.

Trampa spytali, ci varta Italii ŭdzielničać u farmiravańni jeŭrapiejskaha vajennaha kantynhientu va Ukrainie. Jon adkazaŭ, što heta sprava Italii, i dadaŭ: «Da misij miru ja zaŭsiody narmalna staŭlusia».

• 3
• 0
• 3
• 1
• 0
• 0
• 1
• 0