Paznajomciesia z The Beatles: režysior novych filmaŭ pra livierpulskuju čaćviorku pradstaviŭ vykanaŭcaŭ hałoŭnych rolaŭ
Zaćvierdžany akciorski skład bajopikaŭ pra hurt The Beatles. Režysior Sem Miendes zdymie adrazu čatyry filmy — asobny film pra kožnaha muzykanta ź livierpulskaj čaćviorki.
Viadomy pa rolach u «Zvyčajnych ludziach» i «Hładyjatary 2» Poł Mieskał syhraje Poła Makartni, zorka «Sołtbiorna» Bary Kieahan stanie Rynha Staram, viadomy pa «Fantastyčnaj čaćviorcy» Marvel Džozef Kuin syhraje Džordža Charysana, a Džona Lenana ŭvasobić Charys Dykinsan, jakoha niadaŭna možna było ŭbačyć u filmie «Drennaja dziaŭčynka» (Babygirl) ź Nikol Kidman, piša Bi-bi-si.
Režysior anansavaŭ novy prajekt na scenie fiestyvalu CinemaCon u Łas-Viehasie ŭ minuły paniadziełak.
«Kožny film raskazvaje historyju z punktu hledžańnia adnaho z chłopcaŭ, — raspavioŭ jon na mierapryjemstvie. — Jany pierasiakajucca pa-roznamu — časam dublujucca, a časam nie. Heta čatyry zusim roznyja čałavieki. Mahčyma, heta šaniec zrazumieć ich trochi hłybiej. A razam hetyja čatyry filmy raskažuć historyju najvialikšaha hurta ŭ historyi».
Filmy vyjduć amal adnačasova — u krasaviku 2028 hoda.
«Ja prosta zaŭsiody adčuvaŭ, što historyja hurta zanadta vialikaja, kab źmiaścicca ŭ adzin film, a pieraŭtvareńnie jaje ŭ mini-sieryjał taksama nie zdavałasia pravilnym», — patłumačyŭ režysior.
Irłandskamu akcioru Połu Mieskału 29 hadoŭ. Jon staŭ viadomy dziakujučy roli ŭ sieryjale Bi-bi-si «Narmalnyja ludzi» u 2020 hodzie. Potym jon źniaŭsia ŭ filmach «Sonca majo», za jaki byŭ naminavany na «Oskar», i «Nieznajomcy», a taksama vykanaŭ hałoŭnuju rolu ŭ sikviele «Hładyjatara». Akramia Poła Makartni, jon rychtujecca syhrać jašče adnaho znakamitaha brytanca — Uiljama Šekśpira — u ekranizacyi ramana Mehi O'Fareł «Chamniet».
Charys Dykinsan staŭ zorkaj dziakujučy rolam u filmach «Malefisienta», «King's Man: Pačatak», «Trochvuholnik smutku» i «Tam, dzie raki piajuć», a zatym syhraŭ kachanaha Nikol Kidman u «Drennaj dziaŭčyncy». 28-hadovy brytaniec byŭ naminavany na premiju BAFTA za rolu ŭ sieryjale «Zabojstva na krai śvietu». Jon — adzin z favarytaŭ bukmiekieraŭ na rolu nastupnaha Džejmsa Bonda.
Bary Kieahan, vierahodna, maje najbolšaje vonkavaje padabienstva ź jaho bitłam — bubnačom Rynha. Irłandski akcior — najstarejšy ŭ akciorskaj čaćviorcy (32 hady) i adna z samych jarkich zorak Halivuda. U 2023 hodzie jon atrymaŭ premiju BAFTA i naminacyju na «Oskar» za film «Banšy Inišeryna», a zatym uznačaliŭ akciorski skład filma «Sołtbiorn».
Džozef Kuin syhraŭ Edzi Mansanu ŭ čaćviortym siezonie sieryjała Netflix «Vielmi dziŭnyja spravy», zdymaŭsia ŭ filmie «Cichaja miesca: Dzień pieršy» i źjaviŭsia razam ź Mieskałam u «Hładyjatary 2». Pierš čym syhrać hitarysta Beatles Charysana, 31-hadovy łondaniec źjavicca ŭ roli Džoni Štorma (Čałavieka-Fakieła) ŭ filmie «Fantastyčnaja čaćviorka: Pieršyja kroki» i dvuch filmach pra Mściŭcaŭ kiniematahrafičnaj suśvietu Marvel.
Film pra Beatles zdymajuć nie ŭpieršyniu, ale ŭpieršyniu ŭsie žyvyja ŭdzielniki hurta i spadkajemcy tych, chto ŭžo pamior, nadali stvaralnikam poŭnyja pravy na ich žyćciovyja historyi i muzyku.
Kamientary