Entuzijasty pierakłali na biełaruskuju movu kultavych «Hierojaŭ 3»
Kłasičnaja stratehija «Heroes of Might and Magic III» zdabyła poŭnuju biełaruskuju łakalizacyju. Fanaty hulni paśpieli pastareć, pakul dačakalisia hetaj padziei.
Pra toje, što ciapier usie nieabchodnyja elemienty hulni dastupnyja na biełaruskaj movie, paviedamiła kamanda pierakładčykaŭ ReZervatioN.
Heroes of Might and Magic III — heta lehiendarnaja pakrokavaja stratehija ŭ žanry fentezi, vypuščanaja ŭ 1999 hodzie kampanijaj New World Computing. Hulnia prapanuje ŭziać na siabie kiravańnie vydumanaha karaleŭstva, razbudoŭvać harady sa śpiecyfičnym naboram pabudoŭ dla kožnaj frakcyi, raźvivać svajho ŭnikalnaha hieroja sa svaimi asablivymi zdolnaściami, vandravać im pa karcie śvietu, źbirajučy artefakty i armiju, kab udzielničać u bitvach ź inšymi frakcyjami i vypadkovymi vorahami.
Niahledziačy na toje, što hulni ŭžo čverć stahodździa i vyjšli bolš novyja častki, mienavita treciaja častka sieryi zastajecca ŭlubionaj siarod fanataŭ dahetul. Padtrymlivać cikaŭnaść da jaje dapamahajuć šmatlikija mody i palapšeńni.
Entuzijasty z ReZervatioN pierakłali ŭsie asnoŭnyja tekstavyja elemienty, nieabchodnyja dla hulni, uklučajučy mieniu, dyjałohi, nazvy i apisańni istot, budynkaŭ, artefaktaŭ, čaraŭ i ŭmieńniaŭ, a taksama hrafičnyja elemienty interfiejsu. Dziakujučy dapamozie supołki łokar, byli pierakładzienyja ŭsie siužetnyja kampanii asnoŭnaj hulni i dvuch dapaŭnieńniaŭ.
Razam z tym, u finalnaj viersii biełarusizacyi zastalisia niekatoryja momanty, jakija nie atrymałasia całkam adaptavać. Tak, aryhinalnaja ahučka videarolikaŭ siužetnych kampanij była pakinutaja bieź pierakładu, bo adsutničaje jakasny hienieratar biełaruskamoŭnaha hołasu. Nie byli pierakładzienyja asobnyja niesiužetnyja karty, a taksama hulniavyja redaktary — praz techničnyja składanaści ich intehracyi.
Na hety momant praciahvajecca praca nad pierakładam siužetnych kampanij dapaŭnieńnia «Podych śmierci» i ŭsich asobnych scenaraŭ, jakim zajmajecca supołka łokar.
Instrukcyju pa ŭstanoŭcy biełarusizatara «Hierojaŭ miača i mahii» 3 možna adšukać na sajcie supołki ReZervatioN.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary