Čamu Łukašenka hetyja dni zły jak čort?

Łukašenka, vierny sabaka Maskvy, ni razu za hetyja čatyry hady nie adychodziŭ ad maskoŭskaj mietadyčki. Na hetym tydni jon nazvaŭ vajnu «ciahamocinaj». Nu, pakazalna.

Kančatkovy tekst patencyjnaj mirnaj damovy pakul nieviadomy, ale z tych źlivaŭ, jakija byli, kali adkinuć infašum, vynikaje, što mir moža być zaklučany na ŭmovach, jakija prymalnyja dla Ukrainy.

Zhoda Rasii na zamireńnie budzie aznačać, što Maskva vyčarpała svaje resursy i nie maje siłaŭ, kab praciahvać. Zrešty, hod badańnia maskoŭskaj ardy za try rajcentry sam saboju pakazvaŭ, što hety punkt blizki — kali Ukraina i jaje jeŭrapiejskija sajuźniki nie drohnuć. Jany nie drohnuli.

U prajekt uklučany šerah punktaŭ, jakija dazvalajuć Maskvie zachavać tvar. Ale jakija ničoha nie aznačajuć u sutnaści.

Abmiežavańni na armiju 800 ci 600 tysiač? Na słovach prynižalna, ale ŭ realnaści da vajny ŭkraincy mieli armiju 200 tysiač. Polšča i Hiermanija tolki marać davieści svaje da 270‑300 tysiač. I okiej: armija 600 tysiač, a chto pieraškodzić dziejnaści narodnych družyn dranavodaŭ? Užo nie kažučy pra toje, što ŭ ciapierašniaj vajnie nie žyvaja siła vyrašaje.

Vyrašeńnie pytańniaŭ movy i adukacyi na asnovie normaŭ ES? Dyk jano va Ukrainie i tak adpaviadaje faktyčna normam ES.

Dazvoł na isnavańnie UPC Maskoŭskaha patryjarchata? Dyk jana i tak de-fakta isnuje, nie razhaniać ža tych babulek. Ale jaje ŭpłyŭ ciapier mizerny.

I navat prapisvańnie «niepašyreńnia NATA». A jano ž i tak nie pašyrałasia: Ukraina biłasia, biłasia ŭ dźviery, dy tak i nie dabiłasia. Tak, hetaja ŭmova — heta kiepska zakamuflavanaje pryznańnie krain byłoha SSSR śfieraj upłyvu Kramla. Ale havorka tolki pra niekalki dziaržaŭ, jakija i biez taho byli śfieraj upłyvu — tyja, kiraŭnictva jakich, jak Łukašenka, pradałosia. Heta nie toje, pra što maryłasia kramloŭskim strateham.

Styl Trampa dazvalaje Maskvie pradać svajmu abałvanienamu miasu takuju damovu jak dasiahnieńnie. Nu tak, heta sapraŭdy nie «stratehičnaja paraza Maskvy» i nie «raspad Rasii», jakoha ŭsie (pryznajciesia, i vy taksama) tak chacieli b. Ale heta i zusim nie toje, na što Pucin z Łukašenkam spadziavalisia i što sam, napačatku ašałomleny, Zachad prahnazavaŭ čatyry hady nazad.

Rasija prabiła sabie suchaziemny kalidor u Krym, ale bolš nivodnaj mety nie dasiahnuła.

Pačynajučy vajnu, rasijanie raźličvali zachapić Kijeŭ i dabicca kapitulacyi Ukrainy. Paśla čaho, na chvali ejfaryi, adbyłasia b, mahčyma, sproba blickryhu ŭ inšych uschodniejeŭrapiejskich krainach i «ŭźjadnańnia troch słavianskich narodaŭ u adnu impieryju». 

Navat paśla pravału blickryhu ŭviesnu 2022 Rasija ŭsio jašče patrabavała ad Ukrainy de-fakta kapitulacyi.

I navat patrabavańni Maskvy napačatku 2025 hoda ŭklučali advod ukrainskich vojskaŭ na miežy Zaparožskaj i Chiersonskaj i ruskuju jak druhuju dziaržaŭnuju movu. Ničoha z hetaha ŭ dastupnych nam prajektach nie zastałosia. Rasijanie tak i nie zdoleli zachapić nivodnaha ŭkrainskaha abłasnoha centra.

Tak, amierykancy nie dali Ukrainie supiersučasnaj zbroi. Faktyčna heta zdrada, ale hetaja zdrada ad časoŭ Abamy praciahvajecca, kali Vašynhton zrabiŭ vyhlad, što Budapiešcki miemarandum — heta pustaja papierka. Heta vynik niežadańnia Vašynhtona ŭzdymać płanku kanfliktu. Amierykancy pahadžajucca prymać Rasiju takoj, jakaja jana jość, nie bačać hetamu alternatyvy. Na maju dumku, heta pamyłka, ale im vidniej i što my zrobim: svaja ruka ŭładyka.

Hałoŭnaje — Ukraina ź niemałoj dapamohaj Zachadu, pieradusim krain Skandynavii, Hiermanii, Brytanii, Polščy, vystajała i zachavała poŭnuju niezaležnaść, i navat nie ŭpuściła rasijan na pravy bierah.

Vajna mieła vializnyja nastupstvy i dla ŭsioj Jeŭropy, dla ŭsiaho śvietu. Ni Ukraina, ni Jeŭropa ŭ 2022‑m nie byli hatovyja da vajny, ale za hetyja čatyry hady Rasija vyčarpała resursy, a krainy Jeŭropy, naadvarot, umacoŭvalisia i rychtavalisia. I Ukraina-2026, choć i straciła ŭciekačoŭ, kansalidavanaja i ŭzbrojenaja lepš za Ukrainu-2022.

Nasupierak tamu, što havoryć prapahanda, Jeŭropa razam z Ukrainaj budzie zusim nie słabaja, navat i ŭ vajennym płanie. I heta jašče nie ŭsie novyja zavody ŭzbrajeńniaŭ zapracavali. 

Tamu mianie nie ździŭlaje, što Alaksandr Łukašenka hetyja dni zły jak čort. I addaŭ Budanavu ŭkrainskich zakładnikaŭ raniej za Rasiju.

Viadoma, treba dačakać kančatkovaha varyjanta: pytańnie Słavianska, Kramatorska i hary Karačun niajasnaje, a jano istotnaje, jak i pytańnie zamarožanych rasijskich aktyvaŭ i krynic finansavańnia adbudovy Ukrainy. Ale pakul vyhladaje, što kaniec vajny ŭpieršyniu pakazaŭsia na dalahladzie. 

• 50
• 4
• 4
• 12
• 1
• 0
• 0
• 0