Pierad adstaŭkaj Dźmitryj Kazak napisaŭ list Pucinu z krytykaj vajny

Stali viadomyja novyja detali vieraśnioŭskaj adstaŭki Dźmitryja Kazaka z pasady namieśnika kiraŭnika administracyi prezidenta Rasii. Pierad zvalnieńniem jon napisaŭ Uładzimiru Pucinu list, u jakim raskrytykavaŭ napad Rasii na Ukrainu. Chutka paśla hetaha jon źjechaŭ za miažu, ale pry hetym rehularna viartajecca dadomu, vynikaje sa słoŭ čatyroch znajomych byłoha čynoŭnika, piša «Ahienctva».

Pierad adstaŭkaj 18 vieraśnia z pasady namieśnika kiraŭnika administracyi prezidenta Dźmitryj Kazak padrychtavaŭ dva dakumienty — aficyjnuju zajavu ab zvalnieńni pa ŭłasnym žadańni, a taksama asabisty list na imia Pucina, viedajuć dva surazmoŭcy «Ahienctva», znajomyja z abstavinami sychodu Kazaka (jany spasyłajucca na słovy samoha byłoha čynoŭnika).

U liście były namieśnik kiraŭnika AP raskrytykavaŭ napad Rasii na Ukrainu, i zrabiŭ heta ŭ vielmi žorstkich vyrazach, vynikaje sa słoŭ adnaho z surazmoŭcaŭ.

Sam Kazak ličyć, što nie vyklikaŭ u Pucina hnieŭ svaim demaršam i navat raźličvaje ź im ubačycca ŭ bližejšy čas, śćviardžaje inšy surazmoŭca «Ahienctva», znajomy z byłym čynoŭnikam jašče z 1990-ch.

Amal adrazu paśla adstaŭki Kazak staŭ časta byvać za miažoj — jon adpraviŭsia ŭ Izrail, vynikaje sa słoŭ čatyroch surazmoŭcaŭ «Ahientstva». Ale heta nijak nie źviazana z aściarohami za ŭłasnuju biaśpieku, śćviardžaje znajomy eks-čynoŭnika. Jon jeździć u tym liku na lačeńnie i viartajecca ŭ Rasiju, udakładniŭ jon.

Kazak — adziny čynoŭnik u bližejšym atačeńni Uładzimira Pucina, jaki asudziŭ vajnu. U hetym hodzie jon prapanoŭvaŭ Pucinu spynić bajavyja dziejańni va Ukrainie, a taksama pravieści reformy ŭnutry Rasii, jakija b zakranuli śpiecsłužby i sudovuju sistemu.

Kazak naradziŭsia ŭ Kiravahradskaj vobłaści Ukrainy, a vučyŭsia ŭ Leninhradskim univiersitecie. U 1990‑ch jon pracavaŭ u kamandzie mera Pieciarburha Anatola Sabčaka razam z Pucinym. Apošni, staŭšy ŭ 1999 hodzie premjeram, zrabiŭ Kazaka kiraŭnikom aparatu ŭrada. Z taho času jon pracavaŭ ministram, paŭnamocnym pradstaŭnikom prezidenta na Kaŭkazie, vice-premjeram i namieśnikam kiraŭnika prezidenckaj administracyi.

Pierad napadam Rasii na Ukrainu Kazak adkazvaŭ u Kramli za ŭzajemadziejańnie ź niepryznanymi «ŁNR» i «DNR». Jon udzielničaŭ u pasiadžeńni Rady biaśpieki 21 lutaha 2022 hoda, na jakim vyrašałasia pytańnie ab pryznańni hetych «respublik».

Padčas svajho vystupleńnia Kazak krytykavaŭ ukrainskaje kiraŭnictva, adnak zatym sam paprasiŭ u Pucina dazvołu «adkazać na pytańnie, dałučać ci nie dałučać Danbas».

Miarkujučy pa ŭsim, jaho dalejšyja słovy byli vyrazanyja. Surazmoŭcy «Ahienctva» kažuć, što Kazak vystupiŭ suprać napadu na Ukrainu, heta ž vynikaje z materyjału The New York Times i rasśledavańnia Reuters.

Paśla hetaha Kazaka faktyčna adsunuli ad pytańniaŭ, źviazanych z Ukrainaj, adnak u adstaŭku nie adpravili. Jon adkazvaŭ za inšyja rehijony bližniaha zamiežža, dzie Kreml u apošni čas pieraśledujuć niaŭdačy — na prezidenckich i parłamienckich vybarach u Małdovie prarasijskija kandydaty prajhrali, a ŭ Abchazii razhareŭsia ŭnutrypalityčny kryzis. Tamu i kuryravańnie hetych terytoryj pieradadziena inšamu namieśniku kiraŭnika kramloŭskaj administracyi — Siarhieju Kiryjenku. Kazak zajmaŭ pasadu i kabiniet, ale faktyčna byŭ biez pracy ŭ apošni čas, kaža jaho znajomy.

U ŚMI źjaŭlalisia roznyja paviedamleńni ab novych varyjantach pracaŭładkavańnia čynoŭnika — pačynajučy ad paŭnamocnaha pradstaŭnika ŭ Paŭnočna-Zachodniaj akruzie i zakančvajučy pazicyjaj abaroncy pravoŭ biźniesu. Adnak paśla adstaŭki 18 vieraśnia Kazak nijakaj pasady tak i nie atrymaŭ.

• 3
• 0
• 2
• 0
• 0
• 0
• 0
• 0