«Poŭny farš, a cana jak u pustoj Tesla». Čym (nie) zadavolenyja ŭładalniki kitajskich elektramabilaŭ

«Biudžetny elektrakitajec»

Dla Maksima (imia źmieniena) elektramabil staŭ jaho pieršaj mašynaj:

«U mianie Dongfeng Box. Heta elektrakitajec, možna skazać, ź biudžetnaha kłasa. Heta naša z žonkaj pieršaja mašyna. Kupili jaje hod tamu.

Spačatku my vybirali b/u aŭtamabil z ruchavikom unutranaha zharańnia (RUZ) za canu kala $10 000. Ale za takuju sumu ŭ RB možna kupić tolki dziesiacihadovuju stareńkuju mašynu z prabieham kala 200 tysiač kiłamietraŭ. Zamaročvacca z pryhonkami z-za miažy taksama nie chaciełasia, dy i suma nie taja.

Niejak my vypadkova prajechalisia ŭ Box'e jak pasažyry i vyrašyli ŭkłaścisia ŭ jaho. Pieršy ŭznos u lizinhu z rasterminoŭkaj jakraz skłaŭ $10 000. Usia suma atrymałasia $20 000 na 2 hady pad 0% u dalarach ($17 000 aŭto + $3 000 dadatkaŭ: kaska, zimovaja huma, zaradka, antykar, plonki i h.d.). A ciapier my ŭžo vykuplajem jaho, kab nie płacić PDV u 2026 hodzie, kali skončycca dziejańnie zakona pra nulavy PDV na elektramabili.

Pavialičyć

Zapas chodu ŭ Box kala 300 km letam i kala 200 km zimoj, u zaležnaści ad chutkaści i pracy kandycyjaniera. Zaradžajusia na chutkich «Małankach». Pa hrubych padlikach heta tańniej, čym dla RUZ, u dva-try razy. Tym, chto zaradžajecca doma, heta vyhadniej u piać razoŭ, čym zapravić aŭtamabil z RUZ.

U Minsku infrastruktura zaradnych stancyj davoli raźvitaja. Ale ŭ rodnym horadzie pakul što sumna — jość usiaho paru chutkich stancyj. Na trasach pamiž abłasnymi haradami zaradnych stancyj taksama mała, adna-dźvie na ŭsiu dystancyju. Tamu pajezdki ŭ inšyja harady treba abaviazkova płanavać.

Ale raduje, što kožny hod źjaŭlajucca novyja zaradnyja stancyi. Na vypadak niepradbačanych situacyj važu z saboj kabiel dla zaradki ad zvyčajnaj razietki i kabiel dla pavolnaj zaradki (dzie jość tolki razietka, biez kabiela). Časam uźnikajuć prablemy sa startam zaradki — naprykład, zapuskajecca ź piataha razu abo zusim nie zapuskajecca. Ale takoje adbyvajecca nie časta.

Hod tamu Box byŭ samym tannym elektramabilem u Biełarusi, jaki možna było kupić u aficyjnym sałonie. Ciapier źjavilisia kankurenty ad Geely, i kali b ja kuplaŭ mašynu zaraz, vyvučyŭ by jašče i ich.

Pa ŭražańniach kitajski elektramabil — heta płanšet na kołach. Roznyja asistenty kiravańnia i parkovak, kamiery na 360 hradusaŭ, šmat «prykołak» z kitajskich markietpłejsaŭ, hodnaja jakaść. Za takija hrošy siarod novych RUZ u Biełarusi ŭ jaho prosta niama kankurentaŭ, tolki «łada» na miechanicy ci samaja tannaja Geely.

Minusy:

• doŭhaja zaradka ŭ paraŭnańni z zapraŭkaj RUZ. Prykładna hadzinu +/— 30 chvilin.
• Chaciełasia b bolšuju batareju, kab možna było prajechać 400‑500 km letam i 300‑350 km zimoj.
• Nieviadoma, što budzie z kuzavam praz dva-try hady, bo hetyja aŭto vyrablajuć niadaŭna. U niekatorych užo jość uzdućcie farby na zvaračnych švach i źjaŭlajucca ŭčastki ržy.
• Doŭhaje čakańnie kuzaŭnych rabot. Aŭto pradajucca dobra, amal usie z kaska, i pa luboj drapinie ŭsie źviartajucca da dylera. Pierafarbavańnia dźviarej možna čakać dva miesiacy.
• Dla pracy CarPlay i Android Auto treba dakupić asobnuju aficyjnuju prystaŭku, jakaja ŭstaŭlajecca ŭ USB».

«Pakul što heta vyhadna»

Minčanka Alesia (imia źmieniena) vałodaje kitajskim elektramabilem BYD Dolphin (restajlinh 2025 hoda).

«Pačniom z zaradnych stancyj. Pa dziesiacibalnaj škale aceńvaju biełaruskija stancyi na 6+. Ale raduje, što ŭ abłasnych haradach adkryvajecca ŭsio bolš stancyj. Patok elektramabilaŭ nie źmianšajecca, popyt na taki transpart jość. U Minsku asabliva vyłuču taksi, kiroŭcy jakich lubiać zajmać usie volnyja zaradnyja stancyi.

Pavialičyć

Zvyčajna zaradžajusia na stancyjach u Minsku. I raz na miesiac, kali naviedvaju svajakoŭ, staŭlu na pavolnuju zaradku ŭ haražy (u inšym maleńkim horadzie). Na žal, kala pracy niama ničoha padobnaha. A vielmi chaciełasia b mieć niešta pobač, pažadana pavolnuju zaradku.

Štomiesiac ja jedu pa trasie 250 km. Pierad takimi pajezdkami važna nie prapuścić redkuju stancyju na trasie, asabliva kali nie atrymałasia vyjechać sa 100% zaradkaj. Pakul vialikich prablem nie było, akramia mahčymaści zatrymacca na zaradcy, pakul inšaja mašyna zaradžajecca.

Stancyj za miežami Minska pastupova stanovicca bolš. Ale skažu jak uładalnica elektramabila: pakul hetaha dakładna niedastatkova dla takoj kolkaści kitajskich mašyn. Kab na takich mašynach možna było paŭnavartasna padarožničać pa Biełarusi, treba zrabić bolš zaradnych stancyj z kitajskimi partami GB/T. Rabicie bolš takich partoŭ, ludzi buduć radyja i ŭdziačnyja.

Raniej u mianie była bienzinavaja mašyna na aŭtamacie. Na staroj mašynie maje štomiesiačnyja pajezdki 250 km u abodva baki kaštavali minimum 100 rubloŭ. Ciapier atrymlivajecca kala 55‑65 rubloŭ. Ekanomija adčuvalnaja, jak i kamfort u novaj mašynie.

Ale za hetuju ekanomiju časam davodzicca «płacić» časam. Pastajać na stancyjach, pačakać svajho miesca, pačakać zaradki. A jašče treba rehulavać chutkaść dla ekanomii zaradki. Ale zaradka ŭsio adno bolš vyhadnaja, čym zapraŭka, choć cana pastupova raście.

Pakul što heta vyhadna. Ja jezdžu na mašynie kala hoda, i ź inšych vydatkaŭ pakul była tolki zamiena alivy (150 rubloŭ razam z pracaj). U sałonie rekamiendavali rabić heta raz na 10 tysiač kiłamietraŭ prabiehu. Hetuju adlehłaść ja «nakatała» za šeść miesiacaŭ. Akramia taho, byli kupli zimovych šyn, antykar, roznyja pachučki, dyvanki. Ale heta bazavy minimum luboj mašyny.

Bolš pytańniaŭ z mašynaj nie było. Naohuł nijakich niepryjemnych momantaŭ. Spadziajusia, što i nie budzie. A jašče ŭ Minsku jość krutyja pryvilei dla elektramabilaŭ: niama darožnaha padatku, biaspłatnyja parkoŭki, prava ruchu pa aŭtobusnaj pałasie. Vielmi pryjemnyja pluški ad dziaržavy, za heta dziakuj.

Nie paškadavała pra kuplu ni razu. Za svaje hrošy hetaja mašyna z takimi nierealnymi funkcyjami ŭnutry — prosta samalot. Kožnamu raju pasprabavać pakatacca na elektramabili, a ŭžo paśla hetaha vyrašać samomu, ci pasuje taki varyjant. Chtości ž pavinien jeździć na mašynach z RUZ, bo zaradnyja stancyi nie humovyja.

Zimoj byvaje trochi składaniej, ale ničoha krytyčnaha dakładna niama. Zapas chodu źnižajecca, tak, ale nie ŭ dva razy, jak zvyčajna kažuć. Pry pravilnym kiravańni atrymlivajucca zusim inšyja ličby».

«Usio jość, a kaštuje jak pustaja Tesla Model 3»

Siarhiej (imia źmieniena) hod tamu kupiŭ kitajski elektrakrasovier BYD Yuan Up — i niadaŭna zamoviŭ druhi:

«U RB ź infrastrukturaj pa Minsku i asnoŭnych kirunkach usio niadrenna. Navat dobra. Niekatory čas žyŭ u Łatvii, tam takoha dakładna niama. Asnoŭnyja ŭładalniki elektramabilaŭ u hetaj krainie — uładalniki ŭłasnych damoŭ. I elektramabilaŭ tam staviać na ŭlik mała, kala 1000 u hod [u Biełarusi ŭ 2025 hodzie kvota na biespošlinny ŭvoz elektramabilaŭ składała 15 000 štuk i była amal całkam vybranaja da kanca vieraśnia].

Pavialičyć

Zaradžaju aŭtamabil u haraž-boksie, jaki ŭziaŭ u arendu. Ad zvyčajnaj pavolnaj razietki za noč mašyna zaradžajecca napałovu, što narmalna dla prabiehu 15 tysiač kiłamietraŭ u hod. Zapas chodu — kala 300 km. Da Mazyra dajazdžaje spakojna tolki z padzaradkaj. Zapraŭki pa darozie jość, časam davodzicca čakać svajoj čarhi, ale ŭ cełym narmalna. U Mazyry ich adna-dźvie. Pakul było niašmat, ale hodna.

Pavialičyć

Druhuju mašynu biaru z zapasam chodu na 450 realnych kiłamietraŭ, kab možna było spakojna dajechać u adzin bok. Bolšaść prablem vyrašajecca bolšaj batarejaj, ale treba dumać, jak zaradžać. Dobra, što razietku 220V znajści nie ciažka.

Pra kuplu asabliva nie škadavaŭ. Suadnosiny košt/iakaść/opcyi biaruć svajo: pry canie $20 000 za novuju mašynu, dzie ŭnutry pryjemniej, čym u Lexus, pavinny być kampramisy.

Raniej u mianie byli aŭto z RUZ, tamu jość z čym paraŭnoŭvać. Za dva apošnija miesiacy na elektramabil ja zapłaciŭ 120 rubloŭ — heta za adzin raz bienzin zalić. Kali zaradžać doma, pa taryfie dla fizasob — tańniej. Na płatnych zaradkach pa trasie atrymajecca daražej.

Absłuhoŭvańnie prykładna takoje ž, jak u zvyčajnych mašyn. Jak i kaska: treba jeździć da dylera raz na hod, jak i ź luboj novaj mašynaj.

A jašče ranicaj ja važu dzicia ŭ himnaziju pa praśpiekcie. I kožny raz radujusia, pralatajučy zator pa aŭtobusnaj pałasie.

Kali jość svaja razietka, jakaja dazvalaje nie marnavać čas na pajezdki da stancyj — elektramabil možna brać. Zima ničoha asabliva nie mianiaje, prosta čaściej staviš na zaradku (2‑3 razy na tydzień zamiest 1-2). Znoŭ-taki, kali jość svaja razietka abo svajo miesca (boks, parkinh, haraž, dom, praca) — heta nie maje značeńnia.

Ale kali niama takoj dastupnaj razietki — čakaje sum i kłopaty. Ja tak paŭhoda jeździŭ na hramadskuju zaradku, pakul nie ŭziaŭ haraž u arendu.

Pieravahi majho elektramabila — suadnosiny cany, jakaści i opcyj. Dobra sabranaja, nafaršavanaja mašyna pa canie ŭ dva razy nižejšaj, čym u Jeŭropie. Paraŭnajcie ceny na BYD Sea Lion / Seal i h. d. — jany tam sapraŭdy ŭ dva razy vyšejšyja. Ja hladžu na hetuju kuplu jak na mašynu z 50% źnižkaj. Tamu ŭsio vielmi raduje.

Što tyčycca mienavita majho BYD Yuan Up — heta adzin z samych dastupnych elektramabilaŭ na našym rynku. Pryjemny i prastorny ŭsiaredzinie, ale ź nievialikim zapasam chodu. Mašyny marki BYD u cełym dobryja, možna brać lubuju — tam usio prykładna adnolkavaje. Hałoŭnaje, kab batareja była bolšaj. Ja čakaju BYD Han L: $40 000, poŭny pryvad, razhon da 100 km/h za 3 siekundy, batareja 80 kVt·h (zapas chodu 500 km), skura, masaž na čatyry siadzieńni. Prajekcyja, lidar — usio, što možna prydumać za $40 000. Usio jość, a kaštuje jak pustaja Tesla Model 3.

• 2
• 2
• 2
• 0
• 0
• 0
• 0
• 1