Capkała kaža, što abmierkavaŭ u ZŠA kroki, kali pravalacca namahańni Trampa pa vyzvaleńni biełaruskich palitviaźniaŭ
Eks-pretendent u prezidenty ŭ aŭtorak sustreŭsia z časovym prezidentam Sienata ZŠA i staršynioj jurydyčnaha kamiteta Sienata Čakam Hraśli.
«U dziaržaŭnaj ijerarchii Złučanych Štataŭ jon zajmaje čaćviortaje miesca», — napisaŭ Capkała ŭ svaim telehram-kanale.
«My prainfarmavali sienatara pra namahańni, jakija robiać Donald Tramp, Džon Koŭł i Krystafier Śmit u pytańni vyzvaleńnia palityčnych źniavolenych u Biełarusi, a taksama pra humanitarnyja namahańni niefarmalnaha kłuba nobieleŭskich łaŭreataŭ, jakija padtrymlivajuć nas u pytańniach hłabalnaha paradku dnia — ad pieraadoleńnia ličbavaj niaroŭnaści da paślavajennaha adnaŭleńnia Siryi i Hazy, i, viadoma, u pytańniach vyzvaleńnia palityčnych źniavolenych u Biełarusi. My vykazali ŭdziačnaść amierykanskamu boku za namahańni, jakija ŭžo pryviali da vyzvaleńnia značnaj hrupy palityčnych źniavolenych», — napisaŭ jon.
«Asobna my spynilisia na abmierkavańni kankretnych krokaŭ, jakija amierykanskija zakanadaŭcy mahli b zrabić u vypadku pravału namahańniaŭ prezidenta Trampa pa vyzvaleńni palityčnych źniavolenych i zakryćci kryminalnych spraŭ», — dadaŭ Valer Capkała.
Učora stała viadoma, što na nastupnym tydni Minsk znoŭ naviedaje Džon Koŭł. Papiarednija razy — 11 vieraśnia i 13 śniežnia — u vyniku jaho vizitu ŭ Biełaruś vyzvalalisia vialikija hrupy palitviaźniaŭ (51 i 123 čałavieki adpaviedna). 21 červienia byli vyzvalenyja 14 čałaviek.
Palityčny analityk Alaksandr Kłaskoŭski vykazaŭ mierkavańnie «Biełsatu», što hetym razam maje być samaja vialikaja hrupa.
«Ja maju takuju insajdarskuju infarmacyju, što heta budzie vialikaja davoli hrupa, mahčyma, razy ŭ dva bolšyja, čym minułym razam u śniežni. To-bok, havorka idzie pra dźvie ź lišnim sotni ludziej jak minimum. Ale tysiača heta nierealna, chacia meta takaja stavicca», — skazaŭ Kłaskoŭski.
Capkała ŭ svoj čas kazaŭ, što rehularna sazvońvajecca z Koŭłam u spravie vyzvaleńnia palitviaźniaŭ.
«Koŭł niejak patelefanavaŭ mnie i cikaviŭsia, ci infarmujem my nobieleŭskich łaŭreataŭ pra ŭsie namahańni. Naturalna, my adrazu prainfarmavali ich, sabrali reakcyju, jany padziakavali Trampu za hetyja namahańni. Jany paprasili jaho praciahvać namahańni, kab usie palitviaźni byli vyzvalenyja», — kazaŭ jon u śniežni.
Pavodle słoŭ Capkały, padčas čarhovaha zvanka Džon Koŭł, niedzie ŭ listapadzie 2025 hoda, paviedamiŭ jamu, što ŭ najbližejšy čas — «na nastupnym tydni ci praz tydzień» — na volu moža vyjści jašče tysiača biełaruskich palitviaźniaŭ. Capkała śćviardžaje, što nakiravaŭ hetuju infarmacyju ŭ MZS niekalkich krain
Koŭł abvierh kantakty z Capkałam.
Jamu zadali ŭ sacsietcy X pytańnie: «Pavažany spadar Koŭł, ci možacie vy paćvierdzić ci abvierhnuć infarmacyju, što spadar Valeryj Capkała davaŭ vam parady i akazvaŭ dapamohu ŭ spravie vyzvaleńnia palityčnych źniavolenych?»
U adkaz na heta jon napisaŭ: «Nie, jon hetaha nie rabiŭ. Heta było zroblena mnoj, prezidentam Trampam, Krysam Śmitam i vydatnaj kamandaj va ŭradzie ZŠA».
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary