Va Ukrainie bankir apublikavaŭ fota klijentki, jakaja prachodziła vieryfikacyju «na fonie ściaha Rasii», i trapiŭ u skandał
Suzasnavalnik ukrainskaha anłajn-banka monobank Aleh Harachoŭski trapiŭ u centr hučnaha skandału paśla publikacyi ŭ sacsietcy Threads fotazdymka adnoj z klijentak. Fota było zroblena supracoŭnikami banka padčas videavieryfikacyi dla razbłakiroŭki rachunku.
Aleh Harachoŭski apublikavaŭ u sacsietcy Threads fota karystalnicy banka, zroblenaje padčas videavieryfikacyi, na fonie nibyta rasijskaha ściaha, piša nv.ua.
Svoj dopis Harachoŭski apublikavaŭ 9 sakavika, adnak paźniej vydaliŭ jaho.
«Źviarnułasia klijentka na videavieryfikacyju z pytańniem, čaho zabłakavali jaje rachunak. Skazali, što praz toje, što hałava niamytaja», — padpisaŭ Harachoŭski fota karystalnicy banka.
Užo na nastupny dzień u sacsietkach źjaviŭsia dopis, u jakim dziaŭčyna zajaviła, što mienavita jaje fota apublikavaŭ Harachoŭski. Jana śćviardžaje, što na fonie byŭ ściah Słavienii, a nie Rasii.
Taksama dziaŭčyna dadała, što była nie ŭ siabie doma i, maŭlaŭ, nie źviarnuła ŭvahi na toje, što visić na ścianie.
«Ale chaču skazać adno: heta ściah Słavienii. Hety čałaviek, nie razabraŭšysia ŭ situacyi, dazvoliŭ sabie vystavić mianie na ŭsieahulny ahlad. Ja ni ŭ jakim razie nie padtrymlivaju krainu-ahresarku. U mianie vajuje ŭsia siamja. Ja naradziłasia va Ukrainie i lublu jaje», — napisała jana.
Paźniej vajskoviec i zasnavalnik fiestyvalu VidiełkaFest Siarhiej Hniaździłaŭ zajaviŭ, što pahutaryŭ ź dziaŭčynaj, fatahrafiju jakoj apublikavaŭ Harachoŭski.
Pavodle jaho słoŭ, jana raspaviała, što ŭ 2023 hodzie razam z maci vyjechała z Charkava ŭ Słavieniju, dzie jany atrymali status biežancaŭ. Užo ŭ nastupnym hodzie jana pierajechała ŭ Hiermaniju, dzie žyvie i ciapier.
«Ja znachodziłasia doma ŭ siabroŭki, jakaja sa Słavienii, jana studentka, u jaje i sapraŭdy visić ściah Słavienii. Ja nie čakała, što videaidentyfikacyja budzie adbyvacca tak chutka, tamu pabiehła akurat u toj pakoj, dzie visieŭ ściah. Mnie skazali, što rašeńnie ab razbłakiroŭcy kartki budzie pryniata na praciahu nastupnych sutak. Na ranicu mnie patelefanavała mama i skazała, što ja «ciapier vielmi viadomaja», — pryvodzić słovy dziaŭčyny Hniaździłaŭ.
Jon taksama śćviardžaje, što abmiarkoŭvaŭ hetuju situacyju z samim Harachoŭskim. Maŭlaŭ, toj na sto adsotkaŭ upeŭnieny, što «ściah — rasijski, a dziaŭčyna — chłusić».
Akramia ściaha na ścianie karystalnicy monobank, u sacsietkach taksama pačali abmiarkoŭvać mahčymaje parušeńnie abarony piersanalnych danych praz apublikavańnie jaje fatahrafii.
Kamientary
Poŭnaja biazhłuzdicca i nie da zakonaŭ.
Ale pieršaje pytańnie jakoje mnie stała cikava, jak na jaje tut adreahujuć kamientatary NN (kali na nn budzie heta navina. I voś jana źjaviłsia, dziakuj) , łoł.
Nu šo, znajducca tut abaroncy hetaha pachana ?
Ale ja b pahladzieŭ na inšyja rakursy z hetym ściaham, bo byccam toj, što lažyć na pałozie nie padobny na toj, što na ścianie na fotcy