U Minsku pradajuć nadzvyčaj redki i vielmi darahi Mercedes-Benz SLR McLaren. Kaštuje jak niekalki kvater u stalicy
Napeŭna, u krainie jon taki adzin.
Pad kapotam u jaho V8 abjomam 5,4 litra, jaki vydaje 626 k. s., što razhaniaje hety supierkar da sotni ŭsiaho za 3,8 siekundy, a da 200 km/h — za 10,6 siek.
U mašynie čyrvony skurany sałon, a styrno z alkantary.
Niahledziačy na niemały ŭzrost, aŭto jak zvonku, tak i znutry vyhladaje amal jak novaje.
Zajaŭleny prabieh — usiaho 25 tysiač kiłamietraŭ. Pradaviec śćviardžaje, što prabieh aryhinalny i paćvierdžany servisnaj historyjaj. Kali heta sapraŭdy tak, to ŭ siarednim za hod na mašynie prajazdžali ŭsiaho kala 1000 kiłamietraŭ.
Zhodna z apisańniem, uvieś aŭtamabil u aryhinalnaj farbie, zimoj nie jeździŭ, a stajaŭ u ciopłym haražy.
Za 22‑hadovy supierkar prosiać 400 tysiač dalaraŭ.
I heta navat bolš, čym za kanfiskavany biełaruskaj mytniaj McLaren 720S 2019 hoda vypusku, što pakazvaje na sapraŭdnuju ŭnikalnaść hetaha «Miersa».
U čym unikalnaść hetaha aŭto?
Mercedes-Benz SLR McLaren — heta nie prosta Mercedes-Benz, bo jon byŭ zrobleny sumiesna z partnioram Mercedes pa Formule-1 — brytanskaj McLaren. Tamu hetyja aŭtamabili źbiralisia nie ŭ Hiermanii, a ŭ Brytanii.
Usiaho z 2003 pa 2010 hady było vypuščana 2157 takich aŭto. Na momant vychadu Mercedes-Benz SLR McLaren źjaŭlaŭsia adnym z samych darahich sieryjnych aŭto ŭ śviecie, bo ceny na ich pačynalisia z 400 tysiač jeŭra.
I treba adznačyć, što z-za svajoj unikalnaści ciapier jany kaštujuć pryblizna stolki ž.
Tak, naprykład, u Hiermanii ceny na SLR McLaren pačynajucca z 317 tysiač jeŭra (abo 375 tysiač dalaraŭ).
U Biełarusi ž u prodažy SLR McLaren tolki adzin. Całkam vierahodna, što druhoha takoha aŭto ŭ našaj krainie prosta niama.
15 hadoŭ u Biełarusi
Kankretna hetaje aŭto pryjechała ŭ Biełaruś jašče ŭ 2011 hodzie. Pravierka VIN-numara pa bazie mytni pakazvaje na toje, što adbyłosia heta 27 červienia 2011 hoda.
To-bok litaralna za niekalki dzion da taho, jak u Biełarusi pačali dziejničać novyja mytnyja staŭki. U vyniku hety daražezny supierkar z 5,4 pad kapotam razmytnivali pa 0,6 jeŭra za kubik, tamu zapłacili ŭsiaho 3240 jeŭra. Dla paraŭnańnia: kali b jaho ŭvieźli ŭ Biełaruś na tydzień paźniej, to mytny płaciož skłaŭ by 30 780 jeŭra.
Kamientary