U Arhiencinie zatrymali kiraŭnika sietki dezinfarmacyi SZR u Łacinskaj Amierycy
U Arhiencinie zatrymali 26‑hadovaha rasijanina Dźmitryja Novikava. Ułady ličać, što jon kiruje rasijskaj sietkaj dezinfarmacyi ŭ rehijonie. Raniej žurnalisty-rasśledavalniki pisali, što hetaja sietka źviazanaja sa Słužbaj źniešniaj raźviedki RF.
Pra zatrymańnie Novikava paviedamiŭ Sakrataryjat dziaržaŭnaj raźviedki Arhienciny. Padstavaj dla hetaha stała pradastaŭleńnie rasijaninam niesapraŭdnych danych pry ŭjeździe ŭ krainu. Novikava zatrymali ŭ pryharadzie Buenas-Ajresa, raskazvaje «Ahientstvo».
Ministr nacyjanalnaj biaśpieki Arhienciny Alaksandra Mantealiva ŭdakładniła, što zatrymany — «lidar rasijskaj sietki pa dezinfarmacyi» — ujechaŭ u krainu pad vyhladam turysta, ale pryjechaŭ, kab «zajmacca destabilizacyjaj i zamachvacca na našy instytuty».
U vieraśni Novikava ŭžo zatrymlivali pa anałahičnaj pryčynie ŭ Daminikanie, dzie jon, vierahodna, žyŭ apošnija hady. Pavodle paviedamleńnia arhiencinskaj raźviedki, z Daminikany Novikava departavali praz udzieł u dziejnaści pa dezinfarmacyi, źviazanaj z umiašańniem u spravy niekalkich krain.
Arhiencinskaja raźviedka vyjaviła suviaź Novikava sa strukturami, jakija mahli zajmacca dezinfarmacyjaj u Arhiencinie, što pryviało da previentyŭnaha ŭmiašańnia z boku miascovych orhanaŭ dziaržbiaśpieki.
Pavodle infarmacyi El Periodico, paśla razhladu apielacyi Novikava mohuć adpravić u Rasiju.
26‑hadovy Dźmitryj Novikaŭ naradziŭsia ŭ Pietrapaŭłaŭsku-Kamčackim. Ale abodva svaje pašparty atrymaŭ u maskoŭskim rehijonie (u 2019 hodzie — u Maskvie, u 2022 hodzie — u Padmaskoŭi).
Servisy pošuku tvaraŭ pa fatahrafii znajšli zdymki Novikava na sajcie turystyčnaha ahienctva z Daminikany. U hetuju krainu Novikaŭ, zhodna z uciečkami, lotaŭ prynamsi ŭ 2019 hodzie.
Pavodle danych El Periodico, u apošnija dva hady Novikaŭ nieadnarazova naviedvaŭ roznyja krainy Łacinskaj Amieryki, u tym liku Čyli, Daminikanu, Kałumbiju, Panamu i Braziliju. Apošni raz Novikaŭ ujechaŭ u Arhiencinu 12 krasavika, prylacieŭšy sa Stambuła.
Novikaŭ uznačalvaŭ padkantrolnuju rasijskim śpiecsłužbam strukturu «Kampanija» (La Compañía), jakaja hadami raspaŭsiudžvała dezinfarmacyju ŭ Łacinskaj Amierycy, u tym liku pra ciapierašniaha prezidenta Arhienciny Chaŭjera Mileja, piša El Periodico.
«Kampanija» — prapahandysckaja sietka, pieršapačatkova stvoranaja Jaŭhienam Pryhožynym, a paśla pierajšła pad pramy kantrol Słužby źniešniaj raźviedki Rasii, pisaŭ rasśledavalnicki prajekt Forbidden Stories.
Raniej sietka aktyŭna pracavała ŭ Afrycy, ale ŭ 2024 hodzie jana pašyryła svaje apieracyi na Łacinskuju Amieryku, u pryvatnaści na Arhiencinu.
Heta nie pieršy vypadak za apošni hod, kali ŭłady Arhienciny spyniajuć tajnyja apieracyi Rasii pa dezinfarmacyi ŭ Łacinskaj Amierycy. Uletku minułaha hoda jany paviedamlali, što raskryli rasijskuju špijonskuju sietku, čyjoj metaj było «sfarmiravać hrupu asob dla praviadzieńnia kampanij dezinfarmacyi i apieracyj suprać arhiencinskaj dziaržavy».
U zajavie adznačałasia, što arhanizacyja pad nazvaj «Kampanija», jakaja mierkavana finansujecca Kramlom, była źviazana z prajektam «Łachta». Prajekt «Łachta» nazyvali parasonavaj arhanizacyjaj, stvoranaj Jaŭhienam Pryhožynym dla raspaŭsiudžvańnia rasijskaha ŭpłyvu za miažoj praz manipulacyi ŭ sacyjalnych sietkach. Prajekt abvinavačvali va ŭmiašańni ŭ vybarčyja kampanii za miažoj.
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary