Va Ukrainie zahinuŭ pieršy rasijski student, zavierbavany ŭ vojski BPŁA

23‑hadovy žychar Buracii Valeryj Avieryn padpisaŭ kantrakt ź Ministerstvam abarony 3 studzienia, prajšoŭ navučańnie na apieratara bieśpiłotnych latalnych aparataŭ (BPŁA) i zahinuŭ 6 krasavika pad Łuhanskam — usiaho praz try miesiacy paśla pačatku słužby, piša Bi-bi-si.

Valeryj Avieryn byŭ vychavancam dziciačaha doma ŭ siale Cimluj, u 11 hadoŭ jaho ŭziali na vychavańnie ŭ pryjomnuju siamju. Jak raspaviała Bi-bi-si pryjomnaja maci Avieryna, Aksana Afanaśjeva, Valeryj skončyŭ navučańnie na apieratara BPŁA 24 sakavika. 2 krasavika jon apošni raz patelefanavaŭ joj i skazaŭ, što jedzie tudy, dzie «niama suviazi».

Pra śmierć pryjomnaha syna joj paviedamili 8 krasavika — usiaho praz dva tydni paśla zakančeńnia vučoby — i skazali, što jon zahinuŭ padčas minamiotnaha abstrełu.

«Dzicia try miesiacy vučyłasia na BPŁA, a my jaho ŭ šturm, u samuju miasarubku, taho, chto ŭ vojsku nie słužyŭ», — kaža Afanaśjeva. Ale padrabiaznaściaŭ hibieli jana nie viedaje: Valeryj Avieryn nie nazvaŭ joj ni numar vajskovaj čaści, ni svoj pazyŭny.

Valeryj vučyŭsia na apošnim kursie ŭ Burackim technikumie budaŭničych i pramysłovych technałohij, dzie asvojvaŭ druhuju śpiecyjalnaść, i sioleta pavinien byŭ atrymać dypłom. Jaho pryjomnaja maci kaža, što čuła i pra inšyja kantrakty ŭ hetym technikumie sa śmiarotnym zychodam, ale detalaŭ nie nazyvaje, a z adkrytych krynic heta pakul nie ŭdałosia paćvierdzić.

«Słužyć vielmi chacieŭ, ale ŭ vojska jaho nie ŭziali, skazali, što psichična nieŭraŭnavažany. Jon mianie padmanuŭ, skazaŭ, što pajechaŭ zarablać na Wildberries. I kali ja daviedałasia, što jon padpisaŭ kantrakt, ja ledź nie zvarjacieła. Ja kažu: «Ty što narabiŭ? Kudy ty pajšoŭ?» A jon skazaŭ: «Ničoha sa mnoj nie zdarycca, usio budzie narmalna, nie chvalujsia»», — raspaviała Aksana Afanaśjeva.

U 2023 hodzie jana raźmiaściła ŭ sacsietkach fota siastry Avieryna Śviatłany ŭ vajskovaj formie — pavodle danych Bi-bi-si, Śviatłana pracuje małodšaj miedsiastroj u balnicy Simfieropala.

U kaledžy, dzie vučyŭsia Valeryj Avieryn, rehularna pravodzilisia «ŭroki mužnaści», na jakich ahitavali iści na słužbu pa kantrakcie. A vajskovaja čaść 63411 arhanizavała «vystavu inžyniernaha ŭzbrajeńnia», dzie pakazvali ŭ tym liku i drony.

24 krasavika aficyjnaja hrupa Kiachcinski rajon u VK paviedamiła, što Valeryj zahinuŭ.

Pra stvareńnie novaha rodu vojskaŭ — bieśpiłotnych sistem — Ministerstva abarony RF abviaściła ŭ siaredzinie listapada 2025 hoda. Ministr abarony Andrej Biełavusaŭ padkreśliŭ, što załučać płanujuć pieradusim maładych ludziej da 35 hadoŭ, «jakija bolš usprymalnyja da novych technałohij i chutkaściaŭ».

• 24
• 1
• 4
• 12
• 0
• 1
• 1
• 0