Natalla Dulina zarehistravała ŭ Litvie IP i viadzie anłajn-kursy italjanskaj movy. A jašče zmahła dabicca vypłaty piensii
Byłaja palitźniavolenaja Natalla Dulina, jakuju ŭ červieni 2025 hoda vyzvalili z homielskaj žanočaj kałonii i pad prymusam vyvieźli ŭ Litvu, zmahła viarnucca da lubimaj pracy vykładčycy italjanskaj movy. Dulina paviedamiła «Radyjo Svaboda», što ŭžo maje dazvoł na žycharstva ŭ Litvie, lehalna pracuje, a taksama vyvučaje litoŭskuju movu.
«Pa vyzvaleńni letaś ja niejki čas była ŭ razhublenaści: zarobku niama, piensii niama, navat daviedki ab vyzvaleńni niama. Jak žyć, niezrazumieła. Ale ŭziała siabie ŭ ruki i prydumała, što budu rabić — adkryju sabie indyvidualnuju pradprymalnickuju dziejnaść. Svaboda ŭžo jość, viedy jość, treba pracavać», — raskazała Natalla.
Ciapier jana viadzie kursy italjanskaj movy dla biełarusaŭ. Ich arhanizavała tavarystva biełarusaŭ u Italii «Tałaka», jakim kiruje Julija Juchno. Na kursy mohuć zapisacca i biełarusy ź inšych krain, nie tolki ź Italii. Zaprašajuć usich, zaniatki iduć anłajn.
Siarod pieramoh, jakimi možna hanarycca, Natalla nazyvaje i toje, što joj udałosia damahčysia vypłaty biełaruskaj piensii.
«Na radzimie mnie pryznačyli piensiju pavodle ŭzrostu, jakuju vypłačvali, navat pakul ja była ŭ źniavoleńni, ale jak vyvieźli mianie ŭ Litvu, to vypłaty spynilisia. Tamu tut vyrašyła damahčysia, kab znoŭ pačali vypłačvać, ale heta akazałasia niaprosta.
Napisała list u kałoniju, u Departamient vykanańnia pakarańniaŭ MUS, źviarnułasia ŭ homielski sud, u Fond sacyjalnaj abarony nasielnictva (FSAN) i paśla niekalkich etapaŭ pierapiski piensiju pačali vypłačvać svajakam pavodle majoj hienieralnaj davieranaści, navat viarnuli toje, što zatrymali», — raskazała Natalla Dulina.
Biełaruskaja piensija Natalli nievialikaja, u Litvie hetych hrošaj nie chapiła b navat na žyllo, pryznałasia jana.
«Ale ŭžo nie tak kryŭdna, bo ŭ mianie pracoŭny staž bolš za 40 hadoŭ, ja doma pryznanaja vieteranam pracy! Pastupova źjaŭlajecca adčuvańnie ŭłasnaj niezaležnaści, i heta dapamahaje», — raskazała Dulina.
Natalla Dulina publična adkazała na paklop z boku druhoj palitźniavolenaj, Haliny Dzierbyš
Dulina adkazała Kaleśnikavaj: Płašč namiortva prystaŭ da Łukašenki. Lačyć treba chvarobu, a nie simptomy
«Ci vartyja pryncypy stračanych hadoŭ žyćcia?» Natalla Dulina — pra kałoniju, vysyłku i žyćcio paśla hetaha
Dulina nazvała artykuł Łojki «plaŭkom u tvar»
Kamientary